Спорт
Џошуа ослабен тргнува по титулата на Паркер
Ентони Џошуа, иако значително ослабен, беше за три килограми потежок од Џозеф Паркер на мерењето пред мечот за обединување на титулите во тешка категорија во Кардиф.
Британскиот носител на ВБА, ИБФ и ИБО титулите имаше 109 килограми на мерењето пред 4….


Ентони Џошуа, иако значително ослабен, беше за три килограми потежок од Џозеф Паркер на мерењето пред мечот за обединување на титулите во тешка категорија во Кардиф.
Британскиот носител на ВБА, ИБФ и ИБО титулите имаше 109 килограми на мерењето пред 4.000 гледачи, во споредба со 107 килограми на Новозеланѓанецот, кој е носител на ВБО трофејот. Во саботниот меч на „Принсипалити“ во Кардиф, Џошуа исто така ја има предноста на височината и има 15 сантиметри подолг „дофат“ од предизвикувачот.
Џошуа во својот последен меч против Камерунецот Карлос Такам минатиот октомври имаше 115 килограми (најмногу во кариерата), пред да го победи во тешки 10 рунди.
„Трчав многу и тренирав напорно пред овој меч. Со помалку килограми работите беа малку полесни. Се чувствувам добро и ако оди сѐ според планот, ќе ме видите поостар и побрз“, изјави 28-годишниот Џошуа, кој има 20-0 скор и сите победи ги оствари со нокаут.
Паркер, кој исто така е непоразен со 24-0 скор, вели дека е комплимент што Џошуа работел напорно пред „најголемиот меч во кариерата“, пред 80-тина илјади фанови во сабота навечер.
„Тоа значи дека го сфати мечот навистина сериозно и дека работеше напорно. Тој е во добра форма, но јас сум во уште подобра. Ќе видите бомби. Тука сум за добар меч, тука сум за војна. Тој ќе има повеќе фанови, но тоа не ме плаши“, објаснува Паркер.
По саботниот меч, тешката категорија ќе биде поблиску до апсолутен шампион во тешка категорија, бидејќи единствената друга „голема“ верзија на титулата – ВБЦ појасот е кај Американецот Дионтеј Вајлдер, боксер кој не е поразен во 40 меча.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Индонезија му врачи отказ на Патрик Клајверт

Холандската фудбалска легенда Патрик Клајверт повеќе не е селектор на репрезентацијата на Индонезија.
По серијата лоши резултати во квалификациите за Светското првенство, Индонезиската фудбалска асоцијација одлучи да ја прекине соработката со некогаш познатиот напаѓач.
Клајверт ја презеде клупата на Индонезија во јануари оваа година, кога потпиша двегодишен договор. Главната цел беше да ја однесе репрезентацијата на нивното прво Светско првенство откако земјата стекна независност во 1945 година. Тој не успеа во тоа.
Иако Индонезија за прв пат под негово водство стигна до четвртото коло од азиските квалификации, надежите беа уништени минатата недела. Поразите против Саудиска Арабија и Ирак ги згаснаа сништата дека Индонезија ќе игра на својот прв Мундијал.
Неговата судбина беше запечатена со пораз од 1:0 од Ирак во Џеда во саботата. После тоа, Индонезиската фудбалска асоцијација не губеше време и веднаш договори спогодбен раскин на договорот со селекторот со Клајверт.
Единствениот значаен тренерски успех на Клајверт останува третото место на Светското првенство во 2014 година, кога му беше асистент на Луј ван Гал во холандската репрезентација.
Спорт
Шок за Њујорк Никс, Брогдон замина во пензија

Американскиот кошаркар Малколм Брогдон ненадејно одлучи да ја заврши кариерата.
Плејмејкерот кој во минатото доби наградата „дебитант на годината“ и „шести играч на годината“ се пензионираше од кошарката помалку од една недела пред почетокот на сезоната 2025/26.
Медиумите повикувајќи се на извори од франшизата, Брогдон бил физички и психички исцрпен и истрошен во текот на својата деветгодишна кариера, и затоа решил да се пензионира.
Брогдон е поранешен студент на Универзитетот во Вирџинија и се шпекулира уште од неговите студентски денови (бил на колеџ пет години) дека еден ден ќе стане политичар.
Прекарот „Претседателот“ го доби откако магистрираше комуникации и односи со јавноста.
Во НБА, тој играше за Милвоки Бакс, Индијана Пејсерс, Бостон Селтикс, Портланд Блејзерс и Њујорк Никс, за кои играше само натпревари во предсезоната и се пензионираше пред почетокот на сезоната.
Брогдон има 32 години (роден на 11 декември 1992 година) и за време на неговата девет годишна НБА кариера, постигна 7.077 поени со 1.917 скока и 2.156 асистенции.
Неговиот дрес со број 15 беше повлечен од употреба на Универзитетот во Вирџинија.
Спорт
Ибрахимовиќ ги избра тројцата најдобри фудбалери на сите времиња

Златан Ибрахимовиќ (44), голема ѕвезда на светскиот фудбал, по завршувањето на кариерата остана во Милан да работи како советник. Познат по своите ставови и изјави, во последното појавување изненади многумина со изборот на најголемите фудбалери на сите времиња, особено поради третата позиција на која го смести Лионел Меси и целосното изоставување на Кристијано Роналдо, пишува „GiveMeSport“.
Иако Меси и Роналдо генерално се сметаат за дел од четворицата најголеми во историјата, заедно со Пеле и Диего Марадона, Ибрахимовиќ одлучи дека двајца од овој квартет не заслужуваат место на самиот врв.
3. Лионел Меси
И покрај тоа што е најтрофеен играч во историјата на фудбалот, со дури 46 големи трофеи, Лионел Меси мораше да се задоволи со третото место на листата на Ибрахимовиќ. Иако играа заедно кратко во Барселона, Швеѓанецот не е убеден дека Аргентинецот е најголемиот на сите времиња.
„За третата позиција, ќе кажам Меси. Не сум сигурен дали му останува да освои уште нешто во кариерата“, рече Ибрахимовиќ.
2. Диего Марадона
Вечната дебата за тоа кој бил подобар, Пеле или Диего Марадона. Двајцата обележаа еден период во историјата на фудбалот. Ибрахимовиќ го даде својот одговор ставајќи го Марадона на второто место, додека најголемиот бразилски играч на сите времиња беше целосно изоставен од листата.
„Втората позиција ќе му ја дадам на Марадона. За мене, тој беше вистинскиот. Сè правеше со срце, со емоции“, рече 44-годишникот.
1. Роналдо Назарио
На самиот врв, како најголем фудбалер на сите времиња, за Ибрахимовиќ е Роналдо Назарио. Поранешниот шведски репрезентативец никогаш не криел дека бразилскиот феномен му бил идол, што го потврди со зборовите.
„Според мене, Роналдо, феноменот, Бразилецот, тој е фудбалот. Кога гледате одредени играчи, следниот ден се обидувате да ги имитирате.“
Тој го повтори истото во едно интервју во 2021 година.
„Секогаш им велам на сите што играат со мене: Роналдо е фудбалот. Начинот на кој се движеше, начинот на кој дриблаше. Според мене, тој е најдобриот играч во историјата, без сомнение.“