Во кумановското село Клечовце во саботата започна изградбата на магистралниот гасовод делница Клечовце – Блок станица 5, дел од проектот за изградба на Националниот гасоводен систем во Македонија. Првиот дел од гасоводот во должина од 61 километар ќе го гради руската компанија „Стројтрансгас”. Вредноста на проектот изнесува 75,7 милиони долари, од кои 60 милиони произлегуваат од подмирувањето на клириншкиот долг.
 

Изградбата на гасоводот, според владините претставници е до големо значење за Македонија, ќе овозможи гасот да биде достапен насекаде низ државата за граѓаните, компаниите. Премиерот Никола Груевски посочи дека тоа што со години се зборувало, сега почнува да станува реалност.

„Оваа делница е првата изградба затоа што ќе овозможи натамошен продор и ширење на целата гасоводна мрежа низ државата. Според планираното ќе бидат поврзани сите поголеми места со што гасот ќе стане достапен насекаде низ државата. Следните делници кои планираме да се градат се од Штип до Кавадарци преку Прилеп до Битола и Охрид, од Штип до Радовиш-Струмица-Гевгелија се до границата со Грција, од Струмица преку Ново Село до границата со Бугарија, од Скопје-Тетово-Гостивар преку Кичево -Струга до Ќафасан и границата со Албанија“, истакна премиерот Груевски.

Според Груевски, со изградбата на гасоводот Македонија добива пристап до стратешки ресурси поради што бенефитот е многукратен.

„Најважно од се е придобивката која ќе ја имаат граѓаните. Можноста да се користи гас во домаќинствата ќе значи помали сметки за струја и греење што директно ќе се одрази на буџетот на граѓаните. Придобивки ќе има и економијата. Употребата на поевтин енергенс ќе значи поголем профит на компаниите, поголема конкурентност на домашниот производ, подобри услови за водење бизнис, а тоа ќе допринесе и за нови работни места во државата“, потенцираше тој.

Капиталните инвестиции како изградбата на гасоводот, автопатите, железницата, аеродромите ТИР зоните, нови фабрики, хидроцентрали, училишта, булевари, спортски сали, според македонскиот премиер, се големи проекти и конкретни дела, резултат на посветената работа и труд на Владата.

Трасата на новиот гасовод од Клечовце, според проектот, треба да биде приклучок на постојниот гасовод Крива Паланка – Скопје. Оттаму ќе се движи кон Свети Николе, кое ќе биде заобиколено, а предвидено е да има приклучно место за крак кон градот и кон Велес. Понатаму гасоводот ќе поминува во близина на индустриската зона во Штип. За останатиот дел од трасата до Неготино и Кавадарци треба да се обезбедат дополнителни финансии. Освен Штип, со гасовод треба да бидат поврзани и Кавадарци, Прилеп, Битола, Тетово и Гостивар. Предвидено е гасоводот да се поврзе и со термоелектраната „Неготино“ која од мазут ќе почне да функционира на гас./крај/мф/бс

Извор: Макфакс