Премиерот Христијан Мицкоски најави дека следната недела ќе има уште една, завршна средба со лидерот на Алијанса за Албанците, Арбен Таравари. Ќе го покани на средба за да му посака добро здравје.

„Мислам дека господинот Таравари и неколкумина околу него се одлучени да се вратат во прегратките на Али Ахмети и Демократската унија за интеграција. Јас можам само да му поскам среќа и се надевам дека ќе имаме една завршна средба во текот на следната недела на која ќе сумираме што е тоа што е направено, и да му посакам, пред се добро здравје,тоа е она што на сите нам ни е најважно. Морам да кажам дека најмалку што очекував е да се врати назад во прегратките Али Амети и останатите, но тоа е сепак негова одлука и, убеден сум, одлука на малкумина, тоа не е одлука на членството на Алијанса за Албанците и на голем дел од луѓето кои се дел од оваа Влада. Чесно беше и доблесно самиот тоа да го направи, да не ги влече за нос Владата и граѓаните, но ете полека но сигурно станува јасно дека тој се враќа назад во прегратката на сите оние кои што повеќе од две децении ја пустошеа, ја криминализираа, ја ограбуваа и ја фрлија Македонија на колена. И тоа важи за сите граѓани без разлика дали се Македонци, Албанци, Турци, Роми, Власи, Бошњаци, Срби или останати“, рече премиерот Мицкоски по денешниот увод во градежните работи за изградба на градинка во скопско Инџиково.

Што значи излегувањето од Владата на Таравари, Мицкоски вели дека времето ќе покаже и уверува дека Владата е стабилна и фокусирана на проекти и борба против криминалот и корупцијата.

Пратеникот од ВМРО-ДПМНЕ, Бране Петрушевски обвини за нов скандал со дрога на активист на Социјалдемократскиот сојуз на Македонија.

„СДС не може глава да крене од скандали со дрога на нивни членови. Нов скандал на повидок од страна на член на СДС, кој пред 2 дена бил фатен со дрога. На 09.05.2025г, од информации добиени од свиркач, бил уапсен Слаѓан Марковски од Гостивар, активист на СДС, кој бил фатен со 12 пакувања кокаин и кеш. Ова е веќе сериозен проблем во редовите на СДС. По Јон Фрчковски, Андон Стојков, сега повторно член на СДС, Слаѓан Марковски, фатен со 12 пакувања дрога“, рече Петрушевски.
На прес-конеренција денес Петрушевски јавно го праша лидерот на СДСМ, Венко Филипче дали е се откаже од Слаѓан Марковски, Андон Стојков и Јон Фрчковски.
„Македонската јавност има право да знае,  а легитимно е да прашаме, дали Филипче има некаква поврзаност со членовите кои беа фаќани со дрога изминатиот период? Дали можеби и тој е влезен во некоја шема со дилање на дрога?“, праша Петрушевски.

Владата помага и на повредените од трагедијата, и на оние кои имаат некаква трауми од истата, и на оние кои за семејства кои за жал изгубија свој близок од истата, велат од ВМРО – ДПМНЕ по повикот од СДСМ да го поддржат законот за Кочани.

„Владата ја стави на располагање целата државна помош којашто им е потребна на оние кои се со последици од трагедијата. И тука нема да застанеме, затоа што ова е процес којшто ќе трае со години, а Владата нема да ги заборави овие граѓани, како што СДС и ДУИ ги заборавија повредените и загинатите од Ласкарци, Беса транс, Модуларна болница, Онкологија, КОВИД кризата и сите оние коишто не добија ниту правда, ниту одговорност, ниту помош од државата“, велат од ВМРО – ДПМНЕ.

Законот кој го предлага СДСМ, од ВМРО-ДПМНЕ потсетуваат дека е предводен од Филипче и Спасовски, луѓето кои беа директно одговорни за сите трагедии во изминатиот период, а за жал, македонската јавност не доби никакви одговори.

„СДС, Филипче и Спасовски, треба да се засрамат и да престанат да глумат загрижени, и да прекинат да ја политизираат трагедијата во Кочани.

Повторуваме уште еднаш, одговорност и правда ќе има!“, велат од ВМРО-ДПМНЕ.

На прес- конференција денес, СДСМ уште еднаш ги повика пратениците од ВМРО-ДПМНЕ да го поддржат законот за Кочани за да покажат дека се тука за семејствата на загинатите.