Македонија поразена од Русија (68-72) во битката за бронза, но морален победник на шампионатот. Хероите во жолто-црвена опрема испишаа неверојатна приказна, која ќе се пренесува од колено на колено, нешто што дедовците ќе им го раскажуваат на своите внуци во децениите што доаѓаат

Главата горе, вие сте нашите херои. Со ова скандирање неколкуте стотини македонски навивачи ги испратија кошаркарските репрезентативци на Македонија по поразот од Русија (68-72) во битката за бронзениот медал на Европското првенство (ЕП) што денеска завршува во Литванија. Тоа значи дека избраниците на селекторот Марин Докузовски на крајот завршија на четвртата позиција на континенталниот шампионат, што е неверојатен успех за малата држава од ридестиот Балкан.

Хероите во жолто-црвена опрема испишаа неверојатна приказна, која ќе се пренесува од колено на колено, нешто што дедовците ќе им го раскажуваат на своите внуци во децениите што доаѓаат. Кошаркарите го свртеа вниманието не само на европската, туку и на светската јавност, со играта со големо срце и со своите феноменални победи над дотогаш далеку посилните ривали, барем на хартија. Дванаесетте јунаци беа најголемите амбасадори на малата држава, и тоа во периодот на прославата на 20-годишнината од самостојноста на Македонија. Младо и старо, машко и женско, од сите националности, во изминатите дваесетина дена живееја заедно со нашите кошаркари. Никој досега не успеал да го направи тоа, да постигне сите два милиони жители да дишат како еден, и тоа во ритамот на танцот на кошаркарите во салите низ Литванија. За тоа сите тие, односно сите ние, сме им максимално благодарни.

РУСИТЕ ПОВТОРНО КОБНИ

Ничкосани пред челичната рака на во моментов најпознатите Македонци паднаа една Грција, Хрватска, БиХ, Финска, Грузија, Словенија и домаќинот Литванија. Загубивме од Црна Гора во почетокот на ЕП, и тоа несреќно по едно продолжение, од феноменалната Шпанија и два пати од Русија. Токму „баќушките“ беа фатални за нас на патот кон бронзеното одличје. Денеска тие не беа подобри, туку само посреќни во клучните моменти од мечот.

Спортската арена во литванската кошаркарска престолнина Каунас виде голема борба на две титански селекции, во која на крајот само една можеше да се радува. За жал, тоа беше рускиот тим, кој, сепак, сосема заслужено дојде до бронзеното одличје и до местото на победничкиот пиедестал. Македонските кошаркари прикажаа уште една великанска партија, повторно го одведоа мечот во инфаркт-завршница, но божицата Талија повторно беше на страната на големата Русија, како и во мечот од втората фаза во Вилнус, каде што загубивме со тројка во последната секунда.

Имавме 68-68 на 48 секунди пред крајот, но не издржавме. Не успеавме да го спречиме Сергеј Биков да ни даде кош на 15 секунди пред крајот за 68-70 за Русите. Но и покрај тоа, организиравме одличен напад, Дамјан Стојановски се најде осамен под кошот, но топката му се лизна од рацете, го префрли обрачот и замина на другата страна од теренот. Тоа беше момент што ги скрши срцата на сите што живееја со нашите кошаркари, остана само израз на неверување на лицата на сите во салата и огромна жал за пропуштената шанса барем да се дојде до продолжение. Но ниту во тој момент, ниту по крајот, апсолутно никој не му забележа на младиот бек, кој долго, долго ќе го памети тој момент кога лесно можеше да стане творец на успехот. Тој, заедно со сите други во репрезентацијата, останува јунак за оние во чии гради бие македонско срце.

По овој момент следуваше егзекуција од страна на руските кошаркари, кои преку Алексеј Швед само ја запечатија победата. Владо Илиевски на три секунди пред крајот се обиде со тројка да внесе немир во редовите на противникот, но не успеа во шутот, што беше знак за клупата на противникот да почне да и’ се радува на бронзата.

ПРЕМНОГУ ИНФЕРИОРНИ ВО СКОКОТ

Пресудна за триумфот на Русија беше нивната огромна доминација во играта под кошевите. Руските кошаркари имаа дури 18 скока повеќе од македонскиот тим, а за одбележување е и податокот што тие имаа 22 офанзивни скока, односно еден повеќе од фатените топки во одбраната, што е неверојатна реткост во кошарката.Избраниците на Докузовски почнаа добро, имаа 6-3, но потоа следуваше серија 10-0 на противникот и преземање на водството, кое го чуваа сигурно до финишот од последниот период. „Баќушките“ кон средината на третата четвртина имаа дури и плус 11 (43-32), но тоа не ги уплаши нашите, кои со смирена игра, полека и сигурно успеаја да дојдат до неизвесен финиш.

Вистинска еуфорија предизвикаа тројката на Илиевски и поените на Антиќ во почетокот од последниот дел, со кои Македонија дојде до предност од 55-52, која за жал не успеа да ја задржи. Во тие моменти на сцена стапи НБА-ѕвездата во рускиот тим, Андреј Кириленко, кој со две тројки во низа повторно ја доведе Русија до водство, кое европскиот шампион од 2007 година не го испушти до самиот крај.

Без разлика на поразот, долго ќе се памети играта на натурализираниот Американец Бо Мекејлеб, кој мечот го заврши со 22 поени, од кои дури 15 постигна во првото полувреме, во кое беше фантастичен. Илиевски заврши со 16 поени, додека Антиќ постигна 13 поени. Кај Русите Кириленко беше стрелец на 18 поени, додека Моња, Воронцевич и Мозгов реализираа по 10 поени.