Во рамките на засилените сообраќајни контроли, полициските службеници од СВР Скопје вчера спроведоа акциска контрола низ целата територија во нивна надлежност, при што беа санкционирани вкупно 549 возачи, од кои 187 за возење со брзина поголема од дозволената.

Како што соопшти Министерството за внатрешни работи, во рамки на контролата биле изречени и 36 санкции за управување возило без возачка дозвола, а останатите казни се однесуваат на различни прекршоци, при што најголем број биле за погрешно или недозволено паркирање.

„Сообраќајните контроли по планот продолжуваат и во наредните денови. Апелираме до граѓаните да ги почитуваат сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта“, наведуваат од МВР.

Општина Центар спроведе акција за расчистување на едно од маалата во населбата Кале, кое до пред една недела беше затрупано со смет и имаше само една канта за отпадоци. Според општината, ЈП „Комунална хигиена“ не го одржувало овој простор, па затоа локалните власти интервенираа за да го подобрат изгледот и хигиената на овој дел од градот.

Градоначалникот Горан Герасимовски информира дека во рамки на акцијата е подигнат целиот отпад, извршена е дезинфекција, искречени се ѕидовите и поставени се повеќе канти за отпадоци.

„Нашите општински служби интензивно работат на терен за да ја подобрат хигиената во Центар. На Кале го исчистивме сметот, направивме дезинфекција и додадовме повеќе канти за отпад. Исто така, ги искречивме ѕидовите кај урбаната опрема за децата, со што ова маало доби поубав изглед“, изјави Герасимовски.

Тој додаде дека во текот на вчерашниот ден биле спроведени повеќе чистечки акции во централното градско подрачје, при што бил подигнат сметот, испрани улиците и исчистени урбаните елементи на шест различни локации.

Со оваа акција, Општина Центар најавува продолжување на активностите за одржување на чистотата и унапредување на животната средина за жителите.

Денеска во Скопје ќе се одржи првиот уличен форум под наслов „Зошто нашите градови се небезбедни?“, кој има за цел да ги собере сите идеи и предлози за создавање на пообезбедни и поуредени улици.

Организаторот на настанот, иницијативата „Кој е следен?“, ќе разгледува различни аспекти кои влијаат на безбедноста, од железничкиот градски превоз во Скопје до потребните урбанистички промени кои би го подобриле сообраќајот и сообраќајната култура.

Како што истакнуваат организаторите, настанот е прилика за обединување на пошироката јавност и стручната заедница, со цел да се испрати јасна порака: безбедноста на улиците не е прашање на избор, туку неопходност. Оваа иницијатива има за цел да поттикне разговори за конкретни и изводливи решенија, кои би довеле до поуреден и пофункционален урбан простор, кој ќе обезбеди долгорочна сигурност и квалитет на живот за сите граѓани.

„Време е сите заедно да застанеме зад мерки што ќе гарантираат долгорочна сигурност во нашите домови и на улиците каде што живееме, работиме и движиме секојдневно“, велат организаторите на настанот.