Во насока на унапредување на инфраструктурата и подобрување на условите за движење на граѓаните, Град Скопје започнува со реализација на уште еден значаен проект, информираат од Град Скопје.

„После неколку децении, започнуваме со целосна реконструкција на улицата „Фрањо Клуз“ (Црвена Вода 7) во Аеродром. Денес, заедно со градоначалникот Дејан Митески и новиот директор на ЈП „Улици и патишта“, Борис Настов, го означивме почетокот на овој значаен инфраструктурен зафат. „Фрањо Клуз“ е улица која игра клучна улога во урбаниот дел на општината, сообраќајница што секојдневно ја користат илјадници граѓани“, истакна градонаќалникот на Скопје, Орце Ѓорѓиевски во врска со започнувањето на целосната реконструкција на улицата „Фрањо Клуз“ во општина Аеродром.

Станува збор, како што рече за улица која со години е оставена на забот на времето, небезбедна, оштетена и запоставена.

„Денес ставаме крај на таа слика. Ова е улица што одамна го заслужуваше вниманието, а денес тоа конечно и го добива. Со овој зафат, улицата ќе добие двослоен асфалт, нови рабници и уредени тротоари, создавајќи безбеден, чист и функционален простор за сите минувачи. Ќе изградиме улица која ќе биде пример како треба да изгледаат современите градски сообраќајници – уредени, безбедни и наменети за секого. Ова е само почеток. Следуваат уште поголеми проекти за нашето Скопје. Ќе работиме во секоја општина, секое маало, секоја населба. Скопје заслужува“, изјави Ѓорѓиевски.

Министерот за европски прашања, Орхан Муртезани, денеска се обрати на заедничката седница на Комисијата за европски прашања и Националниот совет за евроинтеграции во Собранието на Република Северна Македонија.

Во своето излагање Муртезани истакна дека новиот Годишен извештај на Европската комисија за Северна Македонија за 2025 година, претставува јасен пресек на досегашните постигнувања и на областите во кои реформите треба да се засилат. Тој нагласи дека државата задржува стабилно и добро ниво на подготвеност во низа клучни поглавја, но дека динамиката на напредокот мора да биде поенергична, особено во сегментот на владеењето на правото.

Муртезани посочи дека оваа Влада влегува со јасна политичка волја да ги конкретизира реформите, да го забрза донесувањето на клучните закони и да ја претвори подготвеноста во реални резултати. Тој додаде дека Реформската агенда, скрининг извештаите и Планот за раст ја даваат целосната архитектура за напредок, а задачата на институциите е да обезбедат јасен ритам и доследна имплементација.

Претседателот на СДСМ и на Националниот совет за евроинтеграции, Венко Филипче, на денешната седница на Советот упати сериозни критики за состојбата во правосудството, посочувајќи дека Европската комисија јасно укажува на тоа дека независноста на судството во државата е нарушена и со тоа директно е загрозена неговата независност и кредибилитет.

„Генералната независност и финансиска автономија на правосудството се поткопани со вмешување и притисок од други гранки на власта за притисок врз членовите на судскиот совет“, рече Филипче.

Филипче исто така нагласи дека во извештајот Европската комисија се задржува на три клучни препораки кои Владата мора итно да ги исполни, а тоа се донесувањето на Закон за парнична постапка, согласно европското законодавство, закон кој се носи со двотретинско мнозинство и кој беше во Собраниска поставка во претходниот Собраниски состав и забрзана имплементација на стратегијата за реформи во судството.

Дополнително, тој предупреди дека Европската комисија бара и доследна примена и унапредување на АКМИС-системот за електронско управување со судските предмети, бидејќи токму транспарентното распределување на предметите е основен предуслов за независно судство.

„Нема напредок ниту во борбата против корупцијата, според Европската комисија таа станува доминантна во многу области и претставува предмет на сериозна загриженост. Јавното обвинителство треба да се зајакне кадровски во истражните центри и да ја подобри ефикасноста на работата во случаите на висока корупција. Клучни препораки за борба против корупција“, рече Филипче.

Филипче зборуваше и за корупцијата која, како што кажа, станува доминантна во многу области и претставува предмет на сериозна загриженост по што ги кажа и клучните препораки кои Европската комисија ги издвои и кои македонското законодавство треба да ги донесе.

„Донесување на нов кривичен закон за ефикасна борба против корупцијата. Подобрување на имплементацијата на антикорупциска стратегија, споредување на препораките на Греко и соодветна подготовка на нова антикорупциска стратегија, 2026-2030 години. Понатаму, доволно човечки финансиски ресурси на јавното обвинителство и сите негови структури“, рече претседателот на Националниот совет за евроинтеграции.

На крајот, Филипче оцени дека пораките од извештајот се јасни и алармантни и тие кажуваат дека реформите за нашата држава се блокирани. Со ова, тој уште еднаш ги повика институциите да престанат со политички влијанија и да почнат со реални, суштински реформи во интерес на граѓаните и европската иднина на државата.