Ќе ја растресеме Македонија од главечки наопачки, ќе го распуштиме судството и ќе има реизбор во судството, најави лидерот на СДСМ, Зоран Заев во интервју за телевизија 24 вести.

На интервјуто Заев најави сигурна победа на СДСМ на изборите и им вети на граѓаните дека ќе бидат вратени сите пари што биле украдени, ако тоа се докаже во независна судска постапка.

„Ќе го распуштиме судството и ќе има реизбор во судството, нема од што да се плашат судиите. Сите што суделе чесно и по свое убедување тие ќе си бидат повторно судии, нека се плашат оние кои суделе согласно препораките на власта, сите оние кои се огрешиле пред законот или слично. Има многу убава практика во Европа како се прават тие реформи во судството на ваков начин со распуштање и реизбор. Најдобрата практика ќе ја примениме во Македонија согласно критериуми кој ќе ги знаеме, колку предмети биле вратени, потеклото на парите и имотот на секој судија, колку од овие судски пресуди коишто се донесени имало под влијание на власта или колку чесно судиите одлучувале“, рече Заев.

Тој најави дека сите институции кои се корективи на власта, Државниот завод за ревизија, антикорупциска, за антимонополска позиција, антидискриминаторска…, ќе ги водат независни експерти, за како што рече „да ја чуваат Македонија од СДСМ“.

Обвинителот, пак, ќе биде предлог на опозицијата. Лидерот на СДСМ очекува Специјалното јавно обвинителство (СЈО) во денот на изборите да им соопштат на граѓаните кој прислушувал во Македонија, какви докази има и каков обвинителен акт опстојува, дали прислушувале Зоран Заев и Зоран Верушевски или Никола Груевски и Сашо Мијалков./крај/мф/ффс