Премиерот Христијан Мицкоски денес оствари работна посета на Министерството за енергетика, рударство и минерални суровини. Посетата ја потврди цврстата поддршка на Владата за реформите и проектите што се реализираат со цел подобрување на енергетската стабилност, зголемување на инвестициите и унапредување на ресурсното управување.

Разговарано беше за клучните приоритети во енергетиката, тековните реформи во енергетскиот сектор, проектите за модернизација на енергетската инфраструктура и плановите за подобрување на сигурноста на снабдувањето со енергија. Во разговорите беа опфатени и мерките за оптимизација на трошоците и унапредување на регулаторната рамка, со цел создавање стабилен, предвидлив и конкурентен енергетски пазар.

Министерката Божиновска истакна дека министерството останува посветено на спроведување на реформите кои ќе обезбедат сигурно, одржливо и економично снабдување со енергија за граѓаните и индустријата. Поддршката од Владата е клучна за реализација на крупните инвестиции и стратешките проекти кои ќе ја унапредат енергетската независност на земјата, подвлече Божиновска.

Премиерот Мицкоски ја потенцираше важноста на енергетиката како еден од најкритичните сектори за економскиот развој на земјата и ја истакна подготвеноста на Владата да даде поддршка во реализацијата на стратешките проекти.

Во рамки на посетата, премиерот се запозна со условите за работа во Министерството, инфраструктурата и динамиката на тимот кој работи на стратегиските енергетски политики.

Министерството за енергетика, рударство и минерални суровини останува посветено на имплементација на политики што ќе обезбедат одржлив енергетски систем, стабилно снабдување за граѓаните и индустријата, како и услови за нови инвестиции и технолошки развој.

Министерот за социјална политика, демографија и млади, Фатмир Лимани денеска одржа работна средба со претставници на Светска Банка, на која се разговараше за активностите поврзани со Проектот за подобрување на социјалните услуги кој се реализира со поддршка на Светска Банка.

Проектот опфаќа три компоненти: промовирање на социјалната вклученост преку подобар пристап до парични надоместоци и услуги; проширување на пристапот и подобрување на квалитетот во системот за згрижување и воспитание и управување со проектот, мониторинг и евалуација.

На средбата од двете страни беше изразено задоволство од досегашниот тек на проектот, неговата реализација и посветеност на сите вклучени во него, што води кон остварување на заедничката цел – испорака на квалитетни услуги кон граѓаните.

Потврда за успешноста на проектот се активностите кои се во тек, а тоа се вклучување на нови 13 општини кои се избрани за проширување на групи во други просторни услови, со што се овозможува влез на нови деца во предучилишниот процес.

Понатаму, изразувањето на интерес на 55 општини за грант за развој на социјални услуги, за што ќе биде објавен и Јавен повик за аплицирање веќе следната недела. Општините заедно со потенцијални даватели на услуги ќе може да аплицираат за грантови наменети за проекти за развој на социјалните услуги: услуги во домот (Помош и нега во домот) и услуги во заедницата (Дневен престој за лица со попреченост, Дневен престој за лица со попреченост со индивидуална работа, Дневен престој за стари лица, Дневен престој за стари лица со активно стареење).

На општините кои ќе изразат интерес за добивање грант за развој на социјални услуги, ќе им се обезбеди поддршка за подготовка на проектната апликација, од страна на единицата за управување со проектот.

На средбата се разговараше и за активностите околу развојот на Електронскиот систем за администрирање на парични надоместоци, социјални услуги и јавни овластувања Овој систем веќе се пилотира во четири центри за социјална работа – Берово, Кратово, Ресен и Македонски брод, а во периодот кој што следува ќе се вклучат и останатите центри со користење на електронскиот систем.

Придобивките од овој систем се големи, бидејќи овозможува веднаш да бидат видливи сите права кои што ги добива едно домаќинство од системот на социјална заштита.

Соговорниците изразија подготвеност за продолжување на соработката во насока на успешно имплементирање на проектот во целост со акцент на испорака на квалитетни услуги на оние граѓани кои навистина им се потребни за достоен живот.

Комисијата формирана од Судскиот совет првично треба да изврши увид во претходниот предмет што се водел против возачот што ја усмрти Фросина Кулакова за понатаму да утврди дали имало неправилности во постапувањето.

Претседателот на Советот, Александар Камбовски, одговарајќи на новинарски прашања, изјави дека малку е чувствително времето затоа што предметот во овој момент се наоѓа пред Апелациониот суд во Скопје и затоа комисијата треба да постапува внимателно за да не се содаде притисок врз овој суд, кој одлучува по првостепената пресуда.

„Комисијата треба внимателно да изврши увид и кога ќе заврши со увидот, ќе направи свој извештај. Ќе се постапува паралелно. Меѓутоа, убаво би било да внимаваме бидејќи не сакаме да почувствува Апелациониот суд некаков притисок од наша страна. Доволен е притисокот што веќе го има од јавноста врз овој суд“, истакна Камбовски по седницата на Судскиот совет.

Фросина Кулакова беше прегазена на пешачки премин на булеварот Партизански одреди во Скопје на 29 јануари од 20-годишниот Васил Јованов за кого беше објавено дека возел пијан, без возачка дозвола и минал на црвено светло. Нему лани му се судело и за неовластено производство и пуштање во промет наркотични дроги и прекурсори, но судот му одредил мерка поправен дом третирајќи го како помлад полнолетник. Тогаш Обвинителството поднело жалба на пресудата по која сѐ уште одлучува Апелација.