Еден од најдобрите германски голмани на сите времиња, Оливер Кан (56), изјави дека Бундеслигата станала предвидлива и здодевна, истакнувајќи дека Баерн бил национален шампион 12 пати во последните 13 сезони, објавија германските медиуми. Кан беше претседател на одборот на Баерн од 2021 до 2023 година.

„За време на мојата фудбалска кариера, Бундеслигата беше понеизвесна, имаше повеќе тимови кои се натпреваруваа за титулата. Како може клуб со буџет од 40 милиони евра да се натпреварува против тим со годишен буџет од 300 милиони евра. Пет резервни играчи на Баерн вредат повеќе од тимовите од долната третина од Бундеслигата. Имаме ситуација каде што Баерн бил национален шампион 12 пати во последните 13 сезони. Лигата стана предвидлива и здодевна, а на долг рок тоа не е добро“, рече Кан.

Тој играше за баварскиот клуб 14 години, а се пензионираше во 2008 година. Имаше 86 настапи за германската репрезентација и беше најзаслужен за тоа што „Елф“ стигнаа до финалето на Светското првенство во 2002 година (во финалето беа поразени со 0-2 од Бразил).

Кан истакнува дека Бундеслигата сè уште ужива голема популарност во Германија, но проблемот го гледа во фактот дека не е доволно привлечна на меѓународно ниво.

„Мораме да ја гледаме Бундеслигата од два агли. Дома, таа е солидна институција, привлечна е за нашите навивачи, а натпреварите имаат голема посетеност. Сепак, секогаш кога разговарам со некого во странство, луѓето таму не гледаат никаква значајна разлика помеѓу Бундеслигата, италијанската Серија А или француската Лига 1“, рече тој и додаде:

„Но, затоа тие ќе знаат сè за англиската Премиер лига или шпанската Ла Лига, добро ги познаваат сите клубови и најголемите ѕвезди во тие лиги. Затоа, ми е сосема разбирливо што еден од нашите најдобри фудбалери, Флоријан Вирц, замина во Ливерпул, во најатрактивната лига во светот.“

Фото/ Принскрин

Фудбалскиот клуб Интер Мајами на својата официјална веб-страница објави дека повредата на Лионел Меси, која Аргентинецот ја заработи на натпреварот против мексиканската Некакса, не е од сериозна природа.

Сепак, сè уште не е познато кога ќе се врати на теренот и дека неговото закрепнување, како и влегувањето во тренинг, ќе бидат под посебен надзор.

Пред две ноќи, Меси го напушти теренот по само 10 минути.

Почувствува болка во мускулот на десната нога и само седна на тревата, но подоцна беше утврдено дека не е ништо сериозно и дека паузата ќе биде многу пократка од очекуваното.

Но, кога ќе се врати останува прашање. Тој сигурно нема да биде таму во среда на дуелот против УНАС Пумас.

Фото/ Принтскрин

Во петокот на 1 август во Струмица започнаа екипните првенства на Македонија во шах, а по четири одиграни кола машката и женската екипа на ШК Алкалоид се наоѓаат сами во водство, со максимални осум бодови.

На женскиот турнир има шест пријавени екипи и ќе се играат вкупно пет кола според Бергеровиот систем, што значи дека дамите се пред освојување на титулата, но останува последната пречка, секогаш незгодната екипа на ШК Неготино, која лани беше на делба на третото место. Досега фармацевтките извојуваа три победи со максимален резултат од 4 : 0 и една од 3 : 1 против шахистките на „Центар“, кои лани при ист број поени беа прогласени за првопласирани по аплицирањето дополнителни критериуми. На првите две табли повторно играат шахистките од Грузија, ИМ Лела Јавакашвили и ВМ Бела Котенашвили, додека, пак, на другите табли ротираа искусните ЖИМ Габриела Коскоска и ЖФМ Моника Стојковска, заедно со талентираните ЖФМ Моника Жежовска и Леа Ефтовска.

Оваа година за првпат требаше да има десет екипи во машка конкуренција, но поради откажување на две, во конкуренција се осум тима и ќе се играат вкупно седум кола според Бергеровиот систем. Во четвртото коло, кое заврши вчеравечер, ШК Алкалоид го надигра стариот ривал ШК Гамбит со 3,5 : 2,5. Мечот имаше повеќе пресврти, па така, по победата на ВМ Велимир Ивиќ над ВМ Владимир Георгиев на втората табла, во долга и исцрпувачка партија, ВМ Петар Арнаудов успеа да освои цел поен против ВМ Трајко Недев, а на крајот ВМ Звонко Станојоски дојде до конечниот триумф славејќи над ФМ Андреј Велјаноски, кој во завршницата направи груб превид на фигура.

Хит на турнирот се младите шахисти на ШК Мулти Есенс, кои минатата година се вклучија во системот на натпреварување со новоформиранот тим, а преку квалификациите за Втората лига и потоа преку настапот во Втората лига изборија пласман во елитното друштво. Тие вчера во 4. коло го надиграа ШК Шкупи со 4,5 : 1,5, но вистинска сензација се случи во првото коло кога ремизираа со ШК Гамбит, при што испуштија и шанса за победа. Во моментов тие се на втората позиција на табелата со 7 бода, но во последните три рунди играат со екипи кои, исто така, целат кон висок пласман – Гостивар, Нов напредок од Штип и Алкалоид – па останува да се почека крајот на турнирот за да се види конечниот расплет.

Партиите од петтото коло се играат в понеделник со почеток од 16 часот, а играчите имаат на располагање 90 минути за целата партија, плус 30 секунди за секој одигран потег.

(ПР)