Денеска во Скопје во 9 часот на плоштадот Пела е стартот на петтиот традиционален Меѓународен скопски маратон.

Денеска во Скопје во 9 часот на плоштадот Пела е стартот на петтиот традиционален Меѓународен скопски маратон. Скопскиот маратон е влезен во календарот на Меѓународната атлетска федерација и резултатите ќе се признаваат како норма за настап на маратонската трка на олимписките игри во Лондон и на светското првенство во маратонско трчање што ќе се одржи во Јужна Кореја. Пријавени се 500 учесници од 33 држави кои ќе трчаат  42 километри и на малиот маратон чија патека е долга 21 км. Ќе има и хуманитарна трка на пет километри на кои според досегашните пријави ќе учествуваат околу 2.000 тркачи, младинци, студенти, рекреативци. На главниот маратон пријавени се 170 маратонци на полумаратонот околу 350. Наедно Скопскиот маратон, ќе биде и балканско првенство во маратонско трчање, на кое ќе настапат маратонци од Турција, Србија, Црна Гора, Бугарија, Романија, Албанија, Молдавија и од Македонија. На маратонот ќе се трча во машка и во женска конкуренција. Стартот на маратонот е на плоштадот Пела на семафорите меѓу улиците „Димитрија Чуповски“ и „11 Октомври“ во 9 часот. Маратонот се одржува во организација на Собранието на Град Скопје, Агенцијата за млади и спорт на Македонија и на Европската унија. Обезбеден е и награден фонд во машка и женска конкуренција кој изнесува 20.000 евра. Победникот на главниот маратон ќе добие 1.200 евра, меѓутоа доколку постигне време под 2:29,59 ќе има и 500 евра бонус. Второпласираниот ќе добие 700, третопласираниот 400 евра./ крај/км