Најдобриот тенисер на светот, Новак Ѓоковиќ, официјално стана рекордер по бројот на недели (311) поминати на првото место на АТП-листата. Вечерва, по овој повод, во негова чест се одржа дочек во Белград, а шампионот го прослави историскиот момент со своите сограѓани.

Заменик-градоначалникот на Белград, Горан Весиќ, исто така јавно му се заблагодари на Ѓоковиќ за постигнатиот успех.

„Вечерва, Белград го слави триумфот на Ноле! Од денес белграѓанецот Новак Ѓоковиќ е најдобриот тенисер на сите времиња. Ти благодарам за радоста што му ја донесе на нашиот народ“, напиша Весиќ.

„Ви благодарам што дојдовте, не очекував толку многу луѓе. Ви благодарам за сите овие години што сте со мене. Ова е успех на целата нација, не само мој и на моето семејство. Тоа го сфатив пред десет години кога успеав да го остварам детскиот сон за освојување на Вимблдон. Она што најмногу ме трогна беше тоа што го доживеав во Белград по Вимблдон кога првпат станав број еден во светот. Се вратив тука и Србија подготви нешто што ќе го паметам целиот живот. Вечно сум ви благодарен за тоа и поради тоа, чувствувам голема чест, привилегија и задоволство и одговорност да ве претставувам сите на најдобар можен начин насекаде во светот. Знам дека ви ги кинам нервите, понекогаш си ги кинам и сам на себе“, рече Новак пред насобраните.

Андреа Пирло вели дека не е загрижен околу бројните шпекулации за неговата позиција во Јувентус, велејќи дека клубот е единствен кој ќе одлучи дали тој ќе остане или ќе замени.

Пирло ја доби првата тренерска работа во кариерата откако Јувентус го отпушти Маурицио Сари минатото лето, но по слабите настапи во Серија А може да стане првиот тренер на „бјанконерите“ кој не ја освоил титулата по Луиџи дел Нери во 2010/11.

Утре, Јуве игра во осминафиналето на Лигата на шампионите против Порто, со негатива од 1:2 од првиот меч и италијанските медиуми шпекулираат дека Пирло ќе добие отказ ако не успее да влезе во четврт-финалето

„Ако мислев дека мојата иднина зависи од мечот со Порто, немаше да бидам тука. Да, се работи за важен меч, но само еден меч. За мојата иднина ќе одлучи клубот според резултатите. Јас работам ден за ден и го знам мојот проект и проектот на клубот“, вели  Пирло.

„Старата дама“ загуби во финалињата на ЛШ во 2015 и 2017 година, но оттогаш го немаат минато четврт-финалето, и покрај тоа што Кристијано Роналдо беше дел од составот последните две сезони.