Спорт
Во понеделник почнува тенискиот турнир во Вимблдон
![](https://makfax.com.mk/wp-content/uploads/2024/06/Вимблдон.jpg)
Од специјалниот известувач од Вимблдон
Во понеделник во Лондон почнува 137-то издание на најстариот тениски турнир Вимблдон, кој, многумина тенисери, го сметаат и за неофицијално светско првенство. Во наредните две седмици, најдобрите светски тенисери и тенисерки ќе се обидат да триумфираат во некоја од петте категории: машка, женска, игра во двојки и микс двојки.
После многу години доминација на големата тројка Новак Ѓоковиќ, Рафаел Надал и Роџер Федерер, овој пат за главен фаворит се смета Италијанецот Јаник Синер. Повредата на коленото на Роланд Гарос и операцијата која потоа уследи, одат во прилог на сомнежот дека Ѓоковиќ е недоволно подготвен да ја освои својата осма вимблдонска титула. Сепак, во полза на Србинот оди релативно лесниот жреб, во кој во првата седмица од турнирот може да се сретне со двајца квалификанти или еден учесник со вајлд карта.
Бранителот на титулата и победникот на овогодинешниот Роланд Гарос, Шпанецот Карлос Алкарас, исто така, е фаворит на турнирот, меѓутоа за тоа да го оствари ќе мора да победи во евентуалното полуфинале со Јаник Синер, до кое ако дојде, тоа ќе се смета за финале пред финалето.
Наспроти очекувањата и испланираниот пат до завршницата за главните фаворити, како и секоја година, можни се изненадувања и некој од фаворитите да биде елиминиран од послабо рангираните тенисери, и тоа уште во првата седмица од турнирот. Такви попатни „нагазни мини“ особена се закана за главниот фаворит Синер, кој во однос на конкурентите Ѓоковиќ и Алкарас има најтежок распоред и го очекува во осминафиналето евентуален натпревар против четиринаесето рангираниот Американец Бен Шелтон, а во четвртфиналето, евентуално против петорангираниот, Русинот, Даниел Медведев. Доколку Италијанецот успее да ги помини сите искушенија и го осови турнирот на најдобар начин ќе потврди дека во моментов е најдобар тенисер на светот, и со реални шанси така да ја заврши и годината.
Во женска конкуренција, неизвесноста, најверојатно, ќе биде присутна до самото финале, бидејќи нема изразит фаворит. Првопласираната на ВТА листата Ига Швојтек од Полска, е номинален фаворит, но никако во кариерата не успева да пронајде игра за тревната подлога, а со тоа и вимблдоснкиот грен слем ѝ останува неостварена желба. Оттука, можно е Елена Рибакина од Казахстан да го повтори успех од 2022 или Ирина Сабаленко од Белорусија, која е гладна за триумф на Вимблдон. Во трката за победник можат да се вмешаат и Онс Жабур од Тунис, која, по двете последователно изгубени финалиња во Вимблдон, се надева на трета среќа, потоа Коко Гаф од САД или сосема некоја друга.
Оваа година наградниот фонд е зголемен на рекордни 50 милиони фунти (околу 59 милиони евра), што е за 11,9 отсто повеќе од 2023., кога тој изнесуваше 44,7 милиони фунти. Победниците во поединечна машка и женска конкуренција ќе добијат по 2.7 милиони фунти (3.2 милиони евра), додека поразените по 1.4 милиони фунти (1.65 милиони евра).
Од најпрестижниот тениски турнир ќе известуваат околу 400 новинари од над 50 земји, но, поради војната во Украина, не и од Русија и Белорусија, иако нивните тенисери во двете конкуренции се меѓу првите десет. Како и на претходните четири вимблдонски турнири, и оваа година Макфакс и Топспорт ќе имаат свој известувач од сите четиринаесет турнирски денови.
