Спорт
Ањели: Супер лигата беше потребен проект, а не преврат
Претседателот на Јувентус, Андреа Ањели, повторно го бранеше проектот на Супер лигата посочувајќи дека и покрај пропаста на проектот, на европскиот и светскиот фудбал му е потребен целосен ремонт.
Јувентус, заедно со Реал Мадрид и Барселона, остана зад проектот на Супер лигата откако другите девет клуба се повлекоа и сега им се заканува казна од УЕФА, која најавува исфрлување од Лигата на шампионите. Ањели вели дека мора да има промени.
„Се сеќавам на предлогот од 2019 помеѓу Европската асоцијација на клубовите (ЕЦА) и УЕФА, кој сметав дека е фантастичен и беше поддржан од сите клубови во втората, третата и во четвртата лига. Но, ништо од тоа не беше исполнето. Морате да признаете дека европскиот фудбал е концентриран на монопол на извршна, економска и на правна моќ, која останува кај УЕФА. Системот е неефикасен. Супер лигата не беше проект за преврат, туку очајнички обид да се смени системот кој беше на граница на колапс и пред пандемијата, а сега е на пат до банкрот“, вели Ањели.
Тој не стравува од казни за Јувентус, Барса и за Реал Мадрид.
„Клубовите постојано бараа комуникација со УЕФА, кои постојано реагираат со затворање на вратата и со арогантни закани кон трите клуба игнорирајќи ја одлуката на судот во Мадрид и на европскиот трибунал. Ние сме сигурни дека легалната страна на нашиот проект е солидна. Со ваков пристап УЕФА не е подготвена за реформи. Другите спортови го сменија својот начин во минатото, како кошаркарската Евролига, која донесе големи работи за фановите, клубовите и за играчите“, објаснува Италијанецот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Куртоа се враќа до крајот на сезоната
Tренерот на Реал, Карло Анчелоти денеска изјави дека голманот Тибо Куртоа треба да се врати во тренажен процес за десет дена, пренесуваат шпанските медиуми.
На 20 март Куртоа беше опериран поради скинат менискус на десното колено. Шпанските медиуми потсетуваат дека белгискиот голман требаше да паузира до крајот на сезоната, но Анчелоти тврди дека Куртоа успешно се опоравува.
„Куртоа добро закрепнува, би можел да биде во тимот против Кадиз“, изјави Анчелоти.
Шпанските медиуми пренесуваат дека Куртоа сигурно ќе го пропушти натпреварот против Реал Сосиедад во Ла Лига, како и првиот полуфинален натпревар од Лигата на шампионите против Баерн.
Натпреварот од 34. коло во шпанското првенство помеѓу Реал и Кадиз ќе се одигра на четврти мај во Мадрид.
Спорт
Евролигата нема да го толерира однесувањето на Атаман
Кошаркарската Евролигата се огласи по бурната реакција и изјава на Ергин Атаман по поразот на Панатинаикос од Макаби, во Атина на стартот од четвртфиналната серија.
Во соопштението на веб-страницата на елитното натпреварување, се нагласува дека е недозволиво Атаман да ги етикетира судиите, дека таков приситсок нема да биде толериран и дека е покрената дисциплинска постапка против тренерот на Панатинаикос.
За потсетување, Атаман веднаш по натпреварот потенцираше дека судиите му доделиле шест поени на Балдивин, бидејќи досудиле два непостоечки, смешни фаули при шут за три поени, но во исто време нагласи дека ПАО продолжува понатаму, до завршниот турнир во Берлин.
Атаман на прес-конференцијата отиде чекор понатаму, велејќи дека ќе го напушти Панатинаикос доколку не избори пласман на завршниот турнир.
Макаби води во четвртфиналната серија со 1-0, вториот меч се игра вечерва повторно во Атина, а потоа следуваат два натпревари во Белград – 30 април и 2 мај, а евентуалната мајсторка ќе се игра на 8 мај во Атина.
Спорт
Гвардиола за Жоао Кансело: Ќе видиме на крајот на сезоната
Жоао Кансело е член на Манчестер Сити, а моментално е на позајмица во Барселона до крајот на сезоната. Прашање е дали Барселона сака да го отткупи неговиот договор, откако Португалецот беше означен како еден од главните виновници за елиминацијата од ПСЖ од Лигата на шампионите и поразот од Реал во Ел Класико.
Менаџерот на Манчестер Сити, Пеп Гвардиола изјави дека на крајот на сезоната ќе одлучи дали Кансело ќе се врати во клубот, пренесуваат британските медиуми.
„Се уште не сме разговарале за иднината на Кансело во нашиот клуб. Ќе разговараме на крајот на сезоната“, изјави Гвардиола.
Кансело (29) е член на Манчестер Сити од 2019 година. Тој има договор со англискиот клуб до 30 јуни 2027 година.
Вториот дел од минатата сезона Кансело го мина на позајмица во Баерн, а потоа Манчестер Сити го испрати португалскиот фудбалер на едногодишна позајмица во Барселона.
Кансело оваа сезона одигра 36 натпревари за Барселона и постигна четири гола.