Дирекцијата за заштита и спасување има информации за уште три или четири лица кои се исчезнати по поплавите што пред три дена го зафатија главниот град, Скопје, каде загинаа веќе 22 лица.

„Знаеме за три или четири лица, засега, исчезнати. Можеби се и по семејствата некаде, во првиот момент беше хаотична ситуацијата“, вели Шабан Салиу, директор на Дирекцијата за заштита и спасување.Салиу очекува дека до крајот на неделата ќе има видливи резултати од работата на терен на надлежните. Смета дека прво треба да се средат патиштата, па да се чисти од кал и тиње. Вели дека треба да им се помогне на луѓето кои настрадаа од невремето да се вратат на нормалниот секојдневен живот. „Со УХМР немаме разговарано дека таква една катаклизма ќе се случи во моментот. Тоа не се спречува. Дожд не можете да спречите“, вели Салиу. Тој вели дека по повеќе денови нанапред ги следат сите промени и имаат дневна процена на ризици од секакви непогоди, не само дожд и поплави. Салиу тврди дека како директор со првите тимови од Дирекцијата бил на делот кај Сингелиќ и Ченто, но дека не можеле да влезат со џиповите и пикапите што ги поседуваат, туку ја алармирал Армијата да дојде со нивните високи возила за да помогне. „Не можеше да се влезе со џиповите и пикапите на Дирекцијата за заштита и спасување и веднаш алармирав АРМ да може да влезат со високи џипови. Жалам за починатите жртви. Лично јас и заменикот во одредени куќи кои, за жал, беа потопени со водата извлековме еден старец и едно дете на возраст од 4/5 години“, вели Салиу.Според него, глетката била тажна, но тој не чувствува одговорност за состојбите, затоа што во сите девет години откако е директор секогаш бил на терен и помагал. Тој побара помош од доброволци, а рече дека електрична енергија до оштетените домови ќе стигне кога ќе се извлече сета вода./крај/мф/бб