Скопје
Со графити, стенсили и стикери за проблемите на младите
„Сакам да живеам со вас, не покрај васˮ, „Боли и на сопствена кожаˮ, „Кога ќе пораснам сакам да останам во Македонијаˮ, се дел од 12-те јавни кампањи за застапување што 30 млади луѓе од Скопје и Македонија ги работат во рамки на проектот Уметност и дизајн за застапување.
Проектот го спроведува Фондацијата за дебата и едукација ИДЕА Југоисточна Европа, Скопје, со финансиска поддршка од амбасадата на САД во Република Македонија. Партнер во проектот е општина Центар, која ќе овозможи јавни површини низ центарот на Скопје на кои ќе се пресликаат сите јавни кампањи.
Во проектот се вклучени 15 млади учесници од Скопје и 15 од други градови во Македонија. Тие преку графити, стенсили, постери, стикери, фотографии ќе испратат порака до јавноста за горливи проблеми и прашања што ја засегаат младата популација во земјата.
Во тек е втората работилница од проектот на која учесниците смислуваат кои уметнички и дизајнерски техники ќе ги изберат за да ги претстават нивните кампањи пред јавноста. Таа почна на четврти април и трае до седми април. Се одржува во Канцеларијата за млади на општина Центар. Со нив работат илустраторот и дизајнер Горан Костовски Индог, стрип илустраторот Игор Јовчевски и теоретичар на стрип уметноста, Бошко Караџов.
Првата работилница се одржа во декември. Во следниот период учесниците визуелно ќе ги претстават нивните кампањи на ѕидови и ќе цртаат графити и стенсили. Проектот трае до септември годинава, кога ќе се одржи јавен настан на кој учесниците јавно ќе ги презентираат кампањите и за што ќе се застапуваат во иднина./крај/мф/бб
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без вода денеска дел од Центар
Од ЈП Водовод и канализација – Скопје, известуваат дека денеска:
· поради поврзување од стара на нова водоводна мрежа со пречник од ф-200 мм на улицата Тодор Александров бб, од 08:30 часот до завршување на интервенцијата, прекинато водоснабдување ќе имаат корисниците од делови од улиците: Тодор Александров, Партениј Зографски и Периша Савелиќ, општина Центар.
Македонија
Дел од Карпош денеска без струја
Од ЕВН Македонија АД известуваат дека поради зафати во електродистрибутивната мрежа, денеска без електрична енергија ќе останат:
· од 10:00 до 12:00 часот, корисниците од дел од улицата Ловќенска, општина Карпош.
Македонија
(Фото) Кисела Вода: Компјутери, принтери и телевизори за училиштата „Рајко Жинзифов“ и „Кирил Пејчиновиќ“
Набавени се компјутери, принтери и телевизори за основните училишта „Рајко Жинзифов“ и „Кирил Пејчиновиќ“ во Кисела Вода, како дел од континуираните активности за унапредување и модернизација на наставниот процес, извести Општината.

„Во периодот кога учениците се на зимски распуст, во училиштата се врши опремување со нова информатичка опрема, со цел второто полугодие учениците да го започнат со поквалитетна настава и полесен пристап до дигитални содржини.

Со оваа инвестиција, општина Кисела Вода уште еднаш ја потврдува својата определба за дигитализација на образованието и создавање современи услови за учење, во чекор со новите образовни стандарди и потребите на учениците“, соопштуваат од Општината.

– Нашата цел е децата да учат во современи и опремени училишта, каде што ќе имаат можност да стекнуваат знаења и дигитални вештини неопходни за нивниот понатамошен развој. Компјутерите, принтерите и телевизорите кои ги обезбедивме во училиштата „Рајко Жинзифов“ и „Кирил Пејчиновиќ“ се уште еден конкретен чекор во таа насока, а учениците по зимскиот распуст ќе бидат пречекани со значително подобри услови за настава, изјави градоначалничката на општина Кисела Вода, Бети Стаменкоска Трајкоска.




