Специјалното јавно обвинителство, кое го презеде случајот „Пуч“, смета дека тоа што Судот не им ги доставува доказите е нова судска практика и не е според новиот Закон за кривична постапка, додека од Основниот суд велат дека доказите не се доставуваат поради почитување на еднаквоста на оружјата на странките.

Обвинителката која го води ова Обвинителство, Катица Јанева, побара судијката, Љубинка Башеска да го одложи денешното рочиште за случајот „Пуч“ на подолг временски период, бидејќи во Специјалното обвинителство не направиле увид во доказите.Јанева побара судот да им ги достави доказите, а ако тоа не е возможно, побара пет работни дена да им обезбедат простории во Судот за целиот тим да дојде во Судот и да врши увид на доказите.Судијката во случајот „Пуч“ рече дека Судот не смее да им ги предаде доказите, но дека ќе им бидат обезбедени простории да го вршат увидот.„Доказите законски и технички не можат и не смеат да бидат предадени во владение на странката. Судот ќе обезбеди простории во коишто ќе може да се изврши увид во доказите на предметот“, рече Башеска. Судењето е одложено за на 2-ри март, а со последната одлука на Основниот суд Скопје 1 сите обвинети од случајот „Пуч“ се пуштени од притвор. Јанева во изјава за медиумите по одложувањето на рочиштето, рече дека тие сметаат дека доказите треба да им бидат предадени, но дека ќе постапуваат како ќе им каже судот. Обвинителката Ленче Ристова на 29-ти декември извршила увид во доказите, но ги известила својот тим дека не може сама да направи увид, па одлучиле тимски, сите обвинители од Специјалното обвинителство да дојдат во судот и да извршат увид во доказите.„Не ни дозволуваат да ги земеме доказите, доаѓаме тука на увид во Судот. Во Судот ни се обезбедени коректни услови за работа, но сметаме дека тоа е нова практика  на Кривичниот суд, бидејќи претходно, и јас сум била обвинител, ни ги доставувале предметите во нашите матични обвинителства да вршиме увид во нашите простории. Тие докази до судот ги достави Јавното обвинителство и логично е тие докази, според новиот Закон за кривична постапка, треба да бидат кај нас. Затоа нашето барање е доказите да ни ги достават. Но бидејќи судот тоа не го дозволува, ние ќе дојдеме тука, ние го почитуваме судот. Мислам дека по новиот ЗКП доказите треба да стојат кај Јавниот обвинител. Ние ќе постапуваме како ќе каже Судот“, изјави Јанева.Од Основниот суд Скопје 1 велат дека доказите не може да бидат предадени поради еднаквост на оружјата на странките во постапката, но и заради безбедноста на доказите.„Како што и досега постапувал Основниот суд Скопје 1 – Скопје во сите останати предмети, а особено кога се работи на обемен доказен материјал, токму заради безбедноста на доказите истите не се доставуваат до странките, а наместо тоа се дозволува увид во предметот во просториите на судот. На Обвинителот во конкретниот предмет, како што можевте да слушнете и на денешната главна расправа, му е дозволен увид во списите на предметот уште од 29-ти декември, а судот денеска го прифати и предлогот на обвинителот за одложување на главната расправа, поради дополнително време за увид во доказите, на што не се противеше ниту одбраната“, велат од Судот.Според Судот, доколку се дозволи доказите да бидат изнесени од судот за увид во обвинителството, истото ќе треба да им биде дозволено и на одбраната и обвинетите. „Дотолку повеќе наведеното е во корелација токму со претходно дадените изјави на конкретното обвинителство за безбедносните ризици во нивните простории“, додаваат од Судот.По барање на Специјалното обвинителство, Судот ги ослободи од притвор првообвинетиот во случајот „Пуч“, поранешниот директор на УБК, Зоран Верушевски и вработениот во МВР, Ѓорѓи Лазаревски кои се товарат за нелегално прислушување и шпионажа, со што сите обвинети од овој случај се пуштени од притвор. Во судот во четврток се појави и лидерот на СДСМ, Зоран Заев кој е четвртообвинет во случајот за обид за насилство кон државни функционери. Тој е задоволен со датумот на одложување на судењето.„Одлуката ми е логична, бидејќи материјалите не се предадени на Специјалното јавно обвинителство и ќе мора тие постојано да доаѓаат во Судот и да ги гледаат доказите. Јас ја имав таа прилика уште кога беа доказите во Јавното обвинителство, заради нивната обемност посебно делот којшто уште тогаш беше доставен од нас, и логично е дека треба дополнително време да се направи увид со постојано доаѓање во Судот“, рече Заев./крај/ффс