Основното јавно обвинителство Охрид отвори предмет по допрен глас за смртта на 66-годишната жена од Струга, која денеска почина од коронавирус.

Како што јави претходно Министерството за здравство, матичниот лекар за пациентката препорачал хоспитализација на Инфективното одделение во охридската болница, но пациентката и покрај упатувањето, не била хоспитализирана.

Таа и нејзиниот сопруг биле дијагностицирани позитивни на вирусот во текот на вчерашниот ден.

Обвинителството ќе преземе дејствија во насока на расчистување на причинско последичната поврзаност и за утврдување на фактите за евентуално постоење на кривична одговорност.​

Во текот на денешниот ден од Министерството за здравство најавија целосна ревизија на случајот за да се утврди дали имало лекарски пропуст.

Со одлука на Владата, од денеска за време на викендите е забрането движењето на сите граѓани од 16 до 5 часот.

Улиците се празни, а согласно одлуката, сите јавни установи и приватни компании што работат за време на викенд, се прилагодуваат на новите ограничувања за движење и со работа завршуваат најдоцна до 15 часот.

Производствените погони и фабрики во согласност со заклучокот од Владата, во време на забраната за движење може да се упатуваат на своите работни места исклучиво со посебни дозволи за вршење сменска и ноќна работа. Тоа се истите дозволи што се издаваат на образецот усвоен од страна на кризниот штаб, а ги издаваат самите одговорни лица на компанијата.

За време на полицискиот час, исклучоци има за земјоделците што одгледуваат раноградинарски култури и имаат неодложни активности поврзани со производство во оранжерии и пластеници.

Автобусите на ЈСП го променија возниот ред и сообраќаат за време на викендите до 16 часот, а промени од викендов има и кај возниот ред на железницата.

Општина Карпош организира хуманитарна акција за 30 најранливи домаќинства. Како резултат на кризната ситуација со „Ковид-19“, локалната самоуправа ќе обезбеди прехранбени продукти и средства за хигиена за најпогодените.

Оваа активност ќе се спроведе во соработка со Црвениот крст, чии волонтери ќе ги подготват социјалните пакети, кои ќе бидат набавени со буџетски средства на Општината.

Во видео обраќање, градоначалникот Стефан Богоев говореше за потребата од хуманост и солидарност во овие моменти.

„Помагавме за време на природни непогоди на нашите соседни земји, помагаме за лекување на наши сограѓани, а сега треба да се справиме со еден од најсериозните вируси во поновата историја. COVID – 19 го погоди целото општество! Но, коронавирусот не обедини сите, во општествена акција, секој да преземе мерки и активности“, рече Богоев.

Карпош традиционално организираше хуманитарна акција пред велигденските празници. Но, како резултат на пандемијата со коронавирус и избегнување на директен контакт меѓу граѓаните, при донирање на продукти, оваа година акцијата ќе се реализира на посочениот начин.
Акцентот ќе биде ставен на социјално – најзагрозените граѓани, кои впрочем се погодени и од коронавирусот.

Општината ги повикува сите граѓани, да се придржуваат до мерките за заштита од коронавирус и да ги почитуваат препораките од надлежните институции.