Дополнителниот предлог за изменување и дополнување на Буџетот на Република Македонија за 2014 година во четврток ќе се најде на дневен ред пред пратениците на 14 седница на македонското Собрание.

Во предложениот ребаланс на Буџетот се предвидува интензивирање на изградбата на Коридорот 10, реалокација на средства меѓу буџетските корисници во рамки на обезбедената маса на плата, обезбедување дополнителен износ во Фондот на ПИОМ, надминување на последиците од елементарните непогоди во општините, а истовремено незагрозување на исплатата на обврските.

Вицепремиерот и министер за Финансии, Зоран Ставрески, на расправата на собраниската Комисија за финансирање буџет образложи дека станува збор за мини – ребаланс со кој се предвидува намалување на приходната и расходната страна за два проценти.

„Со измените и дополнувањата на Буџетот се задржува определбата за ниско даночно оптоварување, без промени во даночната политика и ревидирање на оние позиции кои што заради динамиката во првите шест месеци тоа беше неопходно“, истакна вицепремиерот.

Ставрески појасни дека на расходната страна измените од околу 1 милијарда денари се однесуваат на проектите во инфраструктурата, како што е изградбата на Коридорот 10 и во тие рамки, како што рече, Владата очекува интензивирање на градбата во преостанатиот период од 2014 година како и во следната година.

На приходната страна измените се резултат на зголемување на сопствените приходи на буџетските корисници, средства од ИПА во износ од 706 милиони, донација од Советот за Европа за реконструкција на ЈЗУ – Институт за белодробни заболувања во Министерството за здравство, за донација од УНХЦР и ИПА во Министерството за труд и социјална политика за изградба на станови за бегалци, прифатни центри, стратегија за Роми, за хидросистемот Злетовица донација од 25 милиони денари во Министерството за земјоделство, шумарство и водостопанство.

За придонесите посочи дека се реализирани на ниво на планираното со незначително отстапување од околу 1 процент. 

Ставрески потенцира дека заштедите беа направени соодветно кај буџетските корисници, кај кои се оставени доволно средства за реализација на предвидените проекти до крајот на годината.

Со предложениот ребаланс предвидено е дефицитот да изнесува 3,9 проценти од БДП, кој ќе овозможи Македонија да остане земја со ниска задолженост, а се ревидира и стапката на раст на македонската економија од 3,2 проценти која се предвидува да изнесува меѓу 3,5 и 3,7 проценти.

На дневниот ред на 14-та седница се и Предлог законите за имени и дополнувања на Законот за основно образование и на Законот за средно образование, и двата по скратена постапка./крај/мф/ап