Турската агенција за соработка и координација ТИКА ќе продолжи да ги поддржува заложбите на Владата за унапредување на квалитетот на националниот образовен систем, инвестирајќи во повеќе негови сегменти, со особен фокус на инфраструктурните проекти. Ова беше потврдено на денешната средба на министерката за образование и наука, Мила Царовска, со претседателот на ТИКА, Серкан Кајалар, која се одржа во главниот град на Турција, каде што делегација од МОН во која покрај министерката  и заменик-министерот Арафат Шабани е во неколкудневна посета.

„Особено ни е драго што ТИКА секогаш ги препознава и долги години ги поддржува напорите на државата за развој на образованието и што како претседателство потврдувате дека таа поддршка не само што нема да запре, туку и ќе се интензивира. За нас тоа е многу важно во овој период во кој во тек е имплементирање на реформите предвидени со неколкугодишниот план на МОН и на Владата“, рече Царовска за време на средбата, заблагодарувајќи се на агенцијата за сите досегашни инвестиции кои се плод на одличното партнерство помеѓу двете земји.

Претседателот на турската агенција за соработка и координација Кајалар рече дека Северна Македонија е многу значајна земја за Турција и затоа продолжуваат да го поддржуваат развојот на сите општествени сегменти, вложувајќи во одржливи проекти особено во образованието, здравството и инфраструктурата. Тој ги поздрави напорите на државата за унапредување на квалитетот на образованието, а особено се осврна на јакнењето на капацитетите на наставниот кадар, како клучна алка во системот од која најмногу зависи создавањето на добри генерации на ученици.

ТИКА во Северна Македонија е активна 15 години и досега има реализирано десетици инвестиции во изградба на нови или реконструкција на постојни училишни објекти во повеќе општини во државата со граѓани од различна етничка припадност.

Министерството за здравство соопшти дека вчера во нашата земја стигнаа 9.360 дози вакцини од производителот „Фајзер“.

„Од нив 4.680 се преку директен договор што нашата земја го има со овој производител на вакцини против Ковид-19. Според договорт, ‘Фајзер’  секој понеделник во нашата земја испорачува од 5.000 до 7.000 дози вакцини, односно 26.000 дози предвидени за цел месец. Останатите 4.680 дози вакцини на ‘Фајзер’ се добиени преку трилатерални договори во рамките на програмата ‘Тим Јуроп’ (Team Europe)“, соопшти министерството.

Преку оваа програма за поддршка во снабдувањето вакцини за Западен Балкан, што ја координира Австрија, во нашата земја во месец мај треба да пристигнат вкупно 19.890 дози вакцини. Вчерашната пратка е втора по ред, а помошта за Македонија која ја обезбедува ЕУ се вкупно 119.213 вакцини.

Претседателот Стево Пендаровски и бугарскиот претседател Румен Радев заеднички ќе оддадат почит на делото на светите браќа Кирил и Методиј во Рим.

Како што е предвидено, Радев најпрво ќе допатува во Скопје каде што ќе се сретне со Пендаровски, а потоа заедно со бугарски авион ќе заминат за Рим.

„Двете делегации ќе отпатуваат заедно во Италијанската Република. На 27 мај претседателите Пендаровски и Радев ќе положат цвеќе во базиликата Санта Марија Маџоре“, соопшти кабинетот на Пендаровски.

Во базиликата, во IX век, папата Адријан Втори ги благослови азбуката и книгите напишани од светите браќа Кирил и Методиј.