Македонија
За измена на законите на СЈО нема да се расправа, како ни за изборните единици

Пратениците на седницата во понеделник, што најверојатно ќе биде последна за овој состав, со оглед на тоа дека на дневен ред е распуштање на собранието, претходно не ги прифатија предлозите за дополнување на дневниот ред со измени на законот за изборни единици и со предлозите за заштита на сведоци и за Специјалното јавно обвинителство.
Имер Алиу, од ДПА рече дека не може да тежи гласот на еден граѓанин повеќе од гласот на друг граѓани заради тоа што припаѓа на друга етничка заедница, но дека владејачката партија на Албанците ДУИ, не направила ништо до сега тоа да се смени. Сепак, за овој предлог да се стави на дневен ред гласаа и пратениците на ДУИ, што ДПА го протолкува како валкан потег. Од друга страна, пак, Џеват Адеми, од ДУИ беше изненаден што пратениците на опозициската македонска партија СДСМ играла на картата да добие на претстојните предвремени парламентарни избори со гласови од пратеници Албанци, а гласале против овој предлог.Координаторот на пратеничката група на СДСМ, Горан Сугарески, предложи оваа седница да се состои од две точки, да се расправа за Буџетот за 2017 година и за распуштање на парламентот, а да се отфрлат точките за именување членови на Регулаторната комисија за енергетика, затоа што тој потег го протолкува како „вдомување на партиски кадри од владејачката ВМРО-ДПМНЕ“.Но, и овој предлог не беше прифатен од пратениците.Пратеникот и портпарол на СДСМ, Петре Шилегов, пред почетокот на седницата на прес -конференција изјави дека намерно во дневниот ред се додаваат нови предлози за да не стигне на ред точката за распуштање на Собранието.„Лицемерството нa ВМРO-ДПМНЕ немa грaници. Прaвaт сè зa денескa дa не се рaспушти Сoбрaниетo. Сиве oвие тoчки што денескa се стaвени нa дневен ред имaaт цел дa гo oдлoжaт рaспуштaњетo нa Сoбрaниетo. Секoе стaвaње нoви тoчки нa дневен ред, сaмo ги oдлoжувa тoчките зa рaспуштaње, a тoa гo пoкaжувa стрaвoт нa Груевски oд фер и демoкрaтски избoри“, изјави Шилегов.На крајот, пратеникот Павле Трајанов, предложи кога веќе се расправа и за друго во понеделник, тогаш не е доцна да се стават на дневен ред и измените на двата закони што ги бара Специјалното јавно обвинителство, за да може непречено да работи, измени за заштитените сведоци, со кои специјалната обвинителка ќе има автомонија врз одлуката и предлог-закон за измена на Законот за Јавно обвинителство за гонење кривични дела поврзани и кои произлегуваат од содржината на незаконското следење на комуникациите или Специјалното јавно обвинителство.На овој предлог на Трајанов, претседателот на Собранието Трајко Вељаноски укажа дека веќе еднаш го предложил и дека за редовна процедура има време до 5 ноември, но го стави на гласање, по што за малку не помина, 50 беа „за“, а 55 „против“./крај/мф/бб
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пендаровски: Невкусно е во време на криза да се покачуваат плати на функционери

Претседателот, Стево Пендаровски, изјави дека е невкусно во време на економска криза да се покачуваат платите кои се исплаќаат од државниот буџет.
Во врска со одлуката на Уставниот суд со која се укинуваат одредби од Законот за плата и други надоместоци на избрани и именувани лица, тој ја повика Владата да предложи законско решение со кое ќе се регулира прашањето преку намалување на бодовите.
Со одлуката на Уставниот суд за укинување на двата члена од Законот се овозможува зголемување на платите на избраните и именуваните лица за 78 отсто.
Законот се однесува и на примањата на премиерот, претседателот, собранискиот спикер, министрите, но и сите заменици министри, градоначалници, директори во државни фирми и агенции, а во групата спаѓаат и уставните судии.
