Легендите на светскиот тенис, Роџер Федерер и Серена Вилијамс, по завршувањето на Вимблдон ќе останат без рејтинг. Ова ќе се случи поради одлуката на АТП и ВТА, овогодинешниот Вимблдон да не се бодува за листите, а да се одземат бодовите од ланското издание на турнирот.

Пред една година, Серена беше елиминирана во првото коло, кога и го предаде мечот на Александра Саснович при резултат 3:3. Оттогаш таа не се врати на теренот.

Роџер беше поуспешен, стигна до четвртфиналето на Грен слем турнирот во Лондон, но загуби од Хуберт Хуркач. Тоа му беше последниот меч што го одигра потоа замина на операција.

Кога на Вилијамс и Федерер ќе им се одземе овој последен контингент бодови пред почетокот на Вимблдон, и двајцата ќе паднат на нула и ќе останат без место на светските листи.

Додека за Серена нема информации дали воопшто планира да се врати на терените, Федерер најави дека ќе игра на турнирот во родниот Базел кој е закажан за октомври.

Швајцарецот наводно планира уште еднаш да игра на Вимблдон, неговиот најуспешен Грен слем, но и доколку се појави оваа година, сигурно нема да добие бодови за евентуалните победи, па тоа нема да влијае на ситуацијата на АТП листата.

Серена освои 23, Роџер 20 Грен слем трофеи во кариерата, тие се меѓу најуспешните тенисери на сите времиња, но за два месеци можеа да „не постојат“ на светските листи иако официјално се уште не се во пензија.

Тренерот на Барселона Чави почна да го крои тимот за следната сезона, на четворица фудбалери им соопштил дека повеќе не смета на нив.

Според новинарот Џерар Ромеро, Чави ги поканил Оскар Мингеза, Рики Пуиг, Самуел Умтити и Мартин Брејтвајт на состанок и им рекол дека можат да си бараат нови клубови.

Целта на клубот е тие да бидат продадени, доколку плановите не се реализираат, тогаш Барселона ќе ги испрати на позајмица.

„Одлуката на Чави не ги изненади овие четворица фудбалери. Тие уште од доаѓањето на Чави во ноември знаат дека се отпишани, но исто така му се благодарни што научија многу од него на тренинзите“, пишува „Мундо Депортиво“.

Брејтвајт го привлече вниманието на неколку англиски, италијански и германски клубови играјќи за данската репрезентација, а „Мундо Депортиво“ пишува дека кариерата би можел да ја продолжи во италијанската лига. Оваа сезона 30-годишниот напаѓач одигра само 248 минути.

Умтити се поврзува со поранешниот клуб, Олимпик Лион, додека за Пуиг сериозни биле заинтересирани во Селта Виго.

Барселона, по завршувањето на сезоната ќе ја напуштат играчите кои се на позајмица Адама Траоре и Лук Де Јонг, додека Миралем Пјаниќ ќе се врати во Барселона, а потоа или ќе биде продаден или ќе биде испратен на позајмица.

Претседателот на Атлетико Мадрид, Енрике Серзо, ги коментираше гласините за заминување на Антоан Гризман.

Претходните денови се појавија информации дека Гризман може да го напушти Мадрид и повторно да го облече дресот на Барселона, од каде што дојде на позајмица, но првиот човек на Атлетико Мадрид стави крај на тие приказни.

Освен што ги отстрани сомнежите за останувањето на Гризман во Мадрид, Серезо додаде дека го смета Гризман за играч кој е во самиот врв на светскиот фудбал.

„Според мене, Антоан е еден од тројцата или четворицата најдобри играчи во светот. Гризман е наш играч, има договор со Атлетико Мадрид и ќе остане тука во Атлетико Мадрид“, изјави Серезо.

Гризман дојде во Атлетико на едногодишна позајмица на крајот на летото 2021 година.

Постои и опција таа позајмица да се продолжи на уште една година, што најверојатно ќе се случи, судејќи по оваа изјава на првиот човек на „јорганџиите“.

Доколку Гризман остане во Мадрид, на крајот на следната сезона ќе се активира клаузула според која Гризман трајно ќе стане играч на Атлетико Мадрид, во замена за 40.000.000 евра.

Гризман оваа сезона одигра 35 натпревари за Атлетико и постигна осум гола.