Скопје
СДСМ: Урбаната мафија не успеа, изгласаните ДУП – ови законски не може да бидат усвоени

Одлуката на советниците на СДСМ и коалицијата да ја напуштат седницата се покажа исправна и ефикасна. За деталните урбанистички планови гласаа само 11 советници, што е недоволно за нивно усвојување.
Ова во саботата го истакнаа во писмено соопштение до медиумите од Социјалдемократскиот сојуз за Македонија од каде велат дека согласно член 62, став 2 од Законот за локална самоуправа за усвојување на ваквите измени потребно е мнозинство гласови од вкупниот број членови во Советот на општина Центар.
„Советниците на СДСМ и коалициските партнери ги спречија бизнис – интересите на власта, што имаа за цел да го соголат Водно, со градби од 10 ката, коишто сеизмички го загрозуваат главниот град. За деталните урбанистички планови гласаа само 11 советници, што е недоволно за нивно законско усвојување“, се вели во соопштението на партијата.
Од таму нагласуваат дека ќе продолжат одлучно да се спротивставуваат на обидите на урбаната мафија да го загрозува здравјето и безбедноста на скопјани ставајќи ги бизнисите вредни над 630 милиони евра во преден план.
И општина Центар објави информација до јавноста дека на вчерашната седница не се усвоени измените на деталните урбанистички планови бидејќи како што велат од таму истите според законот мора да се донесат со мнозинство гласови од вкупниот број советници.
„Прописите се донесуваат со мнозинство на гласови од вкупниот број членови на советот, доколку поинаку не е определно со овој или друг закон“, се истакнува во соопштението на општина Центар.
Од таму потсетуваат дека со оглед на тоа што на вчерашната седница поддршка за спорните ДУП-ови дале 11 од вкупно 23 советници, плановите не се донесени.
ДУП-овите, беа поставени на Дневен ред на 23-та седница на Советот на Општина Центар, на предлог на советниците на ВМРО-ДПМНЕ./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски: Семејствата и блиските на повредените можат бесплатно да се сместат во скопските хотели

Градоначалникот на Општина Центар Горан Герасимовски информира дека семејствата и блиските на настраданите и повредените кои се хоспитализирани во скопските здравствени установи можат бесплатно да се сместат и да одморат во хотелите на територија на градот Скопје.
„Семејствата и блиските на настраданите и повредените кои се хоспитализирани во скопските здравствени установи можат бесплатно да се сместат и да одморат во хотелите на територија на градот Скопје. Ја поздравувам иницијативата што ја реализираат скопските хотели за бесплатно сместување. Во овие тешки моменти најважни се солидарноста и поддршката од сите, да им помогнеме на нивните родители, фамилии, пријатели колку што можеме повеќе! Граѓаните можат да се јават на телефонскиот број 073 821 120”, истакнува Герасимовски.
Скопје
Дел од Студеничани без вода

Од ЈП Водовод и Канализација известуваат дека поради дефект на затварач од ф – 200 мм на ул. 7 б.б во село Батинци, во периодот од 08.30 часот па се до отстранување на дефектот без вода ќе останат корисниците од селата Батинци и Љубош. ( општина Студеничани )
Скопје
Ѓорѓиевски: Финансиска помош за жртвите од семејно и родово базирано насилство

Градоначалникот на општина Кисела Вода Орце Ѓорѓиевски, информираше дека на денешната седница на совет се донела одлука за финансиска помош за жртвите од семејно и родово базирано насилство. Како што истакна, наскоро ќе биде распишан Јавен повик на кој жртвите ќе можат да се пријават, а се гарантира и целосна дискреција на истите.
-Општина Кисела Вода, ќе доделува финансиска помош на жртвите на семејно и родово базирано насилство. Борбата за спречување на секој вид на насилство е дел од нашата стратегија која во континуитет на спроведуваме. Оваа нова мерка, за која наскоро ќе биде распишан и Јавен повик, ќе гарантира целосна дискреција на жртвите кои ќе се пријават, а ќе приложат потврда дека се регистрирани како жртви на семејно насилство. Насилството е за секоја осуда, никој на овој свет не смее да биде жртва. Ова не е прва мерка која ја воведуваме во насока на надминување на ваквите или слично проблеми“, посочи тој и додаде:
„Претходно, во населбата Црниче, заедно со граѓанската организација ,,Крик” отворивме канцеларија за психолошко советување на жртвите од булинг, семејно или било каков тип на насилство. Кисела Вода не само што е потписник на Истанбулската Конвенција на Советот на Европа за спречување и борба против насилство врз жените и семејното насилство, туку и во пракса интензивно работи на имплементација на сите нејзини постулати. Заедно сме посилни. Заедно можеме да направиме промени! – рече Ѓорѓиевски.