Скопје
Почнува сезоната на „Вип Аква парк“ во Скопје

„Вип Аква парк“, кој се наоѓа во комплексот на Спортскиот центар „Борис Трајковски“, го најавува почетокот на новата, четврта сезона која започнува во петок 11.06.2016 година.
„Летната авантура во „Вип АКВА ПАРК“ продолжува и оваа година. Тоа е место на кое ќе можат да уживаат и малите, но и големите. Одличните услови кои ги нудиме, најмодерните тобогани со најразлични ефекти, базенот со бранови, мрзливата река, бумерангот, спејс бал, како и многу други изненадувања, се само дел од овогодинешната успешна приказна која треба да ја испишеме. Минатагодишната посетеност на „Вип АКВА ПАРК“ ни беше доволна потврда дека нашата понуда е исклучиво адаптирана спрема можностите и потребите на граѓаните, и од тие причини цените на билетите ќе останат идентични како и минатата година. За безбедноста на посетителите и оваа година ќе се грижат 36 лиценцирани спасители од Црвениот крст, вклучувајќи и медицинска екипа. Сепак, сакам дополнително да апелирам до посетителите да ги следат пропишаните „БОН ТОН“ правила при посета, сè со цел да се испише уште една успешна приказна оваа сезона“, изјави Златко Перински, директор на СЦ „Борис Трајковски“.
Билет за „Вип АКВА ПАРК“ ќе чини 300 денари, а ќе се нуди и фамилијарен пакет за четири лица за 1.000 денари. Влезница за деца под 13 години ќе чини 200 денари, а влезница за деца под 4 години е бесплатна. За групни посети над 30 лица се добива попуст од 30%. „Вип АКВА ПАРК“ ќе работи секој ден од 10 до 20 часот.
Капацитетот на „Вип АКВА ПАРК“ е ограничен на 1.000 посетители, пред сè поради пропишаните нормативи за безбедноста и удобноста на посетителите. Во рамките на „Вип АКВА ПАРК“ ќе работат и три кафулиња и еден ресторан./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Шалтерите за наплата во „Водовод и канализација“ – Скопје утре ќе работат од 7.30 до 15.30 часот

ЈП Водовод и канализација – Скопје, ги известува корисниците дека утре, четврток, по повод верскиот празник Успение на Пресвета Богородица, шалтерите за наплата, шалтерите за рекламација и операторите во Дирекцијата на претпријатието ќе работат од 07:30 до 15:30 часот.
В петок, 29.08.2025 година, се продолжува со редовно работно време.
Македонија
(Фото) Нови и зајакнати услови за идните ИТ-таленти од училиштето „Ѓорѓија Пулевски“ во Аеродром

ООУ „Ѓорѓија Пулевски“ во општина Аеродром доби нов, целосно опремен кабинет по информатика со поддршка од Државниот завод за статистика.
„Ова училиште беше избрано за ваква поддршка поради континуираните успеси на учениците, кои во изминатите години имаат освоено бројни државни и светски награди по информатика и математика“, велат од Општината.
На свеченото примопредавање на кабинетот присуствуваа в. д. градоначалникот на општина Аеродром, Дејан Митески и директорот на Државниот завод за статистика, Дејан Станков.
„Општина Аеродром и училиштето упатуваат голема благодарност до Државниот завод за статистика за препознавањето и поддршката, кои претставуваат значаен поттик за учениците и наставниците во нивната посветеност кон знаењето, иновациите и новите технологии“, се додава во соопштението на Општината.
Македонија
Инвестиции во централното ООУ „Гоце Делчев“ во општина Илинден

Градоначалникот на општина Илинден, Александар Георгиевски денеска го посети централното основно училиште „Гоце Делчев“ во Илинден, каде во изминатиот период направени се повеќе инвестиции се со цел подобрување на условите.
Градоначалникот Александар Георгиевски истакна дека училиштето е подготвено за новата учебна година при што во изминатиот период направени се доста инвестиции, со цел да се подобрат условите за учениците и спроведување на квалитетен воспитно образовен процес.
За таа цел, за подобрување на квалитетот на часовите и подобрување на образовниот процес, набавени се шест интерактивни (електрични) панели, извршена е целосна санација на подовите на горниот кат, извршена е целосна реконструкција на тоалетите. Исто така извршена е обнова и санација на училишната просторија така наречена медијатека, која се користи како просторија за медиумски клуб. Во надворешниот дел од училиштето извршено е хортикултурно уредување на просторот, известува Општината.
Градоначалникот Георгиевски додаде дека Општина Илинден и во наредниот период ќе продолжи со инвестирање во опрема на сите училишта на нејзина територија, затоа што образованието е една од најважните алки во општеството.