Според пресметката на Синдикатот на управа, правосудни органи и здруженија на граѓани (УПОЗ), со оваа одлука платата на претседателот ќе скокне од 93.000 денари, на 165.000 денари. Платите на премиерот Димитар Ковачевски, и на претседателот на Собранието, Талат Џафери, ќе се зголемат на околу 2.500 евра, додека пак платата на министрите ќе изнесува околу 1.800 евра.
Македонија
Ковачевски стигна во Белград, со Вучиќ и Брнабиќ излезе на прошетка покрај Сава

Премиерот, Димитар Ковачевски, стигна во официјална посета на Србија и заедно со неговата српска колешка, Ана Брнабиќ и српскиот претседател, Александар Вучиќ излезе на прошетка покрај Сава.
„Мојата посета ја започнувам со пријатна заедничка прошетка низ убавото шеталиште покрај Сава во Белград. Споделивме размислувања за цврстото пријателство, соработката, партнeрството меѓу нашите две земји како и визијата за иднината на Западен Балкан“, напиша Ковачевски, споделувајќи и фотографии од прошетката.
Српскиот претседател, Александар Вучиќ, пак истакна дека при добра прошетка се прават најдобри планови и се водат најпријатните разговори.
„Додека со гордост му покажувам на мојот пријател Димитар Ковачевски колку е изграден Белград, разменуваме мислења за проширувањето на иницијативата „Отворен Балкан“, за „ЕУ-патот на нашиот регион“, за позицијата и перспективата на Западен Балкан на геополитичката карта на Европа и светот, но и за плановите за претстојните состаноци и поврзувањето на нови проекти“, напиша Вучиќ.
Во рамки на посетата, предвидено е Ковачевски и Брнабиќ утре да одржат заедничка пленарна средба, на која ќе се разговара за натамошното продлабочување на односите.
По пленарната средба, ќе биде потпишан меморандуми за соработка во рамки на иницијативата Отворен Балкан, а двајцата лидери ќе одржат и прес-конференција, соопшти Владата.
Македонија
(Видео) Ги снема бомбите, одекнаа лажни вести за киднапирање и труење ученици, казните споро патуваат

Стивнаа бомбите во училиштата, но почнаа да одекнуваат лажни вести, кои еднакво ги вознемирија учениците, наставниците, родителите и јавноста. Казните за лицата што ги раширија сè уште не се извесни иако помина една недела од лажната вест дека киднапер ги демне помалите деца во музичкото училиште во Скопје и две недели по лажната објава за средношколец отруен со дрога во пијалак послужен во кафуле, на која се надоврза и вест за десетмина починати средношколци во Градскиот парк.
Деманти, информативни разговори во полиција со креаторите на вестите и објаснување дека истрагата е во тек е засега институционалниот одговор на лажните вести, кои, за разлика од анонимните дојавувачи за бомбите, имаат конкретни творци. За нив, јавноста на социјалните мрежи, од каде што и излегоа вестите, отиде до таму, па побара и јавен линч, но Обвинителството сè уште не е на чисто дали тие воопшто ќе одговараат за кривично дело или за прекршок.
„Формално-правно во Кривичниот законик не постои експлицитно наведено дело ширење лажна вест онака како што го перципира јавноста тоа. Меѓутоа, законските норми во повеќе области даваат можност за одговорност за јавно изнесени тврдења. Доколку за еден настан постојат елементи што сугерираат дека со јавно изнесените лажни тврдења е извршен некој вид кривично дело, повредени се туѓи права, загрозена е нечија сигурност или е извршен друг вид кривично дело, таквиот настан добива кривично-правен третман. Такви се, на пример, лажните дојави за бомбите со кои се соочувавме во изминатиот период. Во друг сегмент, пак, постои прекршочна одговорност и таа целосно е во надлежност на Министерството за внатрешни работи, кое треба да донесе одлука дали постои таков вид одговорност. За дел од лажните објави, кои се однесуваат на клевета, што исто така е ширење одреден вид лажна информација за некого, постои граѓанска одговорност, односно се упатува на граѓанско-правна заштита“, вели Билјана Арсовска, портпаролка на Јавното обвинителство.
