Во третото коло од англискиот ФА Куп, второлигашот Лидс беше пред големо изненадување да го елиминира Арсенал на неговиот „Емирати“, но прволигашите Њукасл. ВБА, Сандерленд и Блекпул во саботата беа елиминирани

Во мечот кој требаше да претставува посериозен тренинг за лондонските „топчии“, петопалсираниот клуб од англиската втора лига поведе во 54. минута од пенал што го реализираше Роберт Снодграс. Пеналот беше досуден откако Бразилецот Денилсон во 16-те метри го собори Макс-Ален Градел. Инаку до тој момент Арсенал ја имаше контролата над играта но не создаде стопостотни можности за постигнување погодок.Менаџерот на Арсенал, Арсен Венгер за овој меч ги изостави своите најдобри играчи сезонава Самир Насри и Робин ван Перси, но за да го спречи дебаклот мораше во продолжение од мечот во игра да ги внесе Сеск Фабрегас и Тио Волкот. Токму тие двајцата беа протагонисти на изедначувањето за домашните во 89. минута. Бен Паркер со влечење за дресот го собори во гостинскиот шеснаесетник Волкот, а Фабрегас беше прецизен од белата точка. Волкот имаше шанса да го постигне победничкиот гол во четвртата минута од судиското продолжение, но неговиот удар го запре голманот на Лидс, Каспер Шмајкл. Арсенал останува пак голем фаворит и за повторениот меч кој че се одигра на 18-ти јануари на „Иланд Роуд“.Најголемото изненадување го направи четвртолигашот Стивениџ кој го декласира Њукасл. Се чини дека претенциозно менаџерот на „свраките“ го потцени повеќе од потребното противникот, и наместо стандардниот состав изведе на противничкиот терен искомбинирана екипа која не се снајде најдобро. По првото полувреме во кое фудбалерите на Стивениџ покажаа дека сакаат да ја искористат нивната историска шанса за клубот кој инаку за англиски услови има мала историја, веќе во 50. и во 55. минута домашните имаа сигурна предност со автоголот на Вилијамсон и голот на Боствик. Дека Њукасл ќе биде елиминиран стана јасно уште во 71. минута кога директен црвен картон доби Тиот кој само 14 минути претходно го замени Смит кој заради еден жолт картон беше под закана да биде исклучен од мечот. Гостите намалија на 1:2 во третата минута од судиското продолжување преку Џо Бартон, но по нецела минута Питер Вин ги постави конечните 3:1.Сандерленд исто така со ослабен состав како домаќин беше поразен од третолигашот Нотс каунти со 1:2, а второлигашот Рединг пред својата публика елиминираше во саботата уште еден премиерлигаш, Вест бромвич албион со 1:0. Уште еден третолигаш го зема скалпот на член на најсилната англиска фудбалска лига, имено Саутемптон со 2:0 го совлада Блекпул.Во другите мечеви од ФА Купот во саботата беа постигнати следните резултати: Блекбурн – Квинс парк ренџерс 1:0; Болтон – Јорк 2:0; Фулам – Питерборо 6:2; Хал – Виган 2:3; Милвол – Бирмингем 1:4; Сканторп – Евертон 1:5; Шефилд јунајтед – Астон вила 1:3; Сток – Кардиф 1:1 и Вест хем – Барнсли 2:0. Во рамките на 3-то  коло во недела се игра дербито меѓу Манчестер јунајтед и Ливерпул кој првпат ќе биде предводен од привремениот менаџер и долгогодишна играчка клупска легенда Кени Далглиш, Тотенхем игра против некогашниот прволигаш Чарлтон кој од сезоната 2006/07 сега падна во третата лига, а минатогодишниот победник на купот Челзи игра против второлигашот Ипсвич.