Целиот регион се вакцинира, сите нарачуваат милионски количини, само Заев се радува на 8 илјади вакцини, кои ги добива како донација, наместо да се фати за работа и да набави вакцини за сите, велат од опозициската ВМРО-ДПМНЕ.

Партиската реакција следува откако здравствените власти соопштија дека денеска се регистрирани 21 починат пациент како последица од Ковид-19.

„Тоа се 21 семејство завиени во црно. Тоа се 21 лице, чии животи можеа да бидат спасени ако Заев и Филипче набавеа вакцини навраме“, стои во партиското соопштение.

Во него се додава дека секој поминат ден без вакцини е уште еден ден на загубени човечки животи, кои можеле да бидат спасени.

„Стоилковиќ рече дека ѝ се достапни 90.000 кинески вакцини на Владата за брза имплементација. Зошто досега Владата и Филипче не презеле никакви активности за набавка на вакцините? Заев и Филипче мора да одговараат за тоа што досега ја лажеа јавноста оти вакцините само што не стигнале. Вакцини нема, а сите во регионот се вакцинираат“, велат од ВМРО-ДПМНЕ.

И Стево Пендаровски стана дел од пазарџиско-политичката операција наречена попис по стандарди на Зоран Заев, велат од ВМРО-ДПМНЕ, откако вчера претседателот го потпиша Указот за прогласување на Законот за попис на населението.

Според опозицијата, наместо реална статистичка слика, очигледно власта е решена да спроведе попис без јасна методологија и без општествен консензус.

„Целта е јасна, Заев прави политички договор за кој веќе почнаа да се шпекулираат бројот на население, проценти и резултати, на кој само треба да се стават врзаните потписи на директорот и заменик-директорот на Заводот за статистика. Тоа е класична политичка операција. Дека ова е политика, а не статистика говори и фактот што целата операција се прави во време на епидемија, кога голем број земји од регионот и Европа ги одлагаат своите пописи за да ги заштитат пред сè своите граѓани, но и да добијат прецизна слика. Власта во Македонија напротив, брза, со цел да го скрие својот политички договор“, смета ВМРО-ДПМНЕ.

Oд партијата велат дека од ваквиот насилен попис во кој биле одбиени сите конструктивни предлози на опозицијата, штета ќе имаат сите граѓани, а најмногу Македонија.

ВМРО-ДПМНЕ додава дека е потребно да биде спроведен попис, но како статистичка а не политичка операција, па затоа тие ќе почнат со собирање  граѓански потписи со цел поништување на Законот.

Штетни се обидите за наметнување дебата колку проценти на која било етничка заедница, велат од владејачкиот Социјалдемократски сојуз на Македонија, коментирајќи дека пописот ќе ја регистрира реалноста таква каква што е, а резултатите нема да значат суспендирање нечии права.

СДСМ е дециден дека пописот на населението е од клучно значење за развојот на државата и граѓаните, а по него ќе може да се креираат мерки и политики кои одговараат на вистинските потреби на народот – економски, здравствени, образовни, социјални, културни, со што ќе се унапредат и нивните права и придобивки.

„Немањето попис цели две децении е штетно. ВМРО-ДПМНЕ го прекина последниот обид за попис во 2011 и тоа го направи откако потроши милиони евра народни пари, а сега, како и при сите клучни работи во државата, бара причини за блокади и опструкции и се обидува да го саботира целиот процес. Губитникот Христијан Мицкоски и неговата ВМРО-ДПМНЕ делуваат спротивно на интересите на граѓаните и на државата, шират невистини и оспоруваат резултати на уште неспроведен попис и ги повикуваат граѓаните на прекршување на законите“, велат од СДСМ преку соопштение.

Партијата појаснува дека пописот е статистичка операција, која ќе ја реализира Државниот завод за статистика, според сите европски и меѓународни стандарди.