Во присуство на премиерот Никола Груевски и членови на неговата влада, во понеделникот започна реконструкцијата и рехабилитацијата на делницата Велес – Катланово од автопатот „Александар Македонски“ во должина од 23,5 километри, инвестиција којашто ќе чини 5,7 милиони евра.
 

Оваа делница е една од најупотребуваните и најфреквентните во земјата и претставува исполнување на ветувањата дадени на изборите, истакна во своето обраќање на отпочнувањето на работите претседателот на владата Никола Груевски.

Претходно во 2012 година заврши целосната реконструкција на патниот правец од Катланово кон Велес

Како што претходно информираше Владата, 85 отсто од средствата за реконструкција на делницата Велес-Катланово во должина од 23,5 километри и вредност од близу 5,7 милиони евра се обезбедени преку грант од ИПА компонентата за регионален развој, а 15 проценти се одвоени од Буџетот на државата. Предвидениот рок, согласно договорот за изведување на градежните работи со фирмата „Трабак“, изнесува 365 дена.

„Долгогодишното користење и големиот број поправки во минатото имаат оставено бројни лузни на патот и севкупно лоша слика за земјата. Реконструкцијата на овој патен правец беше повеќгодишно барање на нашите граѓани. Ние ветивме дека ќе го направивме патот и си останавме доследни на ветувањето“, порача Груевски.

Премиерот, исто така, посочи дека активностите треба да завршат за една година, а самиот зафат ќе овозможи зголемување на безбедноста во сообраќајот, намалување на оштетувањата на возилата, намалување на времето на патување, а тоа ќе претставува и плус за „Коридорот 10“ кој минува низ Македонија. Потсети дека на споменатиот коридор изминативе години во рамки на владините проекти изградени се делницата Табановце-Куманово, целосно е реконструирана делницата Катланово-Велес, а во моментов се гради автопатот Демир Капија-Смоквица, а за една годна се планира и реконструкција на делницата Смоквица-Гевгелија.

„Сево ова јасно говори за нашите намери и стратегија да создадеме една нова слика за коридорите кои минуваат низ нашата земја и севкупна нова слика за македонските патишта. Таквата стратегија активно ја реализиравме во изминатиот период, а оваа година започнавме со изградба на двата нови автопата Скопје – Штип и Кичево – Охрид, како и со повеќе други проекти кои паралелно се работат. Со тоа реализацијата на нашите намери само добива на поголема динамика“, рече премиерот Груевски.

Вицепремиерот и министер за финансии Зоран Ставрески, пак, се задржа на фактот дека вложувањата во инфраструктурата се дел од здравите економски политики, а почетокот на работите на оваа делница, која, како што рече, е крвотокот на македонската економија, е дел од еден поголем инвестициски зафат.

„Изминатите години главните вложувања на владата во патната инфраструктура беа во изградба на нови регионални и локални патишта. Во овој мандат фокусот е ставен на изградбата на автопатите за коишто во изминатиот период се подготвуваше документацијата за да се започне со нивна изградба. Се наоѓаме во екот на еден инвестициски циклус којшто надминува една милијарда евра од кои 790 милиони евра се за завршување на трите автопати Демир Капија-Смоквица, Миладиновци-Штип и Кичево-Охрид. Другиот дел се регионални и локални патишта кои ќе бидат поддржани со средства од Светската банка и Европската банка за обнова и развој (ЕБРД)“, рече Ставрески.

Министерот за транспорт и врски Миле Јанакиески истакна дека станува збор за рехабилитација со која е предвидена обнова и замена на асфалтот по целата должина, поставување на нови банкини и заштитници, мрежа за заштита од одрони, нова хоризонтална и вертикална сигнализација. Нагласи дека со завршувањето на градежните активности кои се во тек на делниците Демир Капија-Смоквица, Миладиновци-Штип и Кичево-Охрид, Македонија ќе добие 123 километри нова, модерна и безбедна автопатска мрежа која ќе придонесе за македонската економија и за перспективите на земјата../крај/мф/ди

Извор: Макфакс