Сите тенисери и тенисерки, како и нивните стручни тимови, кои со чартер-летот од Лос Анџелес, пристигнале во Мелбурн, ќе мора две недели да бидат во карантин. Организаторите на првиот Гренд слем во сезоната, Австралија опен, соопштија дека, во авионот двајца биле позитивни (член на посадата и еден патник).

Во авионот имало 67 патници (24 од нив се играчи што треба да настапат на Австралија опен) и 12 членови на екипажот. Двајцата заразени, 72 часа пред летот имале негативни тестови.

Тенисерите и тенисерките, како и патниците од овој лет ќе бидат сместени во хотел, предвиден за карантин и нема да смеат да ги напуштат своите соби во наредните 14 дена. Исто така тие нема да можат да тренираат.

Уругваецот Пабло Куевас, кој бил во авионот, на социјалните мрежи напишал дека ќе им биде овозможен некаков тренинг во затворено, но дека тоа е далеку од она што е планирано, пет сати тренинг на отворено, во „меурот“ во Мелбурн.

Според планот Австралија опен треба да започне на 8.февруари.

Денес на 27. Светско првенство во ракомет, Македонија за противник ќе го има домаќинот на турнирот Египет. Македонија против Египет ќе треба да се искупи за лошата игра на стартот на првенството и високиот пораз од Шведска (20:32). Египет, во првата рунда во Г-групата, го совлада Чиле 35:29.

Македонија, вечерва пред себе ќе има еден сериозен противник, кој од моментот кога ја доби организацијата на СП започна со сериозни подготовки. Египет очекува многу од овој Мундијал. Дополнителен „проблем“ за Македонија ќе биде и селекторот на Египет, Гарсија Парондо, кој во душа ги познава нашите репрезентативци. Шпанецот е поранешен тренер на Вардар и селектор на Македонија.

За да забележи позитивен резултат против домаќинот, Македонија ќе треба да одигра многу, многу подобро отколку против Шведска, каде ништо не функционираше во играта. Во тој дуел единствени кој заслужија преодна оценка беа голманите.

Дуелот Македонија-Египет ќе започне во 18 часот.

Лидерот во Серија А, Милан, го заврши трансферот на Суалио Меите, а до крајот на денот треба да го потпише и Фикајо Томори. Овие двајца фудбалери до крајот на сезоната ќе играат како позајмени играчи од Торино, односно Челси. Зимскиот преоден рок, Милан, ќе го заврши со потписот на Марио Манџукиќ.

Милан за Меите ќе му плати на Торино 1.000.000 евра, а по завршувањето на сезоната ќе може да го откупат неговиот договор за 7.000.000 евра.

Томори, со доаѓањето на Тијаго Силва, стана вишок во Челси. Интерес за него покажаа неколку екипи од Премиер лигата, но тој решил да ја прифати понудата од Милано. Милан договорил 18-месечна позајмица, а по истекот на истата за 26.000.000 евра ќе може да го откупи неговиот договор од Челси.

Манџукиќ, кој една година е без клуб, договорил плата од 1.800.000 евра по сезона. Тој ќе го потпише договорот откако ќе ги мине лекарските прегледи.