Новата зграда на основното училиште „Григор Прличев“ беше пуштена во употреба во среда во скопската населба Железара.

Училиштето е со капацитет за 500 ученици со површина од 2.000 м2. Изградено е по стандардите за енергетска ефикасност со двојна изолација и со користење на сите најсовремени градежни материјали. Исто така, ова училиште ги задоволува стандардите за користење на деца со посебни потреби за чии потреби имаме поставено рампи и внатрешен лифт.

Во рамките на овој проект се направи и партерно уредување на училишниот двор, асфалтирање на пристапната улица како и поставување на нова комунална инфраструктура.

Вкупната инвестиција изнесува 72.445.000 денари.Работите ги изведуваше фирмата Жикол, кои максимално професионално и во рамките на предвидениот рок за изградба успеаа да го изградат училиштето.

До крајот на летниот распуст се планира да се набави нова опрема за училниците и лабораториите, како и да се постави нова ограда.

До сега, учениците наставата ја следеа во бараки кои беа поставени во далечната 1965 година.

Присутните ги поздравија директорката на училиштето, Сузана Танева, градоначалникот Тони Трајковски и премиерот Никола Груевски. /крај/со/ст