Ненад Живановски
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Спорт
„Мистијано Пеналдо“, напиша Би-би-си откога Роналдо промаши пенал
![](https://makfax.com.mk/wp-content/uploads/2024/07/mistiano.jpg)
Кристијано Роналдо, фудбалерот на Португалија, не го понесе епитетот трагичар по промашениот пенал против Словенија откако неговата репрезентација успеа да се пласира понатаму по подоброто изведување на пеналите.
На крајот од второто продолжение Роналдо имаше шанса да ја доведе Португалија до победа, но Јан Облак му го прочита ударот и го одбрани, па играта беше решена по дополнителните удари од белата точка.
Таму блесна колегата на Облак од другата страна, Диого Коста, кој одбрани три пенали.
Сепак, по мечот, еднакво внимание привлече потегот на британскиот Би-би-си.
На оваа телевизија промашувањето на Роналдо беше придружено со графичкиот потпис „Мистијано Пеналдо“ алудирајќи на неговиот неуспешен обид.
А нивниот потег го нападнаа навивачите, кои или застанаа во одбрана на Роналдо или укажуваа на срамното однесување на Би-би-си.
Спорт
Роналдо се расплака: „Не сум промашил пенал цела година, но…“
![](https://makfax.com.mk/wp-content/uploads/2024/07/ronaldo-vo-solzi.jpg)
Португалија со подобро изведување пенали ја победи Словенија со 3:0 и се пласираше во четвртфиналето на ЕП каде ќе игра против Франција.
Немаше голови во 120 минути игра. Португалија беше најблиску до гол во 105. минута кога Кристијано Роналдо шутираше пенал, но словенечкиот голман Јан Облак одлично одбрани. Роналдо се расплака, а камерата ја сними во солзи и неговата мајка од трибините.
Роналдо потоа постигна гол за време на пеналите.
„Тага на почетокот, радост на крајот. Тоа е фудбалот, моменти кои се неописливи. Имав директна можност да го доведам тимот во водство, но не успеав. Јан направи одлична одбрана. Цела година не промашив пенал, но кога беше најважно не успеав. Мислам дека заслуживме да победиме бидејќи игравме со поголем авторитет. Словенија се бранеше речиси цел натпревар. Посебни честитки до нашиот голман кој одбрани три пенали“, изјави Роналдо по натпреварот.
Спорт
Диого Коста португалски херој, ја елиминира Словенија
![](https://makfax.com.mk/wp-content/uploads/2024/07/PORTUGAL.jpg)
Еден од најдобрите фудбалери на денешницата беше мотивиран да постигне гол од самиот старт на натпреварот, но одбраната на Словенија одлично се снајде. На крајот од судиското продолжение Кристијано Роналдо имаше шанса да и донесе водство на Португалија од пенал, но не успеа.
Драма, следуваше пенал завршница.
Искуството си го направи своето, Португалија оди понатаму.
Тие ја совладаа Словенија на пенали и со тоа се пласираа во четврт-финалето на ЕП. Регуларниот дел од натпреварот заврши со резултат 0:0, како и дополнителни половина час игра.
Во четврт-финалето Португалија ќе игра против Франција која со 1:0 ја победи Белгија.
Португалскиот голман Диого Коста, кој ги одбрани сите три удари на Словенците е херој на мечот.
Од почетокот на играта Словенците беа поставени во карактеристична формација 4-4-2. Кристијано Роналдо имаше многу проблеми, неговиот најдобар напор во првото полувреме беше неговиот слободен удар во 34. минута.
Тој шутираше од околу 20 метри, а топката отиде само над стативата.
Португалија најблиску дојде до гол во втората минута од судиското надополнување во првото полувреме, кога Палиња силно повлече од работ на шеснаесетникот.
Топката мина покрај десната статива од голот на Облак.
Во првото полувреме Словенците напаѓаа само неколку пати, но не успеаја да создадат голема шанса.
Португалија ја мина групната фаза како првопласирана во групата Ф пред Турција, Грузија и Чешка.
Словенија беше трета во групата Ц пред Србија и зад Данска и Англија.