Спорт
Милан го преживеа пеколот на „Емирати“
Милан и Бенфика се првите четвртфиналисти во Лигата на шампиони, откако во осмина финалните пресметки ги елиминираа Арсенал, односно Зенит.
Милан и Бенфика се првите четвртфиналисти во Лигата на шампиони, откако во осмина финалните пресметки ги елиминираа Арсенал, односно Зенит. Арсенал кој се наоѓаше пред невозможна мисија, да надополни негатива од четири гола против италијанскиот првак, беше многу блиску до вистинска сензација. „Тобџиите“ уште во првото полувреме поведоа со 3:0, но тука застанаа. Кошелни, Росицки и Ван Перси од пенал, ја погодија мрежата на Абијати, кој и покрај примените погодоци беше најдобриот играч на Милан. Ван Перси, во второто полувреме, ја имаше можеби и меч топката, но холандскиот напаѓач, од три метри не успеја да го совлада Абијати. Милан, чија игра, во првото полувреме беше целосно разбијена, одигра нешто подобро во вторито дел кога убави можности за постигнување гол, не реализираа Ибрахимовиќ и Ночерино. Арсенал, по лошото издание во првиот меч, чесно се прости од овогодинешната сезона во Лигата на шампиони. Доколку успееше да мине во следната фаза Арсенал ќе станеше само четвртата екипа во историјата на европските купови, која надополнила негатива од четири гола по првиот меч. Досега тоа им успеало на три тима: Реал (против Борусија Менхенгладбах во сезоната 1985/86, 5:1, 4:0), Партизан (против КПР во сезоната 1984/85, 6:2, 4:0) и Леисоеш (против Шо де Фон во сезоната 1961/62, 6:2, 5:0). Пласман во четвртфиналето избори и португалскиот преставник Бенфика, која по поразот од 2:3 на првиот меч, во реваншот го совлада Зенит со 2:0. Играчите на Бенфика погодоците ги постигнаа во судиското надополнување на времето и во првото и во второто полувреме. Првиот гол го постигна Макси Переира, а пласманот на Бенфика меѓу осумте најдобри тима во Европа го потврди Нелсон Оливеира. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Клубовите се против – Шведска нема да воведе ВАР
Системот за видео анализа (ВАР) нема да биде воведен во Шведска, откако на оваа идеа се спротивтавиле фудбалските клубови, изјави во петокот претседателот на Шведската фудбалска федерација (SvFF), Фредрик Рајнфелд.
ВАР постојано беше во центарот на контроверзноста во лигите каде што беше воведен, со поплаки поврзани со неговата обемна анализа и одложувања кои често траат неколку минути.
Во јули 2023 година, Шведската професионална фудбалска лига, која ги претставува клубовите во првите две дивизии на шведскиот фудбал, соопшти дека мнозинството клубови во земјата „активно се противат“ на воведувањето на ВАР.
Рајнфелд, кој минатата година рече дека ВАР е „иднината“, беше критикуван од навивачите за неговиот став по ова прашање.
„Ако броев правилно, имаме 18 елитни клубови и два региони кои рекоа дека не сакаат да воведат ВАР. Ние тоа го почитуваме. Поради тоа не излеговме со овој предлог на претходниот состанок, а тоа нема да се случи ниту во иднина. Јас сум за почитување на демократските правила на играта“, изјави Рајнфелд, инаку поранешниот премиер на Шведска.
Спорт
Иџе во поход по нова европска титула: „Очекувам добра трка“
Трикратниот европски шампион, Игор Стефановски Иџе овој викенд со трката во Австрија започнува нова сезона во која ќе се обиде да стигне до четвртата титула во Европскиот шампионат на ридски патеки (еHC).
Летечкиот Македонец, Игор Стефановски викендов пред нов предизвик. Во Австрија, на патеката Рекбер тој ќе го започне својот најнов поход на Европскиот шампионат на ридски патеки, кој и годинава има 10 трки. Шампионатот започнува на 28.04.2024, а ќе заврши во септември со трката во Хрватска.
Стефановски и оваа сезона не ги крие своите шампионски амбиции, за кои верува дека ќе може да се реализираат, особено затоа што годинава на патеката ќе управува со новиот автомобилски ѕвер од Ферари 488 B8, специјално дизајниран за овие патеки.
„Очекувам добра трка. Посакувам да постигнеме одличен резултат. Би сакал да се заблагодарам на мојот тим, како и на тие кои го препознаа потенцијалот и ме поддржуваат за натпреварувањата во оваа сезона, особено моите спонзори кои веруваат во мојот потенцијал “- вели Стефановски.
Минатата година Иџе во текот на целата сезона беше во сигурна доминација со седум победи на 10 трки.
Спорт
Хулкенберг од наредната сезона во Заубер
Германскиот автомобилист Нико Хулкенберг од 2025 година, ќе има нов работодавец. 36-годишникот ќе вози за тимот на Кик Заубер.
„Среќен сум што возам за Кик Заубер од 2025 година и што во иднина ќе го претставувам германскиот производител на патеките во Ф1“, објави Нико Хулкенберг на социјалните мрежи.
Од 2026 година во Заубер влегува германскиот производител Ауди.
Хулкенберг е член на тимот на Хас во тековната сезона, а неодамна беше објавено дека нема да ја продолжи соработката со американскиот тим.
„Хулк“ дебитираше во Формула 1 во 2010 година како возач на Вилијамс на Големата награда на Бахреин. Во меѓувреме освои една пол-позиција.
Во претходната сезона, Хулкенберг го заврши натпреварувањето на 16. место во генералниот пласман во Ф1 со девет бодови.