Скопје
Општина Илинден: Ќе се инвестираат 32 млн денари за рурален развој

Владата на Република Македонија и Општина Илинден потпишаа договор за одобрување на средства од 32 милиони денари преку програмата за рурален развој.
Имплементација на овие проекти е насочена кон подобрување на условите и подигнување на квалитетот на живеење во руралните средини, обнова и развој на локалната патна инфраструкура, што ќе даде позитивен импулс за подобрување на конкурентноста и понатамошно развивање на руралните средини.
Со цел подобрување на инфраструктурната поврзаност на населените места, од страна на Агенцијата беше прифатен проектот „Рехабилитација на локалниот пат Илинден-Марино“ во должина од 2,1 км.
Овој проект е од исклучително значење за Општина Илинден бидејќи локалниот пат ги поврзува двете најголеми населени места Илинден и Марино со над 65% од вкупното население во општината.
Реализацијата на овој проект ќе допринесе за побезбедно и непречено одвивање на сообраќајот како и ќе се подобри секојдневната комуникација на граѓаните во Општина Илинден. Вкупната вредност на овој проект изнесува 12,2 милиони денари.
Вториот проект кој доби поддршка за реализација е „Изградба на пешачко-рекреативна патека (шеталиште) Марино-Кадино“ во должина од 1500 метри.
Реализацијата на овој проект е со цел подобрување на безбедноста на учесниците во сообраќајот, особено на пешаците како и поголема безбедност на децата од училишна возраст кои се движат од зоните на домување кон детската градинка, основното и средното училиште во Општина Илинден. Изградбата на шеталиштето покрај тоа што ќе ги поврзе населените места Илинден, Марино и Кадино кои вкупно бројат повеќе од 10 000 жители, ќе овозможи и нови можности за рекреација, комуникацијата, заедничкото дружење и рекреативен спорт. Со проектните активности се предвидува изградба на пешачко-рекретивна патека односно шеталиште, изградба на велостипедска патека и патека за ролерки и скејтборди, поставување на реквизити и уредување на зелени површини во должина на патеката. Вкупната вредност на овој проект изнесува 14,5 милиони денари.
Третиот одобрен проект е „Изградба на пешачко-излетничка патека за пристап до манастирот Св.Петар и Павле кај с.Ајватовци“ во должина од 763 метри.
Со имплемнтација на овој значаен проект ќе се изврши уредување на пешачко-излетничка патека, која го поврзува населеното место Ајватовци и манастирот Св. Петар и Павле со излетничкото место во село Ајватовци. Оваа локација е атрактивна и интензивно се користи од стана на граѓаните како од општина Илинден така и од многу други посетители.
Со проектните активности ќе се овозможи целосно уредување на пешачко-излетничката патека со асфалтирање како и нејзино осветлување и поставување на клупи и корпи за отпадоци, со што излетничката патека целосно ќе ја добие својата функционалност. Вкупната вредност на овој проект изнесува 5,3 милиони денари.
Со оваа мерка и поддршка на Владата директно се допринесува во подобрување на квалитетот на живот во рурални средини, обнова и развој на селата како и зачувување и унапредување на традиционалните вредности во руралните подрачја.
Имплементирањето на овие инфаструктурни проекти конкретно ќе помагнат во заложбите за создавање на услови за одржлив рамномерен економски и социјален развој како и овозможување на просперитетна иднина и квалитететен живот на сите граѓани во Општина Илинден. /крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Општина Карпош: Ќе биде казнет секој локал што има поставено дополнителни маси и столови од тоа што им е исцртано во елаборатот

Општина Карпош известува дека во наредниот период ќе се вршат засилени контроли од страна на сектор Инспекторат во попладневните и вечерните часови на урбаната опрема на територија на Општината.
„Ве опоменуваме дека секој локал кој ќе има поставено дополнителни маси и столици од тоа што им е исцртано во елаборатот за урбана опрема, ќе бидат веднаш казнети и ќе биде поведена постапка за отстранување на урбаната опрема како и времена забрана за поставување на истата“, велат од Општината.
Македонија
Без вода дел од Аеродром

Од ЈП Водовод и Канализација известуваат дека денеска поради уличен дефект Ф-300мм на улицата Владимир Комаров 13 во населба Аеродром, прекинато водоснабдување ќе имаат корисниците од Пензионерски Дом, Кипер Маркет и една зграда на истата улица, водоснабдувањето ќе биде прекинато од 23:55 часот до санирање на дефектот.
Дефектот ќе се работи на 17.07.2025 од 09:00 часот.
Македонија
Делови од Гази Баба, Карпош, Кисела Вода и Аеродром без струја

Од ЕВН Македонија АД известуваат дека денеска без електрична енергија ќе останат:
– во периодот од 06.30 до 12.30 часот, корисниците од булеварот Киро Глигоров, општина Гази Баба;
– во периодот од 08.30 до 15.00 часот, корисниците од улицата Козле од бр.143 до бр. 157, општина Карпош;
– во периодот од 09.00 до 11.00 часот, дел од корисниците од улица Бистра, од улица Живко Фирфов до улица Гутенбергова, општина Кисела Вода;
– во периодот од 09.00 до 11.00 часот, дел од корисницитеод улица Гутенбергова, од улица Бистра до улица Волтерова, општина Кисела Вода;
– во периодот од 09.00 до 12.00 часот, дел од корисниците од улица Иван Цанкар (парни броеви), улица Франце Прешерн (непарни броеви) и улица Вангел Дину, општина Карпош;
– во периодот од 09.00 до 15.30 часот, дел од корисниците од улица Бриселска, општина Карпош;
– во периодот од 09.00 до 16.00 часот, дел од корисниците од улица Ѓорѓи Капчев, општина Аеродром.