Забрана за тешки товарни возила е воведена на патниот правец од крстосницата Маврово кон Дебар и обратно, информираат во вонредно соопштение од Авто-мото сојузот на Македонија (АМСМ).

Од таму нагласуваат дека ваквата забрана се воведува поради врнежи од снег.

Рамноправен развој без оглед на етничката припадност, еднакви можности и партнерско управување со Владата, се дел од заложбите на политичките партии СДСМ и Беса, кои вчера ја потпишаа декларација за заеднички настап на предвремените парламентарни избори.

Во декларацијата се наведува дека е потпишана во духот на градење доверба и заедничка европска иднина, како и почитување на граѓанските вредности што ги имаат сите етнички заедници во земјата.

„Обете страни, СДСМ и Движењето Беса, надминувајќи ги сите бариери и преземајќи ја храброста да ги примовираат европските вредности, на денешен ден, преку оваа Декларација постигнуваат историски договор во воспоставувањето на политичко партнерство“, се наведува во декларацијата.

Двете партии се залагаат за зајакнување и негување на вредностите меѓу етничките заедници во земјата, рамноправен развој во сите сфери, без оглед на етничката припадност. Како посебна точна наведено е давањето на еднаква можност на секој професионалец и вклучување на владините механизми за создавање подобри услови, со цел иднината да ја градат во државата.

Во декларацијата наведена е и заедничката борба против криминал и корупција на сите нивоа на власт, како и обезбедување реформи во судството, со цел, како што е наведено, да не се дозволи невини луѓе да бидат затворени, додека криминалците се амнестираат од „судството што инсталирало режим во минатото“.

Интеграцијата во ЕУ останува единствена опција, а наведено е и дека управувањето на Владата ќе биде врз основа на целосно партнерство и заеднички интерес.

„Сè што е поврзано со управувањето на Владата од 2020-2024 ќе биде изградено врз основа на целосно партнерство и заеднички интерес, истовремено почитувајќи ги уставните и законските одредби за да се гарантира еднаквост, екомски развој, стабилност и иднина за сите граѓани на оваа земја“, се наведува во декларацијата.

Документот треба да биде предложен за одобрување на највисоките органи во двете политички партии.

Во насока на натамошна превенција од коронавирусот, Владата го прифати предлогот на Управувачкиот комитет за координација и управување во системот за управување со кризи и донесе заклучок да им се препорача на организаторите да ги откажат сите јавни собири до 6 март.

Препораката на Владата се однесува на поголемите јавни собири кои се планирани во овој период, како што се Струмичкиот карневал, карневалот „Прочка“ во Прилеп“ и сите слични.

Владата им препорачува на организаторите на спортските настани натпреварите во утврдениот период до 6 март да се играат без публика.

Истата препорака на Влада се однесува и на сите други поголеми забавни и културно-уметнички манифестации.

Владата на денешната седница препорача сите организатори на други јавни настани своите одлуки да ги донесуваат врз основа на консултација и мислење на Комисијата за заразни болести.

Владата ја задолжи Комисијата за заразни болести да продолжи да ги известува Владата, Управувачкиот комитет за координација и управување во системот за управување со кризи и Кризниот штаб, за епидемиoлошката состојба со коронавирусот, за да се планираат идните чекори во превенцијата и справувањето со ситуацијата.

На оваа своја седница Владата ги задолжи Пазарната инспекција и Агенцијата за лекови и медицински средства на Република Македонија (МАЛМЕД) да направи увид и контрола на залихите на заштитните средства за заштита од пренесувањето на вирусот во аптеките и доколку утврди неосновано покачување на цените да преземе мерки соодветно за законските прописи и овластувања.

Владата го задолжи Министерството за внатрешни работи до наредната седница да достави информација како се спроведуваат мерките што ги одреди Кризниот штаб.

Како еден од заклучоците на оваа седница е и одлуката да се воспостави соработка со Црвен крст на Република Северна Македонија и да се повикаат нивните волонтери да асистираат на граничните премини во анкетите на лицата што влегуваат во земјата во соработка со припадниците на граничната полиција.

На денешната седница Владата ја разгледа информацијата за последиците од невремето со силниот ветер на 26 февруари и донесе заклучок да ги повика Министерството за внатрешни работи и Јавното обвинителство да покренат постапки за одговорноста за рушењето на фасадите и другите делови од јавните објекти, врз основа на увидот на стручните служби што го направија на оштетувањата на зградите на МЕПСО, на Владата на Северна Македонија, како и на другите објекти.