Македонија
Tренчевска: Владата се обврза дека ќе има нулта толеранција кон сите форми на насилство врз жените
Јованка Тренчевска, министерката за труд и социјална политика, учествуваше на регионалниот форум „Виртуелното е реално: Зајакнување на законодавната рамка за поддршка на телесната автономија“, во организација на Фондот за население на Обединетите нации – УНФПА.
Таа изрази задоволство за можноста да се разговара за толку значајни прашања, како што е насилството преку интернет врз жените и девојките, и ѝ изрази поддршка на кампањата Bodyright, која претставува глобален повик да се спречи насилството врз жените и девојките во виртуелните простори.
Министерството за труд и социјална политика заедно со другите засегнати фактори во општеството сериозно работи на креирањето политики и преземање акции за превенција и заштита на жените и девојките од родово базирано насилство, вклучувајќи ги и насилството преку интернет, сексуалното и репродуктивното здравје, унапредувањето на правата на жените и на девојчињата, на семејствата и на заедниците, рече Тренчевска.
„Владата на Република Северна Македонија се обврза дека ќе има нулта толеранција кон сите форми на насилство врз жените со преземање конкретни мерки и активности во една од приоритетните области – родовата еднаквост. Оваа обврска беше потврдена преку усвојување на националните заложби на самитот во Најроби во 2019 година“, рече Тренчевска.
Во време кога е особено разиена технологијата и информациите бргу се шират, рече Тренчевска, сведоци сме на злоупотреба на интернетот и дигиталните технологии за комуникација, за насилство врз жените, говор на омраза, сексизам, злоупотреба на фотографии и видеа и нивно фалсификување. Сведоци сме и кај нас преку социјалните мрежи колку често се шират говорот на омраза и сексизмот кон жените и девојките. Токму затоа наша заедничка обврска е да се бориме против ваквото кршење на човековите права на жените.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Врховниот суд: Државата е должна да обезбеди здрава животна средина, а непреземањето дејствија е повреда на правата на граѓаните
Општата седница на Врховниот суд на Република Северна Македонија денеска утврди начелен став за правото на здрава животна средина и загадувањето на воздухот.
Во Начелниот став се утврдува дека државата согласно националната и меѓународната правна регулатива, е должна да обезбеди здрава животна средина и дека со непреземањето дејствија од страна на надлежните јавни органи се повредува уставно загарантираното право на здрава животна средина.
„Согласно националната и меѓународна правна регулатива, Државата е должна да обезбеди здрава животна средина, меѓу кои и правото на чист воздух, како поединечно право на граѓаните, кои како странка во управна постапка, можат да бараат да се задолжат надлежните органи, да ги донесат Основните плански документи, од член 23 од Закон за квалитет на амбиенталниот воздух, како Општи акти“, се наведува во Начелниот став.
Претседателката на Врховниот суд на Република Северна Македонија, Беса Адеми, истакна дека правото на здрава животна средина е фундаментално граѓанско и човеково право и непосредно поврзано со унапредувањето на здравјето на граѓaните и со законски пропишаните обврски и должности за заштита на животната средина.
„Една од темелните вредности на уставниот поредок на Република Северна Македонија е уредувањето и хуманизацијата на просторот и заштитата и унапредувањето на животната средина и на природата. Пристапот до здрава животна средина е основно човеково право, на што упатува и Советот за човекови права на Обединетите нации“, истакна претседателката на Врховниот суд, додавајќи дека прашањето е важно и од аспект на Европската конвенција, Советот на Европа, Европскиот суд за човековите права и Европскиот суд на правдата.
Професорот д-р Борче Давитковски истакна дека судската власт е коректив на другите власти и дека преку својата отвореност кон јавноста, Врховниот суд дава исклучителен придонес за јакнење на јавната доверба, особено што Општата седница расправа за прашања кои се од интерес на граѓаните и човековите права.
Професорот Давитковски нагласи дека правото на здрава животна средина е уставно загарантирано право и дека секој има право на информации за здравата животна средина, односно за загадувањето на воздухот, согласно конвенциското право и домашното законодавство.
Во таа насока, професорот истакна дека согласно Уставот, секој може да бара заштита на своето право, посебно во ситуација кога јавните органи не ги презеле дејствијата кои согласно законот биле должни да ги преземат и дека од големо значење е што судската власт застанува во одбрана на правата и интересите на граѓаните.
Судијата Џемали Саити истакна дека секој човек има право на здрава животна средина и дека во остварувањето на правото на здрава животна средина се применуваат и одредбите од Законот за управните спорови, кои обезбедуваат судска заштита од незаконити акти и дејствија. На тоа се надоврза судијата Анита Бошковска, која нагласи дека утврдувањето на начелниот став е од големо значење како за граѓаните и јавниот интерес, така и за судството.
Судијата Мирјана Лазарова Трајковска подвлече дека најзначајниот аспект е дека не секогаш со чинење се повредуваат правата, туку може многу поголеми повреди да бидат извршени со не чинење. Во оваа насока, судијата Лазарова Трајковска потенцираше дека правото на здрава животна средина, а во смисла на судската заштита подразбира и право на пристап до суд.
Македонија
Јанев со раководството на СВР Скопје: безбедносната состојба задоволува но има реални можности за натамошно подобрување
Директорот на Бирото за јавна безбедност при Министерството за внатрешни работи, Александар Јанев денеска го посети Секторот за внатрешни работи Скопје каде што имаше работен состанок со раководството на оваа организациона единица на македонската полиција, а кој што беше посветен на целите и задачите на Секторот во насока на натамошно подобрување на неговата ефикасност и квалитет на работа во интерес на безбедноста на граѓаните во главниот град.
На средбата беше резимирана актуелната состојба во повеќе сфери од безбедноста на територијата под надлежност на СВР Скопје, особено од аспект на сложеноста на обврските и задачите што произлегуваат од спецификите на подрачјето (бројност и фреквентност на луѓе, административни и други значенија и слично) при што беше оценето дека безбедносната состојба задоволува но и дека има реални можности за нејзино натамошно подобрување. Во тој контекст на состонакот, меѓу другото, стана збор и за скорешните предвидени измени во организационо-структурното функционирање на Секторот, и дека тие сигурно можат позитивно да се одразат во секојдневното работење на сите служби во рамки на оваа организациона единица при Бирото за јавна безбедност.
Македонија
Филков-Кељменди: разменети искуства, а посебен акцент ставен на т.н. систем за електронско управување и распределување на предметите
Во рамки на службената посета на Република Косово, делегацијата предводена од министерот за правда Игор Филков оствари работна средба со државниот јавен обвинител, Бесим Кељменди.
На средбата се дискутираше за досегашната соработка меѓу двете држави на ова поле. Беа разменети и позитивните практики и искуства, а посебен акцент беше ставен на Информатичко-комуникациските технологии, односно т.н. систем за електронско управување и распределување на предметите.
Во таа насока, од страна на Јавното обвинителство на Република Косово беше презентиран начинот на работа на системот за електронско управување на предметите.
Двете страни се согласија за интензивна соработка помеѓу Република Северна Македонија и Република Косово и за нејзино натамошно продолжување и продлабочување во оваа сфера.