Обвинителите работат на утврдување на последиците што ги предизвикаа лажните вести за да утврдат конкретно за кое дело ќе ги гонат креаторите на последните две лажни вести. Предвид ќе биде земено и тоа што лажната вест дека средношколец од гимназијата „Георги Димитров“ во Скопје бил отруен од дрога ставена во пијалак во кафуле ја рашири пензионираната професорка од Филозофскиот факултет, Виолета Ачкоска. Нејзиното влијание врз јавноста е поголемо во споредба со она за втората лажна вест за киднапер што ги демне помалите деца во музичкото училиште „Илија Николовски-Луј“, што ја рашири Марко Дамевски, кој се претстави како загрижен родител.
„Во секој предмет одделно се цени дали и кои околности се исполнети, каков е ефектот од така изнесената лажна вест, како и последиците од таа лажна вес “, вели портпаролката Арсовска.
Министерството за внатрешни работи смета дека најголемата штета што ја направиле лажните вести е вознемиреноста на граѓаните.
„Штетата, пред сè, е во вознемиреноста на граѓаните, која, за жал, овие неодговорни лица ја создаваат од нив познати причини. Лицата што ги пласираа овие лажни вести подоцна во полициска станица кажуваат дека се каат, дека згрешиле, но ние немаме ништо од тоа каење. Тие мора да сносат одговорност затоа што на тој начин предизвикуваат тревога и вознемиреност кај граѓаните. Веднаш се повикуваат во полициска станица и се преземаат соодветни мерки затоа што, без оглед на тоа што ги избришаа објавите и самите кажаа дека направиле грешка, сепак предизвикаа вознемиреност кај граѓаните и тоа мора да биде како пример и за оние што ќе се обидат и во иднина“, вели Тони Ангеловски, помошник за односи со јавност на министерот за внатрешни работи.
Сега веќе избришаните објави и за лажниот киднапер и за наводното труење со дрога се раширија како експлозија на социјалните мрежи. Објавата на професорката Ачкоска за труењето за неколку часа доби илјадници реакции и стотици коментари, а остана на социјалните мрежи речиси цело деноноќие. Таа објавата ја стави непосредно по вистинскиот погреб на матурант од гимназијата „Георги Димитров“ за кој МВР утврди дека починал по пад од висина.
„Макфакс“ побара објаснување од професорката Ачкоска за причините поради кои се одлучила за објавата, но таа не одговори на пораките. Министерот за внатрешни работи, Оливер Спасовски, извести дека таа во полиција кажала дека нема информации за настанот, но го објавила она што ѝ го пренеле ученици. Сфатила дека направила грешка кога почнале да ја бараат новинарите, па го избришала статусот.
Објавата на Дамевски, пак, за киднапер во музичкото училиште стоеше на „Фејсбук“ само неколку часа. Ја тргна откога дозна дека не се работело за киднапер, туку за крадец, од кој училиштето решило да се одбрани со тоа што ќе стави негова фотографија на влезот со апел, ако некој го забележи, веднаш да пријави во полиција.
За разлика од професорката, Дамевски откога ја тргна објавата, им се извини на сите кај кои предизвикал непријатно чувство и паника. Ги замоли оние што ја споделиле неговата објава за киднаперот да го споделат и извинувањето. Меѓу нив имаше неколкумина пејачи, кои со дополнителни емоции зборуваа за лажниот настан во музичкото училиште, без да проверат дали е вистина.
За „Макфакс“ рече дека сè што имал да каже во врска со објавата, кажал во извинувањето.
И Обвинителството и МВР се едногласни во ставот дека за штетите што ги направија лажните вести креаторите мора да добијат казни како пример за сите што во иднина би имале слични објави.
„Она што би можеле да апелираме е поголема свесност и одговорност при изнесувањето какви било информации, особено преку социјалните мрежи, преку ‘Фејсбук’, поради нивното сè поголемо влијание во изминатиот период, со цел да се спречат ваквите штетни последици, кои може да имаат огромно влијание врз општата популација“, рече портпаролката Арсовска.
МВР, пак, апелира граѓаните да внимаваат кому му веруваат и да ги проверуваат изворите во институциите за да не подлегнат на лажни вести.
Овој текст е изработен во соработка со Институтот за комуникациски студии во рамките на проектот ,,Користи факти”, кој е поддржан од Британската амбасада во Скопје.