Спорт
Ѓоковиќ без мака го совлада Долгополов
Поранешниот светски број 1, Новак Ѓоковиќ ја мина првата пречка на Мастерсот во Рим, откако со 6:1/6:3 го „збриша“ Украинецот Александер Долгополов за нешто помалку од еден час.
Ѓоковиќ во Рим игра како само 18. тенисер на светот, негов најслаб пласман…


Поранешниот светски број 1, Новак Ѓоковиќ ја мина првата пречка на Мастерсот во Рим, откако со 6:1/6:3 го „збриша“ Украинецот Александер Долгополов за нешто помалку од еден час.
Ѓоковиќ во Рим игра како само 18. тенисер на светот, негов најслаб пласман од октомври 2006 година откако враќањето по повредата на лактот не поминува најдобро.
Против Долгополов тој немаше проблеми, правејќи брејк за 3:1 водство во првиот сет, по што со уште еден брејк го комплетираше сетот, пред Украинецот да пружи малку повеќе отпор во вториот сет. Со одличен сервис, Ѓоковиќ не дозволи проблеми во своите гемеви за повторно да направи брејк за 3:1 водство.
Следен за Ѓоковиќ е подобриот од дуелот меѓу Грузиецот Николос Басилашвили и Италијанецот Филипо Балди. На Ѓоковиќ му треба барем пласман во финалето во Рим за да не загуби 600 поени на АТП листата и да се најде под закана да не биде носител на Ролан Гарос.
На победите се врати и Јапонецот Кеи Нишикори по два порази во низа на турнирите во Шпанија, откако со 7:6(5)/6:4 го совлада Шпанецот Фелисијано Лопез во меч кој траеше час и 48 минути.
„Воопшто не беше лесно. Ветерот ни направи проблеми на двајцата со играта, но за среќа останав со самодовербата“, вели Јапонецот, кој својата последна титула ја освои во Мемфис во февруари 2016 година.
Нишикори сега игра со бугарскиот трет носител Григор Димитров.
Фото: ЕПА
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Џеко се враќа во Серија А

Един Џеко, 39-годишниот репрезентативец на Босна и Херцеговина, е блиску до враќање во Италија.
Според медиумите на Апенините, искусниот напаѓач треба да потпише договор со Болоња. Преговорите се во завршна фаза и остануваат само технички детали пред официјалната потврда.
Понудата вклучува договор за една сезона, со можност за продолжување за уште една година, доколку двете страни се задоволни од соработката.
Џеко би имал годишна плата од 1,5 милиони евра во Болоња, со дополнителни бонуси поврзани со бројот на натпревари и постигнати голови.
Одличниот напаѓач го напушти Фенербахче на крајот од сезоната, каде што помина две години.
Инаку, неколку месеци Џеко се поврзуваше со Хајдук од Сплит, но очигледно решил да игра во многу посилна лига од хрватскиот шампионат.
Спорт
Милутинов не мрда од Олимпијакос

Српскиот репрезентативец Никола Милутинов брзо ја заврши сагата каде ќе ја продолжи кариерата.
Олимпија од Милано испрати конкретна понуда, а Панатинаикос финансиски најдобра. Сепак, тој одлучи да остане во Олимпијакос.
Клубот од Пиреја официјално објави дека потпишал нов тригодишен договор со српскиот центар, кој ќе трае до летото 2028 година.
Со оваа информација заврши „сапуницата“, која ја создаде Димитрис Јанакопулос, сопственикот на Панатинаикос, со понудата од дури девет милиони евра за следните три сезони.
Милутинов, и покрај тоа, одлучи да остане во црвено-белиот дрес за помала, но сепак огромна сума пари. Според извештаите, тој добил седум милиони евра за договор 2+1, односно околу 2,33 милиони евра по сезона.
Србинот беше еден од клучните играчи во финалната серија од плејофот на грчкото првенство, во која Олимпијакос го победи ПАО со вкупен резултат 3:1.
Тој имаше просек од 14 поени, 7,5 скока, две асистенции и индекс на корисност од 24.
Во Евролигата, тој имаше просек од 8,2 поени, 5,8 скока и 0,7 блокади во 29 натпревари.
Спорт
„Ѓоковиќ е Леброн на светскиот тенис, а Синер и Алкараз се како Битлси и Ролинг Стоунс“

Легендарниот американски тенисер Џон Мекенро смета дека Новак Ѓоковиќ не треба да се пензионира. Оваа теза ја објасни со неодамнешниот настап на Ѓоковиќ на Ролан Гарос, каде Ѓоковиќ дојде до полуфиналето.
„Зошто да се пензионира кога е сè уште конкурентен?“, прашува Мекенро во интервју за „Кориере дел Сера“ и додава:
„Тој сè уште се натпреварува со Алкараз и Синер. Има два големи адути: искуство и способност да се справи со тешки моменти.“
Потоа Американецот во суперлативи говореше за српскиот тенисер.
„Невозможно е да не му се восхитувате. Тој е Леброн Џејмс на светскиот тенис. Поради неговите години, станува сè потешко да се справи со Јаник и Карлос, но сепак е вистинско чудо. Некој што треба да го проучува науката“, вели Мекенро.
Седумкратниот шампион на Гренд слем ги пофали и првиот и вториот тенисер на планетата.
„Алкараз зрачи со харизма и тоа ги прави неговите натпревари „тензични“. Морам да кажам дека Карлос е најталентираниот тенисер што сум го видел. Тој е едноставно брилијантен. Харизмата не може да се создаде, со неа се раѓаш“, рече Мекенро и додаде:
„Јаник е поконзистентен, а она што импресионира е чистотата на неговите удари и звукот што го слушате кога ја удира топката. Никогаш не сум слушнал нешто слично. Исто така, сум импресиониран од леснотијата со која Алкараз се извлекува од тешкотиите во кои запаѓа, исто така со неверојатна леснотија. Тој е единствениот тенисер за кого би платил билет за да го гледам. Тој е најдобриот подарок што го добил тенисот по големата тројка. Би рекол дека тие двајца се како Битлси и Ролинг Стоунс.“
Конечно, споредба со „големата тројка“.
„Ни во моите најлуди соништа не можев да сонувам дека Роџер, Рафа и Новак ќе стигнат до 20 или повеќе Гренд слем титули. Сега, ако ме прашате дали Алкараз и Синнер ќе освојат 25… не знам, ми се чини лудо, но никогаш не вели никогаш. Ако има некој што може да го направи тоа, тоа се тие двајца“, подвлече Мекенро.