Камен темелник на нов дел од детската градинка „Гоце Делчев“ беше поставен во сабота во Општина Илинден.

Камен темелникот го поставија министерот за труд и социјална политика, Диме Спасов и градоначалникот Жика Стојановски, со што Општина Илинден во соработка со Министерството за труд и социјална политика почна да го реализира проектот за зголемување на капацитетот на првата општинска детска градинка „Гоце Делчев“ со изградба на нов дел на површина од 650 метри квадратни.

Со Проектот ќе бидат изградени нови пет занимални за згрижување на 120 деца, на возраст од 2 до 6 години, со што вкупниот капацитет на градинката ќе биде 350 деца, ќе се изврши проширување на кујната во градинката, и ќе се обезбеди нова сала за приредби и манифестации.

Вкупната инвестиција на проектот изнесува 15 милиони денари, средства обезбедени од Буџетот на Општина Илинден, а градежните активности се планира да бидат завршени во месец септември 2015 година.

Новоизградените занимални ќе се вклопат во постоечкиот објект на детската градинка во која во моментот престојуваат 230 дечиња, со што ќе се овозможи целина на објектот, односно поврзаност со кујната, постоечките девет занимални  и останатите содржини на детската градинка, се со цел обезбедување на подобри услови за престој на децата.

Градинката „Гоце Делчев“ е високо енергетско-ефикасен објект, со иновативен пристап и воведени нови технологии, каде што греењето и ладењето е со алтернативни извори на енергија, со искористување на топлинската енергија од подземните води. /крај/со/ст