Денеска во Скопје се одржа марш организиран од Платформата за родова еднаквост, со слоганот „Нека јадат ружи!“. Поводот беше Меѓународниот ден на жената, кога се истакнаа важни барања за подобрување на правата на жените во општеството.

Организаторите потсетија дека 8 Март не е само ден за симболични гестови, туку и за феминистичка борба за слобода и правда.

„Жените не се безбедни ниту во својот дом, ниту на улица“, беа дел од изјавите на организаторите, кои истакнаа и важноста на борбата за еднакви права во работниот простор, каде што жените се соочуваат со сексуално вознемирување, мобинг и дискриминација.

Тие ја нагласија потребата од значајна промена на политиките за родово базирано насилство и повикаа на зголемена вклученост на жените во урбанистичкото планирање, како и на борба против работната дискриминација. „Не ќе молиме полиција и обвинителство да постапуваат навремено, туку ќе продолжиме да се бориме за вистинска заштита на жртвите на насилство“, нагласија тие.

Овој ден беше потсетник за сите жени ширум светот, дека родовата еднаквост е прашање на општествено унапредување, а не само симболички празник.

Во организација на граѓански иницијативи, денеска во Скопје ќе се одржи протестен марш по повод Меѓународниот ден на жената, 8 Март.

Маршот започнува во 12:00 часот на бул. Партизански одреди, а се очекува да се движи низ централните улици на градот. Процесот ќе го следи Единицата за безбедност на патниот сообраќај при СВР Скопје, која ќе преземе мерки за посебен режим на сообраќајот.

Маршот ќе започне на бул. Партизански одреди, по што ќе се движи кон бул. Св. Климент Охридски, потоа десно на бул. Илинден, преку мост Гоце Делчев до Стоковната куќа „Мост“, со продолжување на патот по бул. Филип Втори Македонски. Крајната дестинација е парк „Жена Борец“, а маршот ќе заврши пред Собранието на Република Северна Македонија околу 15:00 часот.

Како резултат на протестот, се очекуваат значителни промени во сообраќајот на поширокото централно подрачје на градот, а граѓаните се поттикнуваат да ги следат указувањата на сообраќајната полиција.

Во пресрет на Меѓународниот ден на жената – 8 Март, Општина Кисела Вода ја зајакнува поддршката за семејствата со новороденчиња преку зголемување на финансиската помош на 12.000 денари и воведување на нова придобивка – пакет со основни производи за мајките и нивните бебиња. Градоначалникот Орце Ѓорѓиевски и претседателката на Советот, Светлана Колариќ, денеска доделија 105 ваучери на семејства со новороденчиња, со што ја официјализираа новата мерка, која има за цел да обезбеди дополнителна поддршка во првите денови од мајчинството.

-8 Март е Денот на жената, симбол на силата, љубовта и пожртвуваноста на жените. Тоа е ден кога ја славиме нивната улога во општеството, во семејството, како носители на новиот живот и столб на секоја заедница. Токму затоа, во пресрет на овој голем ден ја започнуваме новата мерка со која на секое новороденче во нашата општина ќе му биде доделена двојно поголема финансиска поддршка – наместо досегашните 6.000, од сега исплаќаме по 12.000 денари.

Дополнително, за првпат, во рамки на оваа мерка, мајките добиваат и пакети со основни производи за првите денови од мајчинството, производи наменети за грижа и нега на здравјето на мајката и новороденчето, затоа што секој нов живот заслужува максимална грижа и поддршка. Посебна благодарност упатувам до компанијата “Мако Маркет”, која со својата општествена одговорност помогна во реализацијата на овој сегмент од мерката и со која договоривме истата континуирано да се спроведува во текот на целата година.

Оваа иницијатива ја претставуваме токму на 8 Март, во чест на сите мајки, ќерки, баби, сестри – сите жени, кои со својата сила, љубов и труд го движат нашето општество напред- изјави градоначалникот Орце Ѓорѓиевски.