Македонија
Судијата Иван Џолев утре ќе сведочи пред Советот за факти за влијанието на Владимир Панчевски

Судијата Иван Џолев, судија од Основниот суд Скопје 1 -Скопје во четврток ќе сведочи пред Советот за утврдување на факти, откако тој најпрво јавно го обвини, а потоа и му поднесе кривична пријава на екс-претседателот Владимир Панчевски, дека му влијаел при донесување на одлука.
Кривичната пријава за Панчевски беше отфрлена од скопското Јавно обвинителство, но постои голема веројатност Џолев пред Советот да изнесе и други информации кои се однесуваат на работењето на Панчевски, со што тој повторно ќе биде дискредитиран и ќе мора да се откаже од трката за стари-нов претседател на судот.
Судскиот совет ќе ги чека заклучоците од Советот, но тој е спречен мериторно да одлучува, поради тоа што уште течат роковите за жалба, откако минатата седмица Судскиот совет на седницата му ја поправи слабата оценка на Владимир Панчевски, а му беа додадени и нови бодови, како што велат неговите противкандидати, со цел „да го остават во игра“.
На истата седница Судскиот совет му го намали бодовното салдо на Иван Џолев, но тој најави дека ќе вложи жалба.
Во трката за претседател до неодамна беше вклучен и судијата Владимир Туфегџиќ, но тој ја повлече својата кандидатура, откако претходно од Судскиот совет побара да се одложи изборот за претседател.
Барањето на судијата Туфегџиќ дојде по петицијата којашто против Владимир Панчевски ја потпишаа повеќе судии од скопскиот кривичен суд, а слична петиција беше потпишана и од стручните соработници./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Забрана за нови вработувања, поткуп, користење државен имот за кампања – ДКСК потсетува на забраните од денот на распишувањето на изборите

Државната комисија за спречување на корупцијата (ДКСК) информира дека во периодот од распишувањето на локалните избори во 2025 година до конституирањето на советите на општините и Градот Скопје важат специфични забрани и мерки.
Нови инвестиции и вонредни исплати од буџетот не смее да почнат или се извршат, освен ако претходно се обезбедени средства во согласност со законот.
Забрането е почнување постапки за нови вработувања или престанок на работен однос во државните и во јавните институции, освен во итни случаи.
Политичките партии и кандидатите не смее да користат противправни или анонимни извори на финансирање.
Државниот имот и буџетските средства не смее да се користат за изборна кампања или финансирање политички активности.
Поткупот на избирачи и давањето или ветувањето подарок за гласање е строго забрането.
Во периодот од 20 дена пред изборната кампања до нејзиното завршување не смее да се одржуваат јавни настани поврзани со изградба или пуштање во употреба објекти со државни средства.
Министерството за финансии е задолжено да ги објавува сите буџетски исплати во изборниот период, освен редовни плати, пензии и комунални трошоци.
Јавните фондови, претпријатијата и другите субјекти со државен капитал треба да достават податоци за моторните возила до ДКСК во рок од десет дена од распишувањето на изборите.
Користењето службени простории, опрема и возила за изборни активности е забрането.
Забранети се притисокот и заплашувањето гласачи и нивните блиски лица.
ДКСК ќе ја следи законитоста на изборниот процес и ќе презема мерки при сомневање за прекршување на законите.
Во изборниот период Комисијата нема надлежност да дава мислења по барања поврзани со постапките на државните и на локалните органи.
ДКСК ги повикува медиумите, здруженијата на граѓани и јавноста да пријавуваат прекршувања на забраните предвидени во законот.
Македонија
Стоматолошката комора тврди – нема неправилности, Министерството за здравство ја брани одлуката за преземање на лиценцирањето

Претседателот на Стоматолошката комора, Маријан Денковски, на прес-конференција изјави дека повеќекратните контролни надзори не откриле неправилности во работењето на Комората.
Тој ги демантира тврдењата дека Комората не постапила по насоките од министерот и најави консултации со поранешни претседатели за да го слушнат и нивното мислење.
„Од она што го знаеме досега, се работи за некои ‘незаконски’ постапки на Комората од 2016 година, па дури и порано, односно од 2006 година. Ќе се направи средба со Лекарската комора зашто, ако кај нас, во стоматологијата, ‘незаконска’ едукација вршеле речиси 15, како што беа наречени, нерегистрирани здруженија, во Лекарската комора, во системот на континуираната медицинска едукација учествуваат или учествувале над 80 такви здруженија, меѓу кои доминираат членки на Македонското лекарско друштво“ додаде Денковски.
Најави дека ќе се бара јавно извинување доколку се докаже отсуство на финансиски или други криминали.
Министерството за здравство одговори дека одлуката за преземање на лиценцирањето е донесена врз основа на подолготрајна анализа и извештаи од две формирани комисии, кои утврдиле неправилности и недостатоци во работењето на Комората.
„Потенцираме дека, по извршениот надзор на првата комисија, формирана во 2024 година, воопшто не е постапено по препораките, односно во целост се неточни тврдењата дека комисиите ‘немаат утврдени неправилности во кој било сегмент од работењето во Комората’, а втората комисија веќе дава јасни насоки до Министерството за здравство за утврдените неправилности, недостатоци и предлог за дејства што треба да се преземат“, велат од Министерството.
Министерството нагласи по одлука на Уставниот суд и врз основа на фактичките наоди, министерот донел одлука да ги преземе надлежностите за лиценцирање сè додека не се воспостави законит, транспарентен и професионален систем.
Министерството за здравство одлуката ја соопшти во саботата. Тогаш министерот Алиу информира дека надзорот на документите на Стоматолошката комора покажал сериозни пропусти, односно едукации преку нерегистрирани здруженија и сертификати, кои неправилно се користеле за продолжување на лиценците. Информира дека има и сомнеж за финансиска злоупотреба.
Македонија
Директорот на БЈБ од СВР Тетово: Нема да дозволиме насилството на поединци да ги нарушат сигурноста и мирот во заедницата

Денеска директорот на Бирото за јавна безбедност Александар Јанев, во СВР Тетово оствари средба со раководството, на која детално беа разгледани сите околности и преземените мерки по вчерашниот вооружен инцидент, во кој беше одземен еден живот, а повредени беа четири лица.
„Сакам граѓаните на Тетово и регионот да знаат дека полицијата е целосно мобилизирана и посветена. Се преземаат активности за да се гарантира и испорача безбедноста. Нема да дозволиме стравот и насилството на поединци да ја нарушат секојдневната сигурност и мирот во заедницата. Истовремено, на сторителите и сите кои мислат дека со оружје можат да решаваат спорови и несогласувања им порачувам дека ќе бидат пронајдени, изведени пред лицето на правдата и санкционирани. Полицијата ги стави во функција сите потребни служби со цел да бидат фатени сите инволвирани во овој инцидент“, дециден беше директорот на БЈБ Јанев, додавајќи дека безбедноста е наша заедничка вредност.
„Ги повикувам сите граѓани на Тетово и насекаде низ државата да соработуваат со полицијата, да пријавуваат информации и заедно да изградиме средина во која нема место за криминал и насилство. Само заедно можеме да се спротивставиме на поединците и групите кои не споделуваат исти вредности со нас чесните“, истакна Јанев заклучувајќи дека Македонија и сите граѓани заслужуваат мир и спокој, а полицијата е тука за да го испорача.