По состанокот на бордот на директори на Барселона, претседателот Жосеп Марија Бартомеу реши дека нема да даде оставка и покрај петицијата за негово отстранување, која собра над 10 илјади потписи на членовите на клубот.

Бордот ја чека конечната одлука на каталонската регионална власт дали референдумот за неговото претседателствување може да се оддржи на 1 и 2 втори ноември. Во понеделникот, Барселона прати писмо до Пере Арагонес, претседателот на каталонската влада, барајќи да се откаже ова гласање, а одлуката на здравствените власти ќе биде позната во среда.

Според шпанските медиуми, ова значи дека Бартомеу, претседателот кој е критикуван поради трансфер-политиката на клубот, конфликтот со Лионел Меси и слабите резултати на тимот, сака да се бори до крај, користејќи ја пандемијата на корона вирусот за откажувањето на гласањето.

Бартомеу веќе потврди дека нема да бара уште еден мандат на чело на Блауграна, а редовните избори во клубот се закажани во март.

Себастијан Фетел предизвика контроверзи по Португалското ГП, откако посочи дека можеби нема идентичен болид како колегата од Ферари, Шарл Леклер, нешто што веднаш го демантираа од италијанскиот тим.

Фетел повторно беше послабиот возач на Ферари во Португалија, завршувајќи на 10. место, додека Леклер беше 4., и младиот возач од Монако го има победено Фетел на сите трки во 2020. Со ова се комплетира „падот“ на четирикратниот светски шампион во Ферари, откако тие му соопштија дека нема да му го продолжат договорот и ќе го заменат со Карлос Саинс во 2021. Фетел, во интервју за „РТЛ“ по трката посочи дека нешто не е во ред.

„Од една страна сум задоволен бидејќи мислам дека имав добра трка и покрај лошиот старт. Но, од друга страна, очигледно е дека другиот болид е многу побрз. Каде губам време? Го гризам јазикот цела година. Некои идиоти нема да сфатат, но дали јас сум целосен идиот? Не би кажал така. Понекогаш со среќа ќе стигнеш до лимитот, но јас не можам оваа година. На другата страна изгледа многу полесно. Моите очекувања беа многу поголеми“, вели Фетел.

Шефот на Ферари, Матија Биното ги отфрли обвинувањата дека не се однесува фер кон двајцата возачи.

„Болидите на Себ и Шарл се целосно идентични. Искрено се надевам дека Себ ќе може да оствари повисока позиција на квалификациите во Имола и ќе покаже што умее. Шарл е многу добар, но можеби очекувате уште повеќе од вториот возач“, изјави Биното.

Паоло дал Пино, претседателот на Лега Серија А предупредува дека со новите мерки на италијанската влада фудбалскиот систем е „многу блиску до колапс“.

Со новите мерки на премиерот Џузепе Конте, баровите и рестораните во Италија ќе се затвараат во 18 часот, а фитнес-центрите и теретаните ќе останат затворени до 24 ноември. Професионалните спортови можат да продолжат без присуство на публика, што значи дека нема да ги има ниту 1.000 гледачи кои беа присутни последниот месец.

„Се надевам дека владата ја разбира вредноста на фудбалот како индустрија, без политичка демагогија. Ние сме многу загрижени, блиску сме до колапс и економијата на нашата земја ќе плати многу со овие рестриктивни мерки. Здравјето е на прво место, но важно е да се направи вистинскиот потег и да се мисли на долгорочната иднина. Во 2020 загубивме 600 милиони евра со празни стадиони и затоа бараме разбирање на владата. Плаќаме над 1 милијарда евра во даноци секоја година и очекуваме да се размислува и за нас“, вели Дал Пино.