Советниците на општина Центар со 11 гласа „за“ и 11 гласа „против“ го повторија истото сценарио од минатата седница на Советот и го оспорија ветото што градоначалникот Андреј Жерновски го стави врз спорните Детални урбанистички планови (ДУП) со кои се предвидува и изградба на десеткатница на Водно.

За Жерновски не може да се носат одлуки во Советот со ваков распоред на гласовите и потенцираше дека ваквата одлука ќе ја оспори пред Уставен суд.

„Не можат да се донесат одлуки со ист број гласови, затоа ова ќе го обжалам на Уставен суд, кој со техничка одлука ќе констатира дека ова сценарио е спротивно на законот“, истакна Жерновски пред членовите на Советот на општина Центар.

На ова се спротистави претседавачот на Советот, Мирослав Шиповиќ, кој рече дека плановите се донесени согласно статутот и законите.

Советниците од редовите на СДСМ во дискусии укажаа на опасноста од можно свлекување на земјиштето, делејќи го ставот на градоначалникот, кој исто така повика на одговорност доколку се загрози безбедноста на граѓаните со изградба на толку високи градби во овој реон.

Претставниците од владејачката партија, пак. ја бранеа одлуката и тврдеа дека за овие планови имало јавна анкета, во која граѓаните не биле категорично против.

Со реакција за случајот со спорните ДУП–ови се јави и лидерот на СДСМ, Зоран Заев, кој на својот Фејсбук профил напиша: „Да гласате ЗА или ПРОТИВ решение на градоначалник за непрогласување на одлуките за донесување на ДУП е исто како парламентот да гласа ЗА или ПРОТИВ указот на претседателот на РМ за непрогласување на закон“.

Деталните урбанистички планови од Советот на општината Центар сега се селат во Уставиот суд. За судбината на плановите „Тасино Чешмиче“ и „Капиштец – Водно“ ќе одлучува деветчленото тело најави градоначалникот на Центар, Адреј Жерновски, откако по жестоката  расправа, Советот на Центар гласаше по одлуката на Жерновски за вето на двата плана./крај/мф/ап