Со 95 гласа „за“ и 2  „против“, Оливер Спасовски е изгласан за нов министер за внатрешни работи, според политичкиот договор кој предвидува сто дена пред избори опозицијата да предложи министри во неколку министeрства, а според истиот договор и Фросина Ташевска Ременски со ист број гласови стана министер за труд и социјална политика.

Договорот предвиидува нивните дополнителни заменици-министри да бидат на предлог на владејачката партија, па така Оливер Андонов, кој вчера стана министер за внатрешни работи, откако Митко Чавков си поднесе оставка, од петок е дополнителен заменик-министер за внатрешни работи, а Диме Спасов, досегашниот министер е дополнителен заменик –мионистер за труд и социјална политика.Исто така, Љупчо Николовски на предлог на СДСМ е дополнителен заменик-министер за земјоделство, шумарство и водостопанство, Александар Кирацовски е дополнителен заменик-министер за информатичко општество и администрација, а Кире Наумов дополнителен заменик-министер за финансии.На изборот на ново-старите минитри претходеше жестока дебата, во која пратениците на ВМРО-ДПМНЕ тврдеа дека во периодот кога овие лица, нешто порано оваа  година ги извршуваа истите функции направиле повеќе криминали и опструирале повеќе процеси, додека, пак, опозиционерите ги охрабруваа тоа да го прават и сега.„Свесни сме за штетите кои министрите на СДСМ ги правеа во минатиот период, кои достигнуваа и десетици милиони евра. Да се обидеме да не го прават тоа сега“, рече Илија Димовски, координатор на пратеничката група на ВМРО-ДПМНЕ, кој наброја повеќе случаи од минатиот мандат на овие министри, па рече да не се дозволи министерот за внатрешни да се вози со службено возило на партиски трибини, да не унапредува блиски луѓе по седум скалила, да не праќа телеграми со упатства до цело МВР, а министерката за труд и социјална политика да дозволи отворање градинки, да не им попречува социјална помош на оние кои им е потребна и да дозволи доделување станови на социјално загрозени семејства. „Десет години го крадете гласот на народот. Бирате министер за 15 часа. Циркузант бирате. Ич да не се секирате за листите на СДСМ. Масовно ви бегаат и коалициони партнери. Вие го знаете резултатот на 11 декември. Ќе доживеете дебакл“, рече Горан Сугарески од СДСМ, кој му реплицираше на Влатко Ѓорчев од ВМРО-ДПМНЕ кој забележа дека само луѓето на СДСМ кои седат во пратеничките клупи се менуваат, а овојпат ќе нема кој да биде на листите на опозицијата. Крсто Мукоски од ВМРО-ДПМНЕ забележа дека во петок повторно бираат влада за спроведување на изборите, и тоа го прават за СДСМ да излезе на избори и да го победи стравот од соочување со народот. „Не е проблем Избирачкиот список, не е проблем Специјалното јавно обвинителство, во кое ги сместивте вашите кадри од шарената револуција, проблем е вашиот страв. Не верувам дека ќе излезете на 11 декември на соочување, но верувам во мојот народ. Овие граѓани нема да ви дозволат да избегате од избори на 11 декември. Вашиот аболициран лидер мора да сфати дека е доста“, рече Мукоски.„Нервозава знам од каде е. МВРО-ВМРО ја нема, на што сте научени. На 11 декември, одиме на избори и ќе бидете казнети. Нема да биде дозволено во овие сто дена да правите циркус како Оливер Андонов што потпишува решенија за еден ден“, реплицираше Сугарески. Пратеникот Амди Бајрам констатира дека е време по шест месеци да излезе на говорница и да им ја каже вистината на СДСМ.„СДСМ, време е да ви кажам што сакате и што барате, техничка влада и министри. Кој ги избрка министрите? Сами си заминаа. Кај го има тоа. Шалио сам се. Те сакам, па не те сакам жено. Тоа е брак. Многу ви дадовме, многу пакост, многу зулуми да направите. Не ве пипнавме со еден прст, ве пуштивме да се брукате меѓу народот. Амди Бајрам што кажал тоа искочило. И овојпат ќе биде така“, рече Бајрам, кој рече дека ќе гласа против овие министри, затоа што никој не ги избркал првиот пат, сами си заминале.Независната пратеничка Роза Топузова Каревска рече дека со потпишувањето на договорот од 31 август, со кој се констатира дека се исполнети сите услови за фер и демократски избори се погазува Уставот, кој како официјален јазик го признава македонскиот, а договорот што е потпишан е на англиски јазик.„Според член 7 од нашиот сѐ уште важечки Устав, кој многупати во ова Собрание беше газен, стои, дека на целата територија на РМ и во нејзините меѓународни односи службен јазик е македонскиот јазик и неговот кирилско писмо. Договорот политички е потпишан на англиски јазик, со што се крши Уставот“, рече Топузова –Каревска, која смета и дека ниту еден услов не е исполнет, ниту оние за фер и демокоратски избори, ниту оние кои ги бара опозицијата. „Заев во 2014 година имаше пет барања. Техничка влада, а ова не е техничка влада, немешање на државата со партијата, попартизирани медиуми нема, директорското место го сметавте за правична застапеност на опозицијата, Избирачкиот список не е прочистен според ни една бројка објавена од опозицијата, а последен беше пописот, кој сега не е ни спомнат. Не верувам дека на 11 декември ќе имаме фер и демократски избори, затоа што ни еден од овие услови што ги бараше опозицијата не е исполнет, а зошто е потпишан овој договор си знаат лидерите на четирите политички партии. До нас не е доставен договорот, дознавме од медиумите за неговата содржина“, забележа Топузова – Каревска. „Најголем дел од сите услови не претрпеа никакви промени, што јасно кажува дека целта не била да се сменат некои услови за опозицијата, туку да влезат во влада без избори“, реплицираше Аврамовски Момчило од ВМРО-ДПМНЕ.Мандатот на овие министри и заменици-министри е до завршување на изборниот процес, а потоа се формира политичка влада од победникот на изборите./крај/мф/бб

Извор: Макфакс