Градоначалникот на Општина Кисела Вода, Орце Ѓорѓиевски, денес изврши увид во завршните активности за изградба на првиот затворен спортски објект во населбата Пинтија. Салата која има површина од околу 350 м2, е лоцирана во рамките на ПОУ „Рајко Жинзифов“, каде што со години наназад наставата по физичко образование се одвиваше во несоодветни и супстандардни услови. Во моментов се поставуваат панели и прозорци, додека следната фаза вклучува поставување на електричната инсталација. Градежните активности се одвиваат според предвидениот динамички план, а до крајот на февруари салата ќе биде целосно завршена и ставена на користење на учениците.

-Ова е првпат населбата Пинтија да добие затворен спортски објект, што е од огромно значење за нашите деца. Со оваа инвестиција вложуваме во нивниот физички развој, спортски потенцијал и здрав живот. Рамномерниот развој на општината е наш приоритет, а преку изградба на спортска инфраструктура обезбедуваме подобри услови за учениците и младите. Оваа сала е дел од нашата визија за унапредување на животниот квалитет во Кисела Вода.

Подигнувањето на стандардите во образованието е столб на нашето работење, а тоа го докажуваме со бројни инвестиции во обнова на училишната инфраструктура, со посебен акцент на спортот. Не само во Пинтија, туку и во сите останати населби во општината, работиме на создавање на модерни и функционални училишни простори, со цел да обезбедиме подобри услови за образовниот процес и правилен развој на младите- изјави градоначалникот Ѓорѓиевски додавајќи дека Општина Кисела Вода и во претстојниот период ќе продолжи со реализација на проекти кои значат подобрување на условите за образование и спорт, следејќи ја визијата за создавање здрави генерации и подобар животен стандард за сите граѓани.

Градоначалникот Горан Герасимовски информира дека утрово, Општина Центар заедно со директорот Душко Коцевски и вработените на јавното претпријатие Паркинзи на Општина Центар – ПОЦ ги исчистија јавните површини во населбата Маџир маало кадешто надлежност има градот Скопје.

„Вчера, веднаш се мобилизиравме и еве утрово спроведуваме голема акција за чистење на нашата општина. Ја исчистивме населбата Маџир маало кадешто надлежност има градот Скопје. Тука долго време сметот не беше тргнат. Во акцијата вклучена е целата механизација со цистерна за миење на улиците, две метларки за поефикасно чистење на улиците и камион за собирање на смет. Активирани се 120 хигиеничари кои оваа недела секојдневно ќе бидат на терен за поголема чистота на Центар. Со акцијата ги подигнуваме хигиенските стандарди во нашата општина, и обезбедуваме почиста и посредена околина за сите нас”, вели Герасимовски.

Герасимовски упатува апел до градот Скопје да ги преземе своите обврски сериозно и да ја исполни својата улога во одржувањето на чистотата во општина, на јавните површини кадешто градот и градоначалничката Данела Арсовска се надлежни.

Општина Центар во текот на целата недела темелно ќе ги чисти јавните површини, откако пред два дена градот Скопје ги остави центарските улици во смет, додаваат од општината.

Општина Аеродром и годинава доделува еднократна парична помош за новороденчиња во висина од 8 000 денари.

Барање за парична помош можат да поднесат семејствата со новороденче родено во 2025 година на подрачјето на Општина Аеродром.

Потребни документи за аплицирање:

1. Фотокопија од извод од матичната книга на родените (за новороденчето) или
2. за посвоено дете: фотокопија од извод од матичната книга на родените (за новороденчето) и фотокопија од примерок од Решение за посвојување/адoпција
3. На увид важечка лична карта или патна исправа од барателот.
5. Барање за доделување еднократна парична помош и Изјава за согласност за обработка на лични податоци можат да се подигнат во Општина Аеродром или да се симнат од веб-страницата на Општината на следниот линк

Барањето може да се поднесе во Архивата на Општина Аеродром секој работен ден во периодот од 08:00 до 16:00 часот, а рокот за поднесување трае до 31. март 2026 година.

„Исто така, ве потсетуваме дека рокот за поднесување барање за еднократна парична помош за новороденче родено во 2024 година истекува на 31. март 2025 година. Со помошта од 8 000 денари за секое новороденче Општина Аеродром има цел да им ги олесни трошоците на родителите, а грижата за најмладите останува еден од нашите врвни приоритети“, велат од општината.