Субвенции за набавка на електричен автомобил, како и за вградување на плински уред во возилата најави претседателот на ВМРО-ДПМНЕ Никола Груевски, како два нови проекта што ги нуди оваа партија со цел намалување на загадувањето на воздухот.

„Денес објавуваме мерки кои ќе започнат да се нудат од 2017та со цел да го поттикнеме купувањето на електрични автомобили кои имаат нула загадување, побрзи се и многу помалку се расипуваат бидејќи имаат помалку делови“, рече Груевски.Според него, тие предвидуваат пакет мерки со кои предвидуваат увозот на нови електрични возила да биде со 0% царина и без дополнителна акциза, а при купување на нови електрични автомобили ќе се применува повластената даночна стапка од 5%, наместо сегашните 18% ДДВ. „На пример ако за возило од 30 илјади евра данокот на додадена вредност изнесувал 5.400 евра со намалените на 5 проценти ДДВ ќе изнесува 1.500 евра, односно 3.900 евра ќе заштеди купувачот“, појасни Груевски. Тој уште додаде дека Владата на РМ ќе дава субвенција за купување на електрично возило и тоа од 3.500 евра за секое електрично возило чија набавна вредност е до 25.000 евра, и субвенција од 5.000 евра за секое електрично возило чија набавна вредност е над 25.000 евра. Мерката субвенции за физичките лица, но и за правните лица за набавка на најмногу пет возила во почеток. Проектот на ВМРО-ДПМНЕ предвидува сите електрични автомобили да бидат ослободени од плаќање на патарина на сите патишта низ Македонија каде што се плаќа патарина и тоа во период од 10 години, односно до 2027та година.„Тоа значи дополнителна привилегија и заштеда за корисникот на автомобилот. Доколку на пример со автомобилот оди од Скопје до Градско и назад, ослободувањето од патарина ќе значи заштеда од 360 денари и тоа ќе може да го користи неограничен број пати. Ова е особена поволност за оние што патуваат секојдневно“, рече Груевски.Претседателот на ВМРО-ДПМНЕ уште додаде дека сите електрични автомобили ќе можат бесплатно да паркираат на било кој јавен односно државен паркинг во рок од 10 години односно до 2027 година, вклучувајќи подземен паркинг, катна гаража, обичен паркинг и зонски паркинг кој се наплаќа, и на сите вакви паркинзи ќе има обележани и резервирани посебни места резервирани за паркирање само за овие возила. „Истовремено ќе се предвиди  со закон како обврска  да се набават бавни полначи кои полнат до 4 часа,  во износ од 5% од паркинг местата, оние кои ќе се предвидени за електрични возила на сите јавни, приватните паркинзи, оние кои се под концесија, како и катните и подземни гаражи и зонското паркирање. Полначите кои ќе бидат инсталирани и паркинг местата кои ќе бидат обезбедени ќе бидат најатрактивните на паркиралиштето. Обврската за истите ќе биде покрај спорите полначи да набават и по најмалку два брзи полначи, при што енергијата односно струјата која ќе се троши ќе се наплаќа по цена која ќе ја утврдува Регулаторната Комисија за Енергетика, за да не дојде до злоупотреби“, рече Груевски.Исто така во 2017 година, со проектот се предвидува освен во Скопје, по најмалку еден брз полнач и два бавни да се инсталираат и на поголемите јавни паркинзи  во општините Битола, Штип, Велес, Прилеп, Кочани, Кавадарци, Гевгелија, Радовиш и Крива Паланка. Исто, во 2017 година ќе се предвиди на паркинзите на сите хотели со 4 и 5 ѕвезди да обезбедат по два бавни полначи за електричните возила. Дополнително ќе се обезбеди и законски пропис со кој ќе се воспостави обврска новите згради кои ќе се градат да предвидат инсталации за трофазни 8 часовни приклучоци во секое гаражно место во станбени згради.„Во прва фаза, на електричните автомобили ќе им биде дозволено да возат и во приоритетниот простор на сообраќајниците, на местата каде постои, а каде сега е дозволено движење на автобуси и такси возила, што значи дека електричните автомобили побрзо ќе се движат низ сообраќајот“, рече Груевски. Годишната регистрација на електричните возила, во делот за надомест за патишта ќе биде бесплатен во наредните 10 години. Тоа во просек ќе биде заштеда, во зависност од моќноста на автомобилот од 2.500 до 3 илјади денари секоја година. За полесна идентификација, електричните возила ќе имаат посебна регистарска табличка со јасно видлив дизајн и веројатно со посебна боја. Планот е во 2020 година да се постигне покриеност на сите патишта со по најмалку 1 брз полнач по бензинска пумпа. Градот Скопје во рамките на јавното сообраќајно претпријатие ќе отпочне со набавка на целосно електрични автобуси за потребите на Градот Скопје, со долгорочна тенденција електричните автобуси до 2030 година да сочинуваат повеќе од 50% од вкупниот број автобуси во градот. „Можам да информирам дека веќе Градот Скопје и градоначалникот Коце Трајановски ги започнаа првите иницијални разговори за набавка на нови 50 целосно електрични автобуси, односно 20 големи автобуси, дводелни со армоника зглоб на средината,  и во кои можат да влезат 150 патника, со дизајн на трамвај и 30 минибуси. Набавката би била повеќегодишна, а средствата би ги покривале заеднички владата и градот Скопје по половина. Ова е веќе усогласено меѓу градоначалникот на град Скопје и министерот за финансии, а плаќањето ќе е на неколкугодишни рати“, истакна Груевски. Според него, со набавката на 20 те дводелни зглобни електрични автобуси ќе се постигне истиот еколошки ефект како за изградба на трамвај кој чини неколкукратно поскапо, а и трамвајот и електричниот автобус имаа речиси нула загадување. Дваесте вакви автобуси ќе се обраќаат на линијата која беше предвидена за трамвај.Понатаму со проектот на ВМРО-ДПМНЕ се предвидува создавање на такси компании само со електрични возила. „Со измена на регулативата, ќе овозможиме такси компаниите и поединците таксисти  кои ќе имаат само електрични возила да бидат ослободени од сите давачки кон градот кои ги имаат останатите такси компании, како и да добијат неповратни 5.000 евра грант за секое ново електрично возило што ќе го набават. Полнењето со енергија на тие такси автомобили ќе биде бесплатно на сите државни паркиралишта во наредните 10 години“, рече Груевски.Како втора мерка, ВМРО-ДПМНЕ планира обезбедување на субвенции за вградување на плински систем во автомобилите. За таа цел секоја година, почнувајќи од наредната 2017-та година ќе се овозможат ваучери од 300 евра за набавка на плински уред кои ќе се распределат на јавен повик секоја година. „Со оглед на тоа дека бројните научни анализи покажуваат дека најголеми загадувачи на воздухот во категоријата автомобили се возилата со ЕУРО 0, ЕУРО 1, 2 и 3 стандард односно оние кои се произведени до почетокот на 2006та година, оваа мерка ќе се однесува само на автомобилите кои спаѓаат во групата на овие еколошки стандарди, останатите ЕУРО 4 и 5 ги запазуваат највисоките еколошки стандарди и се со ниво на загадување колку што се и автомобилите со вграден плински уред“, рече Груевски. /крај/со/ст