Црвена звезда го направи најголемото изненадување во 12. коло од Евролигата, славејќи на гости кај Армани Милано со 77:67, сврзувајќи трета победа едноподруго во најсилното европско кошаркарско натпреварување.

Од почетокот Звезда не дозволи Милано да направи голема предност, пред во второто полувреме да игра многу подобро и да стигне до победа. Лоренцо Браун ги предводеше Звезда со 21 поени и 7 асистенции, додека Барон додаде 17 поени. Чако Родригез беше најефикасен за Армани со 14 поени.

Најинтересно вечерва беше во Москва, каде што актуелниот шампион ЦСКА дури по продолжението со драматична тројка на Мајк Џејмс стигнаа до 85:82 победа над Жалгирис Каунас. Литванскиот клуб имаше пет порази едноподруго пред тешкото гостување во Русија, но започнаа со одлични 17:9 по првата четвртина.

ЦСКА, сепак, се созеде и во третата четвртина имаше предност од +8, пред гостите да израмнат во последните четири секунди на 82:82, пред во продолжението свое шоу да има Џејмс. Тој го заврши мечот со 19 поени, а Стрелникс имаше 20.

ЕВРОЛИГА, 12.КОЛО

ЦСКА Москва – Жалгирис Каунас 85:82 (9:17, 23:14, 19:19, 18:19, 16:13)

Макаби Тел Авив – Баерн Минхен 77:55 (22:18, 19:8, 12:21, 24:8)

Армани Милано – Црвена звезда 67:77 (18:20, 22:19, 10:18, 17:20)

Реал Мадрид – Валенсија 111:99 (30:29, 23:20, 27:21, 31:29)

Фреди Љунгберг вети дека ќе го врати „духот“ во тимот на Арсенал откако стана привремен тренер на „топчиите“ по отпуштањето на Унаи Емери, но имаше „пеколно“ деби на домашен терен, губејќи со 1:2 од тимот на Брајтон.

Мечот за Љунгберг дојде неколку дена по 2:2 ремито на гости кај Норич, и лошата низа на резултати значи дека Арсенал нема победа во последните шест меча во Премиер лигата и се наоѓа на 10. место на табелата.

Адам Вебстер им донесе водство на гостите во 36. минута, резултат со кој се отиде на полувреме, но Арсенал успеа да израмни преку Александер Лаказет во 50-тата минута за да ги крене надежите на навивачите за победа. Меѓутоа, Нил Мопе во 80-тата минута со убав гол со глава донесе три поени за Брајтон, кои сега се на 13. место на табелата со само еден поен зад Арсенал.

Евертон го отпуштија менаџерот Марко Силва по само 18 месеци на чело на клубот од „Гудисон парк“ по катастрофалниот старт на сезоната во Премиер лигата по кој „карамелите“ паднаа во зоната за испаѓање по болниот 5:2 пораз во градското дерби од Ливерпул.

Поранешниот напаѓач на Евертон, и тренер на првиот тим, Данкан Фергусон ќе биде привремен тренер за дуелот со Челси во сабота. Сите англиски медиуми тврдат дека поранешниот тренер Дејвид Мојс ќе се врати на чело на клубот, шест и пол години откако си замина за да стане краткотрајно тренер на Манчестер јунајтед.

„Главниот акционер Фархад Мошири, претседателот Бил Кенрајт и бордот на директори сакаат да му се заблагодарат на Марко Силва за неговите услуги и да му посакаат среќа за во иднина. Данкан Фергусон ќе биде именуван за тренер за дуелот со Челси, а клубот сака да постави нов постојан менаџер што е можно побргу“, се вели во соопштението на клубот.

Евертон во последните години инвестираше многу во фудбалери, носејќи ги Алекс Ивоби, Моисе Кин, Жан-Филип Гбамин и Андре Гомеш во својот тим во обид да се обезбедува попостојан престој во Европа. Силва лани ги предводеше до осмото место на табелата, но оваа сезона, тие имаат само четири победи и дури осум порази во последните 11 меча.

🔵 | Everton Football Club can confirm that manager Marco Silva has left the Club. #EFC pic.twitter.com/R2JqAMBdu2

— Everton (@Everton) December 5, 2019