Претседателот на Советот на скопската општина Центар, Мирослав Шиповиќ, на седница на Советот што треба да се одржи во понеделник во 13 часот, на дневен ред повторно ќе ги стави спорните Детални урбанистички планови Тасино чешмиче и Градски четврт, иако претходно градоначалникот на општина Центар, Андреј Жерновски ги отфрли.

Шиповиќ ДУП-овите повторно ги става на дневен ред согласно законската регулатива, според која по две седмици истите се враќаат на гласање.

Градоначалникот Андреј Жерновски веќе еднаш донесе решение за запирање на објавување на одлуката за измени во деталните урбанистички планови.

Минатата недела Жерновски изјави дека доколку на наредната седница на Советот на општина Центар не се промени ништо во однос на донесената одлука, ќе се обрати и до Уставниот суд за времено запирање на одлуката за измени во спорните детални урбанистички планови, од кои со едниот се предвидува и изградба на висококатница на Водно.

Пред две недели советниците на ВМРО-ДПМНЕ заедно со претседавачот Мирослав Шиповиќ ги поставија овие точки на дневниот ред, по што останатите советници од СДСМ и од коалицијата ја напуштија седницата во чие продолжение 11 советници од од ВМРО – ДПМНЕ гласаа за плановите, додека Шиповиќ се изјасни против.

Иако потегот на Шиповиќ беше сфатен како обезбедување на кворум за гласањето на советниците на ВМРО-ДПМНЕ, веднаш се испостави дека оваа одлука не е легална бидејќи не е донесена со мнозинство од вкупниот број на советници./крај/мф/ап