Шестата по ред традиционалната манифестација „Интерскопкејкс 2014“ се одржа во саботата, 25-ти октомври, во Веро Центарот во Скопје.

Посетителите имаа можност да уживаат во креациите на аматери и на професионалци од земјава и од странство, а годинава учествуваа креативци од осум држави. 

Манифестацијата беше проследена со богата музичка програма, а влезот на истата беше бесплатен. 

Годинава манифестацијата се одвиваше во два посебни дела, каде што во првиот ревијален дел, граѓаните имаа можност да ги разгледаат изложените торти и изложбените штандови и да гласаат за најдобрата торта, додека во вториот дел беа прогласени најдобрите торти на „Интерскопкејкс 2014“. 

На годинешново издание изготвувачите на торти беа поделени на професионалци и аматери и се натпреваруваа во две категории, поточно во правење најдобра свечена и детска торта.

Во категоријата професионалци – свечена торта, првото место го освои слаткарницата „511” (Македонија), второто место слаткарницата „Моцарт” (Македонија), додека третото место го освои слаткарницата „АЛЕКС” (Турција). 

Во категоријата професионалци – детска торта, првото место го освои хотелот  „ПАРК” (Црна Гора), второто место слаткарницата „Чоколатерија Аромати” (Македонија), додека третото место го освои слаткарницата „Дела Боса” (Србија). 

Во категоријата аматери – свечена торта, првото место го освои Катерина Блажевиќ (Македонија), второто место Анџелија Николиќ  (Србија), додека третото место го освои Драгица Павловиќ  (Србија). 

Во категоријата аматери – детска торта, првото место го освои Емина Ризвановиќ (Босна и Херцеговина), второто место и припадна на Елизабета Здравковска (Македонија), додека третото место припадна на тортата на Амбасадата на Република Полска. 

Покрај овие, беа поделени и дополнителни награди: за најмлад учесник на „Интерскопкејкс 2014“ – Ангела Димовска (13 години), за најдобра композиција на торта – Зорица Николиќ (Србија) и за најтематска торта – Милена Алексиќ (Србија). 

Покровител на манифестацијата „Интерскопкејкс 2014“ е Град Скопје, а организатор на настанот е Хуманитарната организација ХОА – Ангелчиња. 

Овој проект произлегува од Програмата за финансирање проекти за развој на занаетчиството, угостителството и трговијата на Град Скопје за 2014 година.крај/мф