Спорт
Над 135 тенисери под истрага за местење резултати

Повеќе од 135 професионални тенисери, меѓу кои и еден во топ 30 играчи во свет се под полициска истрага поради местење резултати, објавија германските медиуми, пренесува СТА.
Дневниот весник „Ди велт“ и телевизиската станица ЗДФ објавија дека во тек се истраги во повеќе европски држави. Истрагите ги води американското федерално биро (FBI) и полициите во тие земји.
Меѓу вмешаните е тенисер кој во својата кариера има освоено три АТП-турнири.
„Говориме за ерменска мафија што е распространета низ цела Европа и дејствува мегаломански“, изјави белгискиот генерален државен обвинител Ерик Бишоп.
Тој додаде дека во истрагата се вклучени стотици помали обложувалници, коишто оствариле заработка од повеќе стотици илјади евра.
ЗДФ и „Ди велт“ разговарале со поранешниот аргентински тенисер Марк Трунгелити, кој рекол дека многу пати бил контактиран од мафијашки групи.
„Има многу играчи од првите 50 во свет кои учествуваат во местење резултати. Ова се случува на турнири на сите нивоа“, ијави тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Мурињо се соочува со суспензија од десет натпревари

Жозе Мурињо имаше свое шоу по натпреварот против Галатасарај, кога по поразот во четвртфиналето на Купот (1:2) за нос го фати противничкиот тренер, Окан Бурук.
Ден по натпреварот, португалскиот стручњак беше осуден од голем број луѓе, кои не можеа да поверуваат што направи.
Фудбалскиот сојуз на Турција покрена постапка, ги прегледува снимките, по што ќе донесе одлука околу казната за Жозе Мурињо. Според некои медиуми, бидејќи ова не му е прв инцидент од доаѓањето во Турција можно е да добие суспензија од 10 натпревари.
Челниците на Фенербахче не се огласуваа по инцидентот, но медиумите тврдат дека во секој случај ќе застанат на негова страна, бидејќи и тие сметаат дека се оди на штета на нивниот тим.
Спорт
Ферстапен со совршен круг до пол-позицијата во Јапонија

Четврти пат по ред, Макс Ферстапен ќе стартува од пол-позицијата на патеката Сузука, на трката за Големата награда на Јапонија.
Актуелниот светски првак до првата пол-позиција сезонава, дојде со совршен круг, најбрз во историјата на Сузука 1:26.983 минути. Ферстапен ја прекина доминацијата на Мекларен во квалификациите на претходните две трки, во Австралија и Кина.
Холанѓанецот за 12 илјадити делови од секундата го победи Ландо Норис од Мекларен, а од вториот возач на Мекларен, Оскар Пјастри беше побрз за 44 илјадити делови од секундата.
Шарл Леклер со своето Ферари ќе стартува од четвртото место, тој за 20 илјадити делови од секундата беше побрз од возачот на Мерцедес Џорџ Расел кој ќе стартува од петтото место. Тинејџерот, Андреа Кими Антонели трката ќе ја започне до тимскиот колега Расел.
Пласман во првите десет на стартот изборија Исак Хаџар (Рејсинг Булс), Луис Хамилтон кој уште еднаш разочра во болидот на Ферари, Алекс Албон (Вилијамс) и Оливер Берман (Хас).
Трката за Големата награда на Јапонија, в недела ќе започне во седум часот по средноевропско време.
Спорт
(Видео) Бостон со рекорд го декласира Феникс

Бостон Селтикс на домашен терен го декласираа Феникс Санс со резултат 123:103. Доминацијата на актуелниот НБА шампион беше евидентна уште од самиот старт на натпреварот, во ниту еден момент немаше дилема кој ќе победи во „Ти Ди Гарден“.
Разликата Бостон започна да ја прави во финишот на првиот период, благодарение на серијата од 8:0, што му донесе предност од девет поени (31:22). Почетокот на вториот дел донесе уште поголем налет на домашните, кои направија дополнителна серија од 12:0, го зголемија водството на +20 (46:26) и практично го решија прашањето на победникот.
Селтикси во текот на целиот натпревар ја контролираа играта и имаа двоцифрено водство, не дозволувајќи му на ривалот да се доближи. Триумфот против Феникс беше нивни 57-ми сезонава, што дополнително ја зацврсти нивната позиција како фаворити за уште еден шампионски прстен.
Покрај убедливата победа, Бостон собори и важен НБА рекорд. Веќе во првото полувреме стигнаа до вкупно 1.364 тројки во сезоната, со што го надминаа претходниот рекорд кој го држеше Голден Стејт од сезоната 2023/24.