Горан Ѓорѓиев именуван за регионален директор на Европскиот Центар за поддршка на светското извидништво.

„Сојуз на извидници на Македонија со големо задоволство информира дека Горан Ѓорѓиев од Македонија е именуван за регионален директор на Европскиот центар за поддршка при Светската извидничка организација. Неговото назначување е по одлука на Генералниот секретар на Светската извидничка организација, донесена по конкурентен меѓународен процес на селекција со интерес од цела Европа и пошироко“, се наведува во соопштението.

Ѓорѓиев има повеќе од 15 години искуство во стратешко лидерство, организациски развој и младинска работа во извидништвот, на национално, регионално и глобално ниво.

Од 2019 година, тој работи во Светското извидничко биро, каде што извршуваше повеќе високи раководни функции, последно како Директор за стратешка координација и организациски развој за Европа, обезбедувајќи поддршка за 47 национални извиднички организации воЕвропскиот регион.

Горан своите основи во извидништвото ги добива во својот одред Извиднички Одред Гоце Делчев од Свети Николе. А пред неговиот ангажман на светско ниво, осум години (2010-2018) Горан Ѓорѓиев ја извршуваше улогата на Генерален секретар на Сојуз на извидници на Македонија, каде што раководеше со извршната канцеларија и ги водеше организациските и програмските приоритети на извидништвото во земјата.

Во овој период, тој активно се вклучува во организација на бројни национални и меѓународни извиднички кампови, смотри, натпревари и обуки, како и во едукација и менторство на стотици млади извидници, водачи и волонтери низ целата држава. Покрај работата со млади на терен, Ѓорѓиев даде значаен придонес и во развојот на младински политики и граѓанско учество, меѓу кои и учеството во процесите за креирање и воспоставување на Националниот младински совет на Македонија.

Тој исто така работеше на развој и имплементација на програми за младинско лидерство, градење капацитети и меѓународна соработка.

За неговото именување, Дијана Слабу, актуелна претседателка на Европскиот извиднички комитет, истакнува: „Горан носи богато искуство во стратешко лидерство и организациски развој, заедно со длабоко разбирање на извидништвото на национално, регионално и глобално ниво. Со нетрпение очекуваме да работиме со него на следното поглавје од развојот на извидништвото во Европа.“

Новата функција Горан ја преземаа денес, при што ќе соработува тесно со Европскиот извиднички комитет и светското раководство на организацијата, со цел понатамошно зајакнување на поддршката за националните извиднички организации и зголемување на влијанието на извидништвото низ Европа.

„Именувањето на Горан Ѓорѓиев на оваа позиција претставува значајно меѓународно признание, имајќи предвид дека станува збор за висока раководна функција во една од најголемите и највлијателни младински организации во светот, со над 50 милиони членови глобално. Фактот што за првпат еден македонски кадар ја презема оваа улога е силна потврда за квалитетот, искуството и капацитетите што произлегуваат од македонското извидничко и младинско движење“, велат од Сојузот на извидници на Македонија.

На 30 јануари, со почеток во 20:00 часот, во Македонската филхармонија, Националниот џез оркестар ќе ја отвори концертната сезона со концерт насловен National Jazz Orchestra with String Ensemble.

На концертот, Националниот џез оркестар ќе настапи заедно со гудачки ансамбл составен од музичари на Националната опера и балет. Во овој редок и внимателно обликуван спој, оркестарскиот звук се проширува и продлабочува, создавајќи нова звучна димензија.

Под диригентство на маестро Џијан Емин, ќе бидат изведени авторски композиции на Трајче Велков, Гордан Спасовски, Зоран Костадиновски, Џијан Емин, Гоце Стевковски, Сашко Николовски и Георги Шарески. Како солисти ќе настапат Кирил Кузманов на саксофон и флејта, како и Бојан Цветковиќ на пијано.

Како гостин на вечерта ќе настапи Георги Шарески — гитарист и композитор, чиј израз и музички сензибилитет природно се впишуваат во звучниот карактер на оваа концертна целина.

Со овој концерт, Националниот џез оркестар ја започнува новата концертна сезона, поканувајќи ја публиката на вечер во која музиката зборува сама за себе и нè носи надвор од секојдневниот ритам.

Билетите за концертот се достапни онлајн на платформата MKTickets, како и на нивните продажни места.

На 23 јануари 2026 година (петок), во периодот од 12:00 до 15:00 часот, во аулата на ОУ „Лазо Ангеловски“, ќе се одржи забавниот културно-уметнички настан „Тоше те сакаме“, посветен на ликот и делото на Тоше Проески.

Целта на настанот е преку уметнички, образовни и музички содржини да се одбележи трајната вредност на делото на Тоше Проески, неговата хуманост и влијанието што го има врз младите генерации и македонската културна сцена.

Во музичкиот дел од програмата ќе настапат: Огнен Здравковски, Марија Спасовска, Тамара Волческа, Владимир Поповски, Ивона Јо, Мартинијан Кириловски, Наде Талеска, Lili Acoustic и Васил Ангелов, кои со свои интерпретации ќе му оддадат почит на безвременското музичко наследство на Тоше.

Настанот „Тоше те сакаме“ претставува силен пример за заедништво меѓу граѓаните, локалната самоуправа и образовните институции, обединети околу вредностите што Тоше Проески ги живееше и ги пренесуваше преку својата музика – љубов, човечност и искрена емоција.

Организаторите упатуваат отворена покана до медиумите и јавноста да присуствуваат и заедно да оддадат почит на уметникот кој ќе живее вечно во нашите срца.