Репрезентативецот на Норвешка, Кент Робин Тонесен, од наредната сезона ќе го смени клубот но ќе остане да игра во Унгарија. Тонесен дресот на Веспрем ќе го замени со оној на Пик Сегед.

Тонесен ја игра четвртата сезона за Веспрем. Кариерата во клубот му ја обележаа повредите, поради што не го покажа вистинскиот потенцијал. На позцијата десен бек, предност кај тренерот Давид Дејвис, имаат Хорхе Македа и Египќанецот Јахиа Омар.

Норвежанецот во Пик Сегед ќе го замени Чехот, Станислав Кашпарек.

Тонесен во кариерата покрај во Веспрем играл и во Вецлар и Фуксе Берлин.

Марта Басино од Италија, победи на трката во велеслалом во Крањска Гора. За Басино ова е трета победа сезонава во оваа дисциплина, претходно победи во Зелден и Куршевел.

24-годишната Италијанка доминираше во двете трки, забележа вкупно време од 2:04.15 минути. Басино за 80 стотонки беше побрза од Теса Ворли, која го забележа најдобриот резултат уште од 2019 година.

Најдобрата тројка ја комплетираше Мишел Гисин од Швајцарија.

Микаела Шифрин која победи во Куршевел и на слаломот во Флахау, направи грешка во втората трка, поради што заврши на шестото место. Пред Шифрин беа Федерика Брињоне и Петра Влхова.

Басино води во поредокот во велеслалом со 300 бодови, 50 помалку има нејзината сонародничка Брињоне. Во генералниот пласман прва е Влхова со 749 бода, вотра е Гисин со 635, а трета Шифрин со 525.

Арсенал и Месут Озил спогодбено ја прекинаа соработката. Поранешниот германски репрезентативец, кој речиси десет месеци нема одиграно натпревар за Арсенал, го напушта клубот по седум и пол години. Озил кариерата ќе ја продолжи во Фенербахче.

Озил, без обесштетување, ќе се пресели во редовите на турскиот великан. Двете страни се задоволни од овој расплет, Арсенал ќе се ослободи од платата на Озил (350.000 фунти неделно), а фудбалерот како слободен играч ќе замине од Лондон.

Англиските и турските медиуми пренесуваат дека Озил утре ќе биде промовиран во нов играч на Фенербахче.

Месут Озил, во летниот преоден рок во 2013 година од Реал се пресели во Арсенал, за сума од 47 милиони евра. За Арсенал одиграл 184 натпревари, постигнал 33 гола и забележал 58 асистенции.

Озил со Арсенал освоил четири трофеи во ФА купот.