Зимските олимписки игри во Милано и Кортина д’Ампецо следната година во својата програма ќе имаат нов спорт – скимо.

Скимо е ски планинарење, а комбинира скијање по угорнини и спуст, како и користење врвни планинарски вештини за искачување на ледените падини.

Има различни должини на трки, од кратки спринтови до оние кои можат да траат до два часа и да вклучуваат повеќе од 1.500 метри качување.

Вкупно 18 мажи и 18 жени ќе се натпреваруваат во поединечни трки и во мешана штафета.

Спринт трките вообичаено траат само три минути за мажи и четири минути за жени и се состојат од скијање на нагорнина, дел за качување и спуштање околу портите на трката. Натпреварувачите можат да се искачат до 250 вертикални стапки.

Скимо натпреварувачите користат специјална „кожа“ што ја ставаат на долниот дел од скиите за да спречат лизгање за време на искачувањата. Нивните скии се слични на оние за нордиско скијање, малку се полесни од скиите за спуст и имаат подвижни врзиви кои овозможуваат правилно движење на зглобовите.

Зимските олимписки игри во Милано и Кортина почнуваат за точно една година, а во текот на нивното времетраење ќе бидат доделени вкупно 116 комплети медали во 16 дисциплини. Свеченото отворање ќе се одржи во Верона, додека скијачките натпревари ќе се одржат во Бормио.

Кошаркарките на Франција го потврдија пласманот на Европското првенство кое годинава ќе се одржи од 18. до 29. јуни во Чешка, Германија, Италија и Грција. Тоа го направија на неверојатен начин, со победата над Република Ирска на домашен терен со дури 101 поен разлика, 125:24.

Французинките ја остварија најголемата победа во својата историја. Убедливо ја добија секоја четвртина. Првата ја добија со 35:7, додека до полувремето беше 64:16. Во третата четвртина кошаркарките од Ирска постигнаа само два поени, а Французинките 34, за водство од 98:18 по 30 минути игра. Во последната четвртина Франција беше подобра со 27:6

Сите 12 француски кошаркари постигнаа барем по еден поен, додека седум имаа двоцифрен учинок.

Најмногу поени постигнаа Жанел Салаунн (19), и Валери Вукосављевиќ (16). Кошаркарките од Ирска 11 од 24-те поени постигнаа од линијата за слободни фрлања, од поле погодија 6/49. Најефикасна во нивните редови беше Клер Мелиа со 9 постигнати поени.

Иако Ерлинг Халанд неодамна го продолжи договорот со Манчестер Сити на 9,5 години, „граѓаните“ на лето би можеле да останат без него.

Сити пред неколку недели потпиша со Халанд долгорочен договор, до 2034 година, според кој Норвежанецот добива повеќе од 600.000 евра неделно.

Клубот од „Етихад“ доста добро се обезбеди, бидејќи во договорот нема откупна клаузула до 2029 година, па дури потоа ќе биде активирана за сите клубови, но не е познато колку изнесува обесштетувањето.

Сепак, за Сити не е сè така идеално, во договорот сепак има една проблематична ставка за „граѓаните“.

Има еден услов под кој Норвежанецот може да го напушти клубот без Манчестер сити да поставува премногу прашања.

Како што ексклузивно открива „Ел Насионал“, Халанд се обезбедил доколку клубот не обезбеди место во Лигата на шампионите следната година.

Доколку Сити не заврши меѓу четирите најдобри во Премиер лигата, а моментално е петти, Халанд има посебна клаузула во договорот која му овозможува да преговара со други клубови.

Сити моментално има големи резултатски проблеми и пласманот во Лигата на шампионите не е загарантиран, па не е ниту останувањето на Халанд на „Етихад“.

Особен страв предизвикува судењето по 115 точки од обвинението за Манчестер сити, чиј исход треба да биде познат во март.

Доколку на Сити му се одземат бодовите или се соочи со уште построга казна, сигурно е дека тимот нема да игра во Лигата на шампионите следната сезона, што му ја отвора вратата на Халанд да го напушти „Етихад“.