Жозе Мурињо беше еден од коментаторите на „Скај спорт“ за големото англиско дерби помеѓу неговиот поранешен клуб Манчестер јунајтед и Ливерпул и процени дека од 1:1 ремито поголеми фрустрации ќе има Јирген Клоп, додека Оле Гунар Солскјер треба да е горд на постигнатото.

„На Клоп не му се допаѓаше менито. Тој сакаше месо, но доби риба. Јунајтед со сите ограничувања кои ги имаат во моментов, играа со пет луѓе назад и беа солидни и не даваа шанса за транзиција. Имаа одличен скор со толку победи, но против тим со ниски блокови не можеа ништо. Тие можат да ги смачкаат противниците кои играат како што посакуваат тие. Јирген мора да е исфрустриран. Но, на ’Олд Трафорд’, место каде што е посебно да се победи, уште нема победено. Оле и Јунајтед ќе се помалку разочарани бидејќи една грешка ги чинеше два поени. Имаа план, и одеа под него и најверојатно резултатот е фер. Да бев Оле ќе бев горд“, изјави Мурињо.

Јирген Клоп пак изјави дека е задоволен од резултатот, но дека првото полувреме покажало со кои предизвици се соочува фудбалот со ВАР системот по две одлуки кои очигледно го изнервираа.

„Резултатот е океј. Не е тоа што го посакувавме, но мораме да бидеме задоволни според тоа како се одвиваше мечот. Не ми се допадна првото полувреме, бидејќи им дадовме шанса да играат како што сакаат – да бидат агресивни. Не беа подобри од нас, но правеа што сакаа. Постигнаа гол кој ги покажува проблемите со ВАР. Судијата Еткинсон дозволи мечот да продолжи токму поради ВАР. За мене тоа беше чист фаул. Тогаш постигнавме гол кој ни беше поништен. Сè беше против нас, но не загубивме, така што е океј. Во финишот бевме 100 отсто подобри“, изјави Клоп за „Скај спортс“.

Лалана постигна гол по 18 месеци и донесе реми за Ливерпул на „Олд Трафорд“ (видео)

Парма со 5:1 ја декласираше Џенова во меч од осмото коло на Серија А, уништувајќи му го дебито на тренерот Андреацоли и зголемувајќи ја мизеријата на Грифоне, кои остануваат претпоследни на табелата, и во исто време покажувајќи каков талент има 19-годишниот Швеѓанец со македонско потекло, Дејан Кулушевски.

Јурај Куцка го отвори резултатот во 37. минута од мечот, пред данскиот напаѓач на Парма, Андреас Корнелиус да постигне хет-трик (42., 45. и 50. минута) за да го најави потопот на Џенова. Горан Пандев излезе во игра во второто полувреме, и неговата замена, Андреа Пинамонти постигна утешувачки гол за гостите во 52. минута од мечот.

Конечните 5:1 ги постави шведскиот фудбалер со македонско потекло, и поранешен У-16 репрезентативец на Македонија, 19-годишниот Кулушевски, кој претходно асистираше на двата гола на Корнелиус. Кулушевски има настапи за У-21 репрезентацијата на Шведска, но уште не е повикан во сениорската репрезентација.

Заврши победничкиот старт на Ливерпул во Премиер лигата, откако во деветтото коло во големото дерби на „Олд Трафорд“ на крајот се одигра 1:1. Откако Ливерпул влезе како голем фаворит во мечот, на крајот им беше потребен гол во 85. минута да израмнат против неубедливите Јунајтед и на врвот на табелата да имаат шест поени предност пред Манчестер сити.

Со овој резултат се става крај на низата од 18 победи во низа на Ливерпул, со што не успеаја да ги израмнат рекордот на Сити од 2017 година.

Ливерпул мечот го започна без Мохамед Салах поради повреда на скочниот зглоб, додека кај Јунајтед недостасуваше Пол Погба, но на голот се врати Давид де Хеа.

Насоката во која се движеше мечот се постави во последните десетина минути од првото полувреме, откако во првите половина час двата тима играа премногу внимателно, иако двапати мораше одлично да реагира Де Хеа.

Јунајтед успеа да дојде до предност во 37. минута, по една брза акција, во која Маркус Рашфорд го прекина својот долг пост и го совлада Алисон. Сепак, голот не беше без контроверзи, откако во Ливерпул сметаа дека на голот му претходеше фаул на Линделоф, но ВАР-системот реши дека нема потреба за поништување на голот.

Фрустрацијата со ВАР-системот продолжи за „црвените“ во 43. минута, кога Садио Мане постигна гол, на кој, сепак, му претходеше прием на топката со рака.

Во второто полувреме, Ливерпул имаа убедливо повеќе од топката во нозете (над 70 отсто од поседот), но до шанса тешко се стигнуваше сè до 85. минута од мечот, кога замената Адам Лалана успеа да ја искористи „заспаноста“ на одбраната на Јунајтед за да израмни. Ова, инаку е прв гол на Лалана во последните 18 месеци.