Отворањето на четвртото издание на Недела на дизајнот во Скопје (Skopje Design Week), во вторник, на 23 септември, помина во знакот на изложбите што ќе бидат достапни за јавноста до крајот на манифестацијата, на 28-ми септември. 

На отворањето присуствуваа голем број дизајнери, гости-учесници на основачката конференција на Балканската дизајн мрежа, претставници на дипломатскиот кор, лица од политичката, бизнис и уметничката заедница, студенти од факултетите и академиите за уметност и дизајн, како и граѓани со изразено чувство за естетски вредности. 

Во комерцијалниот сегмент на приземјето во Куршумли-ан на Недела на дизајнот во Скопје присутни се производители, студија за дизајн, продавници, дистрибутери и самостојни дизајнери кои ги изложуваат и продаваат своите производи и услуги.

Горниот кат во Куршумли-ан е резервиран за изложбата на десет млади и модерни дизајнери од земјата во фокус – Франција, како и за изложбите на млади таленти, новоформирани студија и патувачките изложби. 

Пред влезот на Куршумли-ан се поставени дизајнерската продавница на „Капка“ и „Лудус“, каде се претставени најновите дизајнерски трендови и дадена е можноста за средба меѓу дизајнерите и публиката, и гастро-зоната во форма на отворена кујна на „Барбакан“ и пријателите. 

Забавниот дел на отворањето беше исполнет со настапот на групата „Мјузтрап“ од Србија и диџеј-сетот на Аќим. 

Доследно следејќи го мотото на четвртото издание на Недела на дизајнот во Скопје – „Четврта смена“, забавата траеше до 1 часот по полноќ.крај/мф